Raavâkirje sämikielâlij nettipalvâlusâi ovdedeijeid almostuvá 14.3.2023
Mii ovttas – Mij oovtâst – Mij õõutâst – Me yhdessä -viärmáduv pargojuávkku almostit 14.3.2023 raavâkirje ’Siula – kohti laadukkaita saamenkielisten palveluita’. Kirje lii čallum suomâkielân já tom puáhtá luuhâđ rijjâ Sämitige siijđoin Siula – opas saamenkielisten verkkopalveluiden kehittäjille.
Kirje fáálá vástádâsâid toos, maid ličij pyeri já tehálâš tiettiđ, ko ornijdume teikâ äššitobdee oovdedškuát sämikielâlijd nettipalvâlusâid. Ulmen lii movtijdittiđ já vyelediđ kozzii sämikielâlij nettipalvâlusâi rähtimân já oovdedmân. Kirje čälidijn juurdân lii lamaš ’maid tun jieš liččih halijdâm tiettiđ, ko tun algâttih porgâm sämikielâlij palvâlusâi ooleest’. Pargojuávhu jesâneh láá annaam kirjeest ävkkin jieijâs vuáttámušâid, já kirje ana-uv sistees keevâtlii tiäđu sämikielâlij siijđoi rähtim já ovdedem várás. Raavâkirje peividuvvoo já pargojuávkku tuáivu-uv lohhein macâttâs raavâkirjeest.
Anne Kirste Aikio, kote parga Sämitiggeest säämi kielâtorvočällen, lii toimâm Mij oovtâst -viärmáduv algâtteijen. Aikio lii lamaš mieldi meid kirjepargojuávhust aalgâ rääjist já sun paahud, ete sämikielâlij nettipalvâlusâi ovdedempaargon lii stuorrâ tárbu. Sämikielâliih nettiášástâllâmmáhđulâšvuođah láá uccáá já mun tuáivum, ete taat raavâkirje movtijdit maaŋgâid virgeomâháid ovdediđ jieijâs palvâlusâid säämi kielâlaavâ miäldásávt já raavâkirje torjuu vievâst, iätá Aikio.
Aalmuglâškirjerááju Saamelaiskielten tuki digitaalisissa palveluissa -haavâ proojeekthovdâ Niko Partanen ana, ete Mij oovtâst -viärmáduvâst lii šoddâm uđđâlágán já tehálâš juávkku, mast mij lep puáhtám oovtâst oppâđ eenâb tast, maggaar pargo jieškođe-uv ornijduumeest pargeh.
Raija Äijö, kote parga Kelast juksâmvuotâäššitobden, vuod tiäddut, ete lii tehálâš, ete lii viärmádâh, mast pyehtip jyehiđ vuáttámušâid pargoost sehe finniđ torjuu paargon. Sun tuáivu, ete tääl almostittemnáál raavâkirje ruokâsmit eres ornijduumijd paargon sehe meid servâđ Mij oovtâst -viärmáduv tooimân.
Mij oovtâst -viärmádâh
Sämitigge lii algâttâm ive 2022 Mii ovttas – Mij oovtâst – Mij õõutâst – Me yhdessä virgeomâhâšviärmáduv, mon ulmen lii ovdediđ virgeomâhái faallâm sämikielâlijd palvâlusâid. Viärmáduv tyehin lii Kela ornim nettipargopájáráiđu sämikielâlij palvâlusâi orniimist. Viärmáduv tárguttâssân lii faallâđ viärdásâštorjuu já savâstâllâmvuáđu sämikielâlij palvâlusâi äigikyevdilis fáddáid. Virgeomâhâšviärmádâh lii vuávájum já ávus staatâhaldâttuv, pyereestvaijeemkuávlui já kieldâi puoh äššitobdeid já pargeid sehe kuálmád sektor tuáimeid.
Lasetiäđuh: https://samediggi.fi/mii-ovttas
Anne Kirste Aikio
Säämi kielâtorvočällee, Sämitigge
anne-kirste.aikio@samediggi.fi
Marko Marjomaa
Säämi kielâašijčällee, Sämitigge
marko.marjomaa@samediggi.fi
