Neavvagat sámegielat neahttabálvalusaid ovddideaddjiide almmustahttojit 14.3.2023
Mii ovttas – Mij oovtast – Mij õõutâst – Me yhdessä -fierpmádaga bargojoavku almmustahttá 14.3.2023 rávagirjji ’Siula – kohti laadukkaita saamenkielisten palveluita’. Girji lea čállojuvvon suomagillii ja dan sáhttá lohkat friija Sámedikki siidduin: Siula – opas saamenkielisten verkkopalveluiden kehittäjille.
Girji fállá vástádusaid dasa, maid livčče buorre ja dehálaš diehtit go organisašuvdna dahje áššedovdi álggaha sámegielat neahttabálvalusaid ovddideami. Dárkkuhussan lea movttiidahttit ja vuolidit šielmmá sámegielat neahttabálvalusaid ráhkadeami ja ovddideami ektui.Girjji čáledettiin jurddan lea leamaš ’maid livččet ieš háliidan diehtit, go álggahit sámegielat bálvalusaiguin bargat’ Bargojoavkku lahtut leat geavahan ávkin iežaset vásáhusaid girjjis, ja dat sisttis doalláge geavada dieđuid sámegielat siidduid ráhkadeami ja ovddideami várás. Lea áigumuš, ahte rávagirji beaiváduvvo, ja bargojoavku sávváge lohkkiin máhcahaga rávagirjji birra.
Sámedikkis sámi gielladorvočállin bargi Anne Kirste Aikio lea doaibman Mii ovttas -fierpmádaga álgui biddjin. Aikio lea leamaš fárus maiddái girjebargojoavkkus álggu rájes ja son gávnnaha, ahte sámegielat neahttabálvalusaid ovddidanbargui lea stuorra dárbu. Sámegielat áššiiddikšunvejolašvuođat neahta bokte leat uhcán ja sávan, ahte dát rávagirji movttiidahttá máŋggaid virgeoapmahaččaid ovddidišgoahtit bálvalusaid sámi giellalága mielde ja girjji addin doarjaga vehkiin, dadjá Aikio.
Sámi gielladorvočálli Anne Kirste Aikio.
Riikkagirjeráju Saamelaiskielten tuki digitaalisissa palveluissa -prošeavtta prošeaktahoavda Niko Partanen dovdá, ahte Mii ovttas -fierpmádagas lea šaddan ođđalágan ja dehálaš joavku, gos mii leat sáhttán ovttas oahppat eanet dan birra, makkár barggut iešguđetge organisašuvnnain dahkkojit.
Riikkagirjeráju Saamelaiskielten tuki digitaalisissa palveluissa -prošeavtta prošeaktahoavda Niko Partanen
Kelas olahahttivuođaáššedovdin bargi Raila Äijö deattuha, ahte lea dehálaš, ahte gávdno fierpmádat, gos sáhttá juogadit vásáhusaid iežas barggu birra ja maiddái oažžut doarjaga bargui. Son doaivu, ahte rávagirji, mii dál almmustahtto, roahkasmahttá eará organisašuvnnaid bargui ja maiddái oassálastit Mii ovttas -fierpmádaga doibmii.
Kela olahahttivuođaáššedovdi Raila Äijö.
Mii ovttas -fierpmádat
Sámediggi lea álggahan jagi 2022 Mii ovttas – Mij oovtast – Mij õõutâst – Me yhdessä virgeoapmahašfierpmádaga, man dárkkuhussan lea ovddidit virgeoapmahaččaid fállan sámegielat bálvalusaid. Fierpmádaga duogážin leat Kela lágidan neahttabargobájit sámegielat bálvalusaid ovddideamis. Fierpmádaga dárkkuhussan lea fállat veardásašdoarjaga ja ságastallanvuođu sámegielat bálvalusaid áigeguovdilis fáttáide. Virgeoapmahašfierpmádat lea dárkkuhuvvon ja rabas buot stáhtahálddahusa, buresveadjinguovlluid ja gielddaid áššedovdiide ja bargiide ja maiddái goalmmát sektora doaibmiide.
Lassidieđut: https://samediggi.fi/mii-ovttas
Anne Kirste Aikio
Sámi gielladorvočálli, Sámediggi
anne-kirste.aikio@samediggi.fi
Marko Marjomaa
Sámi giellaáššiid čálli, Sámediggi
marko.marjomaa@samediggi.fi
