Ságastallanráidu nuortalašgiela dilis: Giellabiras ságastallandilálašvuohta Čeavetjávrris
Sámediggi bovde ságastallat nuortalašgiela dilis ja ovddideamis. Ságastallamiid ulbmilin lea čohkket iešguđet doibmiid oktii guorahallat čovdosiid, maiguin giela dili sáhtálii buoridit ovttasbargguin ja juo leahkki resurssaid vehkiin. Ságastallamiin geahččalit gávdnat čovdosiid ja geahččat ovddosguvlui. Dárbbu mielde fáttá gieđahallan álggahuvvo dáládili kártemiin.
Govva: Tarmo Lehtosalo / Nuortalaškulturvuođđudus.
4. Giellabiras
4.9.2025 dmu 18–20 lagasdeaivvadeapmi Čeavetjávrris.
Dilálašvuohta ordnejuvvo Čeavetjávrris ja báikin lea Nuortalaškulturvuođđudusa Siid kueʹtt nappo Gili goahti. Dilálašvuohta lea lagasdeaivvadeapmi ja dasa ii sáhte searvat gáiddusoktavuođain.
Dilálašvuođas ságastallo nuortalašgiela giellabirrasa birra nappo earret eará makkár dovddut, doaladumit ja oainnut hálddašit nuortalašgiela.
Jođiheaddjin dilálašvuođas doibmet Uvjj – Uvjâ – Uvjja nappo sámi psykososiála doarjaga ovttadaga ovddasteaddji ja Sámedikki gielladoaimmahaga ovddasteaddjit. Dilálašvuođas sáhttá geavahit Suomas hállojuvvon ealli sámegielaid ja suomagiela.
Dilálašvuhtii ii dárbbaš almmuhit iežas ovddalgihtii ja dilálašvuođas guossohuvvo borramuš ja gáffe. Boradeapmi álgá dii. 17.30. Dađi bahábut eat geavatlaš sivaid geažil sáhte váldit vuhtii sierraborramušaid.
Ságastallandilálašvuhtii figgojuvvo vejolašvuođaid mielde ordnet sáhtu Čeavetjávrri lagasbirrasiin. Sáhtát almmuhit sáhttodárbbus sámi giellaáššiidčálli Marko Marjomaa šleađgapostii marko.marjomaa@samediggi.fi Almmuhusas galgá leat du nama lassin telefonnummir ja čujuhus/báiki, gos dárbbašat sáhtu. Sáhtát maiddái almmuhit sáhttodárbbus telefovnnain tel. 050 438 2484. Sáhttodárbbus galgá almmuhit maŋimustá 1.9.2025.
Dilálašvuođas čuovvut Sámedikki nuoraidráđi ráhkadan dorvvolaš birrasa rávvagiid, mat deattuhit gudnejahttima ja loavkitmeahttunvuođa.
Buresboahtin!
Loga lasi: Sámediggi ordne ságastallanráiddu nuortalašgiela dilis
Ságastallamiidda bovdet mielde olbmuid, geain lea beroštupmi ovddidit nuortalašgiela dili dahje barget giellaáššiiguin. Maiddái nuortalašgielat bálvalusaid geavaheaddjit, hubmit ja ovttaskas olbmot leat bures boahtin.
Ságastallanráidu lea oassi Sámedikki giellapolitihkalaš doaibma- ja ovddidanprográmma jagiide 2025-2027. Sámedikki dievasčoahkkin lea bidjan válgabaji guhkesáigásaš doaibmabidjun nuortalašgiela ealáskahttima, nannema ja ovddideami. Sámedikki oainnu mielde nuortalašgiela dilli spiehkasta anáraš- ja davvisámegiela dilis ja gáibida erenomáš doaimmaid dan ealáskahttimii. Hástalussan lea gávnnahuvvon, ahte nuortalašgiela ealáskahttima dahje viidáseappot giellaplánema ii koordinere oktage ásahus systemáhtalaččat. Danne háliida Sámediggi dál bovdet iešguđet doibmiid digaštallat mot galggašii ovdánit nuortalašgiela ealáskahttinbarggus. Ságastallamiin ráhkaduvvojit muittuhančállosat, maid vuođul nuortalašgiela ovddidanbargu joatkašuvvá Sámedikkis.
Ságastallamat lágiduvvojit ovttasbarggus Nuortalaččaid siidačoahkkimiin ja Nuortalaškulturvuođđudusain
Lassidieđut:
Anne Kirste Aikio, gielladorvočálli
anne-kirste.aikio@samediggi.fi
Marko Marjomaa, giellaáššiidčálli
marko.marjomaa@samediggi.fi
Niina Aikio-Siltala, giellabeassejođiheaddji
niina.aikio-siltala@samediggi.fi
