Sámediggi ii dohkket sámegielat dahje sámiid ruovttuguovllu sode-bálvalusaid hedjonahttimiid

Seastindoaimmain evttohit ee. Muoná seaŋgaossodaga heaittiheami, ruovttus dahje ruovttubirrasis addojuvvon spesiálabuohccedikšuma čohkkema, Gárasavvona dearvvasvuođastašuvnna beaivválaš doaimma heaittiheami ja maid Avvila birrajándora gohcindivššu nuppástahttima hohpolaš vuostáiváldimin, dalle mátki sámiid ruovttuguovllu davveosiin birrajándora gohcindikšui livččii measta 500 km.

– Sámiid ruovttuguovllu dahje dohko váikkuhusaid dáfus olli bálvalusaid seastindoaimmat orrot leamen issorasat go vuhtiiváldá sámeálbmoga juo gárvvisin heajut sajádaga sosiála- ja dearvvasvuođafuolahusas. Bálvalusaid gáržžideapmi váikkuha olbmuid dorvvolašvuođa vásáhusaide ja mii doarjalit Laphai, ahte dat geassá eret daid evttohusaid, gávnnaha Sámedikki ságajođiheaddji sadjásaš Tuomas Aslak Juuso.

Sámediggi muittuha, ahte sode-ođastusa váldoulbmiliidda gulai ovttaveardásašvuođa buorideapmi. Guvllolaš olahahttivuođa hedjonahttin dagaha jorgguváikkuhusa ja sáhttá hedjonahttit olbmuid luohttámuša servodaga bálvalusaide. Bálvalusaid sirdin eret sámiid ruovttuguovllus maiddái hedjonahtášii vejolašvuođa geavahit bálvalusaid sámegielaiguin ee. bargiid oažžuma hástalusaid dihte.

Sámediggi maiddái fuopmášuhttá, ahte Lappi buresveadjinguovllu gusket sámediggelága (414/2025) 9 § ja 9a § mielde geatnegasvuođat. Dál seastindoaimmat leat válmmaštallon almmá makkárge ovttasdoaimma dahje ráđđádallama Sámedikkiin.

– Sámedikki livččii galgan váldit mielde juo válmmaštallanmuttus. Aiddo ođastuvvon sámediggeláhka dorvvasta ráđđádallamiid ollašuvvama buorebut, ii heajubut. Dát lea mu mielas hui duođalaš ášši ja mii gártat guorahallat joatkkadoaimmaid áššis, joatká Juuso.

Sámediggi maiddái doarjala Suoma stáhtii, ahte dat guoddá ovddasvástádusa sámiid bálvalusain iige ásat massiivvalaš seastindoaimmaid sámeálbmoga ovdii.

Lassidieđut

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi