Ođđ teâđ KHO 65 vaal-loǥstõktuʹmmstõõǥǥâst õõutverddsažvuõttväʹlddneeʹǩǩ teâttraukkmõõžž pääiʹǩ – Sääʹmteeʹǧǧ vaal-luʹvddkåʹdd da halltõs jie čårstam läittjid
Sääʹmteʹǧǧ lij vuäǯǯam ođđ teâđ kuuleeʹl ââʹlmõs vaaldâšmvuõiggâz (KHO) tuʹmmstõõǥǥid 27.3.2024. Õõutverddsažvuõttväʹlddneeʹǩǩ Sääʹmtegga juäʹtǩǩem teâttraukkmõõžž mieʹldd KHO tuʹmmstõõǥǥin 27.3.2024 jie jeäʹrben pâjjnam čårstemǩiõlddja õhttneei vuäinnmõõžž.
– Õõutverddsažvuõttväʹlddneeʹǩǩ teâttraukkmõʹšše KHO:st puättam västtõs miârkkšââvv tõn, što Sääʹmteeʹǧǧ vaal-luʹvddkåʹdd da halltõs jie čårstam läittjid kuuleeʹl KHO 65 tuʹmmstõʹǩǩe, koid tõt uuʹdi pâʹsslâšttam-mannust 2024. Tät vaʹsttad mij jiiʹjjen fiʹttjõõzz tõʹst, što ceälkkmõõžžid Sääʹmteeʹǧǧ vaal-luʹvddkååʹdd leʹbe halltõõzz harjjtem čårstummšest ij leäkku vuâđđ, särnn Sääʹmteeʹǧǧ saaǥǥjååʹđteei Pirita Näkkäläjärvi.
Ääʹšš tueʹǩǩen lij tõt, što KHO mieʹrrii 27.3.2024 mieʹrǩǩeed mââiǩiõʹtte 65 ooumžed Sääʹmteeʹǧǧ eeʹjj 2023 lääʹjjviõkksen šõddâm vaal-loǥstõʹǩǩe Sääʹmteeʹǧǧ toiʹmmjeeʹji tuʹmmstõõǥǥi vuâsttsanji da oođeed sääʹmteʹǧǧvaalid. Sääʹmteeʹǧǧ oođeed mieʹrruum vaalid tooiʹmtet 3.6.– 1.7.2024.
Õõutverddsažvuõttväʹlddneǩ tuejjii teâttraukkmõõžž KHO peälla da jueʹtǩi teâttraukkmõõžž puäđõõzzid Sääʹmtegga.
– Õõutverddsažvuõttväʹlddneeʹǩǩ konttâr jeeʹrab teâđstõõllmen KHO:st, leäi-a tõt tuõttâm eeʹjj 2023 vaalid kuõskki tuʹmmstõõǥǥin Sääʹmteeʹǧǧ vaal-luʹvddkååʹdd leʹbe halltõõzz čårstem ooccjid, KHO uuʹdi 6.5.2024 čiõlgg vaʹsttõõzz, koon mieʹldd čårstemǩiõlddja kuulli vuäinnmõõžž jie pâjjnam jeäʹrben õuʹdde KHO uʹvddem tuʹmmstõõǥǥin, särnn saaǥǥjååʹđteei Näkkäläjärvi.
Saaǥǥjååʹđteei Näkkäläjärvi: Miârktõs jååʹttmen åårrai pååʹlestuʹtǩǩummša
KHO vaʹsttõõzzâst lij miârktõs jååʹttmen åårrai pååʹlestuʹtǩǩummša, kååʹtt Lappi pååʹlez teâđtõõzzi mieʹldd kuõskât Sääʹmteeʹǧǧ luʹvddkååʹdd di halltõõzz 2020–23, särnn saaǥǥjååʹđteei Näkkäläjärvi.
Lappi pååʹles lij õlmmsest iʹlmmtam što tuʹtǩǩad veâl tääʹrǩben säärnǩâni Sääʹmteeʹǧǧ vaal-luʹvddkååʹdd da õõuʹdab halltõõzz vuäzzlaid kaddum reäkkõõzzin, ǥu pukid haaʹleeʹjid jeäʹt primmum jiõnnvuõiggâdvuõttneʹǩǩen eeʹjj 2023 sääʹmteʹǧǧvaalin. Vaal-luʹvddkååʹdd måtmid leʹbe pukid vuäzzlaid kääʹddet pååʹlez teâđtõõzz 13.3.2024 mieʹldd čårstummšest da veʹrǧǧõõlǥtummuž vuâstta tuejjummšest. Pååʹles teâđti še 27.5.2024, što måtam leʹbe puk Sääʹmteeʹǧǧ halltõõzz vuäzzla 2020–23 lie reäkkõõzzâst käʹddum. Ni ǩeäzz ij kuuitâǥ leäkku tän räjja iʹlmmtum, što pååʹles âânči tän reäkkõõzzâst käʹddum.
– Čårstem čuäjtõsân pååʹles deʹbe âânn tõn, što KHO mieʹrrii pâʹsslâšttam-mannust 65 ooumžed mââiǩiõʹtte jiõnnvuõiggâdvuõttneʹǩǩen Sääʹmteeʹǧǧ toiʹmmjeeʹji tuʹmmstõõǥǥi vuâsttsanji da eeʹjj 2023 sääʹmteʹǧǧvaalid oođeemnalla. Õõutverddsažvuõttväʹlddneeʹǩǩ teâttraukkmõõžž vaʹsttõõzz mieʹldd KHO ij kuuitâǥ tuʹmmstõõǥǥines vuäinnam Sääʹmteeʹǧǧ vaal-luʹvddkååʹdd da halltõõzz tuʹmmstõõǥǥin ni mõõn čårsteei, särnn saaǥǥjååʹđteei Näkkäläjärvi.
Õõutverddsažvuõttlääʹjj vuõss-sâjjsaž vuåppâmveʹrǧǧneǩ lij õõutverddsažvuõttväʹlddneǩ, kååʹtt ij leäkku vuâmmšam ääʹššest čårstummuž.
– Lââʹssen lij miârkteei, što äʹššobbvuõđ juuʹrdeeʹl miârkteei KHO õuddtuʹmmstõõǥǥâst KHO 2024:44 tuõʹtteš, što äšša lij kuullâm vuõiggâdvuõđlaž pannčiõlggvuõtt, da lââʹssen kõõččmõõžžâst åårrai õuddtuʹmmstõõǥǥâst jiõnsteš jiõnin 5–2. Nuuʹbbin saaʹnin kuõʹhtt KHO tuomar leʹjje Sääʹmteeʹǧǧ vaal-luʹvddkooʹddin da halltõõzzin seämma liinjâst, särnn saaǥǥjååʹđteei Näkkäläjärvi.
Lââʹssteâđ
pirita Näkkäläjärvi
Saaǥǥjååʹđteei
44 7 533 766
pirita.nakkalajarvi@samediggi.fi
