Sámegielat oidnojit ja gullojit Giellavahkus - boađe mielde!
Giellavahkku ávvuduvvo jahkásaččat golggotmánus vahkus 43, nappo dán jagi 20.-26.10. Sámediggi bovde buohkaid mielde čalmmustahttit Eurohpa Uniovnna áidna eamiálbmoga, sápmelaččaid, Suomas ealli gielaid – anárašgiela, nuortalašgiela ja davvisámegiela. Oahpahusministtar Anders Adlercreutz doaibmá dán jagi Giellavahku suodjaleaddjin.
– Go mii geavahat sámegielaid buotlágan oktavuođain, de leat lasiheamen sámegielaid oinnolašvuođa ja árvvu. Vuoikko ieš ii máhtášii sámegiela, sáhttá lihkká leat mielde doarjumin giela ja kultuvrra – rabas miella ja smávva dagutge mearkkašit olu, dadjá Sámedikki ságajođiheaddji sadjásaš Tuomas Aslak Juuso.
Manin gánneha oassálastit?
- Sámegielat leat ealli, muhto áitatvuloš kulturárbi. Gielaid oidnon nanne daid eallinfámu.
- Oassálastin duvdá eamiálbmogiid vuoigatvuođaid ja ovttaveardásašvuođa.
- Sámegielaid doarjun muitala servodaga ja báikkálaš servoša árvvusatnimis ja árvojođiheamis.
- Juohkehaš sáhttá leat mielde huksemin gielalaččat ja kultuvrralaččat ovttaveardásaš Suoma.
Mo Giellavahkkui sáhttá searvat?
Giellavahkkui sáhttá searvat smávva ja symbolalaš daguiguin, dahje viiddit ja hutkás vugiiguin – dehálamos ášši lea dat ahte dagut gudnejahttet sámiid ja sámeservodaga oaiviliid. Dá moadde ovdamearkka:
- Bija sámegielaid oidnosii neahttasiidduide , galbbaide, almmuhantávvaliidda dahje go gulahalat áššehasaiguin.
- Juoge beaivvi sámegielsáni sosiálamedias.
- Ordne smávva dáhpáhusaid, infopakeahta, ovdanbidjama dahje kampánjja sámegielaid gudnin.
- Geavat oassálastima oktavuođas fáddágilkora #giellavahkku, #kielâokko dahje #ǩiõllneä’ttel
- Materiálat ja lassedieđut gávdnojit neahttasiidduin: Giellavahkku, Kieliviikko, Giellavahkku FB ja Giellavahku Instagram.
Mii Giellavahkku lea?
Giellavahku ulbmilin lea ahte sámegielat oidnošedje ja gullošedje buot servodaga surggiin Suomas, Ruoŧas ja Norggas. Gielat leat dehálaččat sámegielhállii, sámeálbmogii ja olles suopmelaš servodahkii – sámegielat leat gulahallangaskaoamit, dat guddet identitehta ja kulturárbbi ja huksejit oktiigullevašvuođa.
Go sámegielat leat oidnosis árgabeaieallimis, daid sajádat nanusmuvvá ja dat dohkkehuvvojit buorebut servodagas. Giellavahkku lea ordnejuvvon jagi 2019 rájes, mii lei maiddái ON:id riikkaidgaskasaš eamiálbmotgielaid jahki. Sámediggi ordne vahku ovttas Ruoŧa ja Norgga Sámedikkiiguin.
Lassedieđut:
Tuomas Aslak Juuso
Ságajođiheaddji sadjásaš
Sámediggi
tuomas.juuso@samediggi.fi
040 687 3394
Oassálastima plánemis veahkeha:
Marko Marjomaa
Sámi giellaáššiidčálli
Sámediggi
marko.marjomaa@samediggi.fi
+358 50 438 2484
