Ehtalaččat suvdilis eamiálbmotmátkeealáhus ovdan Anáris

Sámedikki stivrra lahttu Tauno Ljetoff gávnnahii konfereanssa rahpansániin gaskavahku 21.5., mo mátkeealáhus lea dán áigge máŋgga sápmelažžiige dehálaš ealáhus, ja dat johtá dávjá giehtalágaid árbevirolaš sámeealáhusaiguin. – Árbevirolaš ealáhusaid ja mátkeealáhusa oktiiheiveheapmi lea dehálaš ja jáhkán, ahte sertifiserenbargguin mii sáhttit ráhkadit ain buoret doaibmanvugiid, árvala Ljetoff.

Ljetoff buvttii buresboahtinsáhkavuorus ovdan, mo vásttolaš sámemátkeealáhusa sertifikáhta lea buohkaid ovdu, dasgo dat nanne sihke sámekultuvrra, Sámi luonddu, ja maiddái olles sámeservoša. Seamma háve dat dáhkida maiddái buohkaide dáppe galledeaddjiide dan, maid sii galledeamis dábálaččat eanemus vurdet: eaktilut ja seamma háve maiddái sámeservoša ja luonddu ektui suvdilut vásáhusa.

– Sertifikáhtabarggu bakte lea dárkkuhussan eandalii čielggasmahttit sámemátkeealáhusa dálá dili, vai mii sáhttit buorebut doarjut doaibmiid, geat barget rivttes ja suvdilis vugiin. Erenomáš dehálaš midjiide lea dieđusge váfistit sámiid iežaset doaibmaneavttuid mátkeealáhussuorggis, deattuha Ljetoff.

Eamiálbmotkonfereanssa lágidit ovttasbarggus World Indigenous Tourism Alliance (WINTA), Sámediggi ja Lappi universitehta. Disttaga 20.5. konfereanssa álggahii dutkansymposium, man fáddán lei mátkeealáhus ja eamiálbmogiid kulturárbi. Gaskavahku 21.5. ja duorastaga 22.5. konfereanssas gieđahallojit ehtalaččat suvdilis eamiálbmotmátkeealáhusa geavadat. Dárkilut fáddán leat sertifikáhtat, mat geavahuvvojit mátkeealáhusas, ja maiddái suvdilis mátkeealáhus ja eamiálbmotmátkeealáhusa vuovdin ja márkanastin. Oahpahus- ja kulturministeriija lea mieđihan sierradoarjaga konfereanssa lágideami várás. Oahpásmuva dárkilabbot konfereanssa prográmmii dáppe.

Sertifikáhtabargguin doarjja sápmelaš fitnodatdoalliid gilvalannákcii

Sámedikki čihččet sámemátkeealáhusprošeakta, Vasan matka elege Vásttolaš sámemátkeealáhusa sertifikáhta: doaibmanmálle ja digitálalaš ohcansiiddu ovddideapmi, vuojulduvvá vásttolaš sámemátkeealáhusa sertifikáhtabargui. Sertifikáhta dárkkuhussan lea bajidit ovdan vásttolaš ja ehtalaččat suvdilis sámedoaibmiid ja -buktagiid, ja ná doarjut doaibmanbirrasa, mii ovddida sápmelaš fitnodatdoalliid gilvalannávcca. Prošeavtta ollašuhttináigi lea 11.7.2024-30.6.2025 ja prošeavtta lea ruhtadan Eurohpa uniovnna – NextGenerationEU.

Gaskavahku 21.5. konfereanssas ovdanbuktui hámus ođđa sertifikáhtas vásttolaš ja ehtalaččat suvdilis sápmelaš mátkeealáhusfitnodagaide, mat doibmet Suomas. – Dál vásttolaš sámemátkeealáhusa sertifikáhta kriterat leat jođus kommeanttaid várás, ja čuovvovaččat dat mannet Sámedikki ealáhus- ja vuoigatvuođalávdegotti gieđahallamii. Kriteraid gieđahallá vel Sámedikki stivra ovdalgo dat mannet Sámedikki čoahkkimii dohkkeheami várás, muitala prošeavtta plánejeaddji Kirsi Suomi.

Sámediggi lea ovdal ožžon oahpahus- ja kulturministeriijas stáhtadoarjaga guđa sámemátkeealáhusprošektii.  Dáid prošeavttaid áigge leat ráhkaduvvon Vásttolaš ja ehtalaččat suvdilis sámemátkeealáhusa doaibmanprinsihpat, maid Sámediggi dohkkehii čoahkkimis čakčamánus 2018, ja maiddái Vásttolaš mátkkálačča rávvagat sámekultuvrii ja sámiid ruovttuguovllu máilbmái, mat olggosaddojuvvojedje 16.5.2022.

Lassidieđut:

Kirsi Suomi
Plánejeaddji, Vasan matka – Vásttolaš sámemátkeealáhusa sertifikáhta -prošeakta
040 594 5492
kirsi.suomi@samediggi.fi