Uđđâ tiäđuh AHR 65 valjâluvâttâllâmmiärádâsâst oovtviärdásâšvuotâváldálii tiätupivdem peht – Sämitige valjâlävdikodde já stivrâ iä olgoštâm väideid
Sämitigge lii finnim uđđâ tiäđuid, moh lohtâseh alemuu haldâttâhrievti (AHR) miärádâssáid 27.3.2024. Oovtviärdásâšvuotâváldálii Sämitiigán juáhám tiätupivdem mield AHR miärádâsâin 27.3.2024 iä eromâšávt puáttám oovdân olgoštemkiäldun lohtâseijee uáinuh.
– Oovtviärdásâšvuotâváldálii tiätupivdemân AHR:st puáttám vástádâs uáivild tom, ete Sämitige valjâlävdikodde já stivrâ iä olgoštâm väideid AHR 65 miärádâsâst, maid tot adelij njuhčâmáánust 2024. Taat västid mii jieččân ibárdâs tast, ete nággusáid Sämitige valjâlävdikode tâi stiivrâ hárjuttem olgooštmist iä lah vuáđustâsah, iätá Sämitige saavâjođetteijee Pirita Näkkäläjärvi.
Tuávááš áášán lii tot, ete AHR meridij 27.3.2024 merkkiđ maajeeldkietân 65 olmožid Sämitige ive 2023 laavâvuáimálâžžân puáttám valjâluvâttâlmân Sämitige orgaanij miärádâsâi vuástásávt já meridij orniđ uđđâsist sämitiggevaaljâid. Sämitige vaaljah toimâttuvvojeh uđđâsist 3.6.– 1.7.2024.
Oovtviärdásâšvuotâváldálâš toovâi tiätupivdem AHR:n já juovij tiätupivdem puátusijd Sämitiigán.
– Ko oovtviärdásâšvuotâváldálii toimâttâh sierâ tiäđuštâlâi AHR:st, ete lâi-uv tot pahudâm ive 2023 valjáid kyeskee miärádâsâin, ete Sämitige valjâlävdikodde tâi stivrâ ličij olgoštâm occeid, te AHR adelij 6.5.2024 čielgâ vástádâs, mon mield olgoštemkiäldun lohtâseijee uáinuh iä pajanâm eromâšávt oovdân AHR adelem miärádâsâin, iätá saavâjođetteijee Näkkäläjärvi.
Saavâjođetteijee Näkkäläjärvi: Merhâšume joođoost orroo poolistutkâmân
AHR vástádâsâst lii merhâšume joođoost orroo poolistutkâmân, mii Laapi poolis tiäđáttâsâi mield čuáccá Sämitige valjâlävdikoodán já stiivrân 2020–23, iätá saavâjođetteijee Näkkäläjärvi.
Laapi poolis lii almolávt almottâm, ete tot totká vala tärkkilistmettum Sämitige valjâlävdikode já oovdeb stiivrâ jesânijd epidum rikosijn, ko puoh kiäh halijdii, iä tuhhiittum jienâvuoigâdvuođâlâžžân ive 2023 sämitiggevaaljâin. Valjâlävdikode motomeh teikâ puoh jesâneh láá epidum poolis tiäđáttâs 13.3.2024 mield olgooštmist já virgekenigâsvuođâ rikkomist. Poolis tieđettij 27.5.2024, ete meid motomeh teikâ puoh Sämitige stiivrâ jesâneh 2020–23 láá epidum rikosist. Kiässán ij kuittâg lah tuáistáážân almottum, ete poolis epidičij suu rikosist.
– Olgoštem merkkân poolis vissâ ana tom, ete AHR meridij njuhčâmáánust 65 olmožid maajeeldkietân jienâvuoigâdvuođâlâžžân Sämitige orgaanij miärádâsâi vuástásávt já meridij, ete ive 2023 sämitiggevaaljâid kalga orniđ uđđâsist. Oovtviärdásâšvuotâváldálii tiätupivdem vástádâs mield AHR ij kuittâg jieijâs miärádâsâin uáinám Sämitige valjâlävdikode já stiivrâ miärádâsâin maiden olgošteijee, iätá saavâjođetteijee Näkkäläjärvi.
Oovtviärdásâšvuotâlaavâ vuosâsajasâš kocceemvirgeomâhâš lii oovtviärdásâšvuotâváldálâš, kote ij lah huámmášâm ääšist olgoštem.
– Toos lasseen lii merhâšittee, ete äššiolesvuođâ tááhust merhâšittee AHR ihekirjemiärádâsâst KHO 2024:44 pahudui, ete áášán lii lohtâsâm riävtálâš epičielgâsvuotâ, já lasseen ton ihekirjemiärádâsâst jienâstii jienâiguin 5–2. Te kyehti AHR tuámmár láin Sämitige valjâlävdikuddijn já stivráin siämmáá linjáást, iätá saavâjođetteijee Näkkäläjärvi.
Lasetiäđuh
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
