Sámediggi ohcá oahppamateriálačálli virgesadjásačča
Sámediggi almmuha ohcan láhkai oahppamateriálačálli virgesadjásašvuođa.
Oahppamateriálačálli barggut leat meroštallon Sámedikki bargoortnega 40 §:s. Oahppamateriálačálli ee. válmmaštallá sámegielat oahppamateriála buvttadeapmái gullevaš áššiid, hálddaša oahppamateriálamearreruđa geavaheami, doaibmá áššemeannudeaddjin oahppamateriálaáššiin sierra doaibmaorgánain, čuovvu oahppamateriálasuorggis dáhpáhuvvi ovdáneami, oahppoplána ja maid gullá materiála válmmaštallamis oahpaheaddjiid.
Oahppamateriálaprošeavttaide gullevaš bargguin oahppamateriálačálli doaibmá nana ovttasbarggus oahppamateriálaplánejeaddjiiguin.
Bálvalangaskavuođa dieđut
Sadjásašvuohta álgá soahpamuša mielde nu johtilit go vejolaš ja dat bistá jagi 2026 lohppii, vejolaččat guhkit áigge.
Doaimma deavdimis čuvvojuvvo njealji mánotbaji geahččalanáigi.
Oahppamateriáladoaimmahaga doaibmabáiki lea Sámekulturguovddáš Sajosis, Anáris, muhto barggu lea vejolaš bargat oassái gáiddusin.
Ohccis vurdojuvvo
Seađusvuđot gelbbolašvuođagáibádussan lea skuvlejupmi, man doaibma eaktuda, ja dasa lassin gáibádussan lea sámegiela máhttu (ásahus 1727/95). Virggi ceavzilis dikšuma eaktun leat heivvolaš allaskuvladutkkus, buorre dovdámuš oahpahus- ja oahppamateriálaáššiin ja hálddahusbargguin, stáhtadoarjagiid hálddašeami nana máhttu, nákca hálddašit ollisvuođaid plánemis operatiivvalaš ollašuhttimii, buorit ovttasbargo- ja organiserendáiddut ja čielga čálalaš gulahallandáidu.
Bálká
Bálká mearrašuvvá Sámedikki bálkávuogádaga gáibádusdási IV/II mielde (vuođđobálká 2998,97 euro/mb). Vuođđobálkká lassin máksojuvvojit 24 % sámeguovllu lassi, go bargá sámiid ruovttuguovllus, ja ahkelasit bargohárjánumi mielde.
Ohcan
Ohcamušskovi, ja friijahápmásaš eaktodáhtolaš ohcanreivve ja vejolaš ánsologahallama ja eará čuvvosiid galgá doaimmahit Sámedikki čállingoddái maŋimustá 8.1.2026 dán elektrovnnalaš ohcamušskovi bokte (rahpasa ođđa ruvttui): Ohcamušskovvi
Lassedieđuid doaimmas addá hálddahushoavda Pia Ruotsala-Kangasniemi, pia.ruotsala@samediggi.fi, tel. 040 726 2688 ja skuvlenčálli Bigga-Helena Magga, bigga-helena.magga@samediggi.fi
Sámedikki doibmii sáhttá oahpásmuvvat neahttačujuhusas www.samediggi.fi
Anáris 18.12.2026
Sámediggi
