Sámedikki álggahii EU-mihttomeriid ovddideami - ovddasteaddjit dán vahkkus Brysselis deaivamen EU:a doaibmaorgánaid ovddasteddjiid
Sámedikki ovddasteaddjit mátkkoštit Brysselii ovddidit Sámedikki EU-politihkkii guoskevaš mihttomeriid 13.-16. miessemánus. Galledanmátkkis ovddasteaddjit deaivvadit EU:a doaibmaorgánaid ovddasteaddjiid ja čanusjoavkkuid.
Bryssela mátkki ulbmilin lea álggahit barggu Sámedikki EU-mihttomeriid ektui. Mihttomearit gusket dálkkádatnuppástussii, eallinfápmui ja osolašvuhtii. Sámedikki ovddasteaddjit deaivvadit ovdal Brysselii vuolgima stáhtaráđi kansliija EU-ossodagain Helssegis. Brysselis leat deaivvadeamit ee. Suoma EU-ovddastagain, Eurohpá kommišuvnnain ja Eurohpá parlameanta suopmelaš ovddasteddjiiguin, nappo meppiiguin.
Vaikke EU:a mearrádusat váikkuhit sápmelaččaid beaivválaš eallimii, ii sápmelaččain goittotge leat virggálaš sajádat EU:a mearrádusdahkamis iige bissovaš ovddastat Brysselis. EU:s ii maiddái leat virggálaš siskkáldas álgoálbmotpolitihkka.
– Sámedikki dievasčoahkkin lea meroštallan dán válgabadjái prioritehtan EU:a guvlui váikkuheami. Ulbmilin lea dán mátkkis álggahit ságastallamiid das, mo sáhtášeimmet konkrehtalaččat ovddidit sámiide dehálaš áššiid EU-dásis, dadjá ságadoalli sadjásaš Tuomas Aslak Juuso.
– Mii vuordit positiivvalaš vuostáiváldima ja dan, ahte sáhtášeimmet ovttas identifiseret lávkkiid boahtteáigái, Juuso joatká.
Sámedikki delegašuvdnii gullet ságajođiheaddji sadjásaš Tuomas Aslak Juuso, I várreságajođiheaddji Leo Aikio, stivrra lahttut Tauno Ljetoff ja Asko Länsman, ealáhus- ja vuoigatvuođalávdegotti ságajođiheaddji Nilla Tapiola, láhkačálli Kalle Varis, riikkaidgaskasaš áššiid čálli Inka-Saara Arttijeff ja ságajođiheaddji veahkkebargi Niina Siivikko.
EU-áššit Sámedikki riikkaidgaskasaš doaimma guovddážis
Sámediggi lea linnjen dán válgabaji riikkaidgaskasaš doaimma guovddáš mihttomearrin Sámedikki oassálastinvuoigatvuođaid nannema ja stáđásmahttima Eurohpa uniovnna institušuvnnain ja EU-mearrádusbargamii oassálastimis Suomas. Jagi 2025 doaibmaplána oktan njunušmihttomearrin lea: ”Sámiid oassálastinvuoigatvuođat EU:s ja EU:a guoski mearrádusbargamis: bissovaš struktuvrraid ovddideapmi”.
Sámedikki EU-politihkkii laktáseaddji mihttomearit leat juhkkon golmma váldomihttomeari vuollái:
- Oassálastima nannen
- Dálkkádatnuppástus
- Sámeguovllu eallinfápmu
Sámedikki ja Sámi parlamentáralaš ráđi ulbmilat lea linnjás Bárentsa guovllu eamiálbmogiid alladásičoahkkima bohtosiiguin, mii ordnejuvvui Brysselis njukčamánus 2023.
- Sámedikki válgabaji doaibmaprográmma 2020 – 2023 (pdf suomagillii)
- Sámedikki doaibmaplána jahkái 2025 (pdf suomagillii)
- Sámedikki riikkaidgaskasaš doaimma guoskevaš strategiija (pdf suomagillii)
Lassidieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Inka Saara Arttijeff
Riikkaidgaskasaš áššiid čálli
050 574 7629 / 010 839 3198
inka-saara.arttijeff@samediggi.fi
