Rabas reive: Sámegiel ja sámiid ruovttuguovllu bálvalusaid sihkkarastin Lappi buresveadjinguovllus
Sámediggi lea doaimmahan Lappi buresveadjinguovllu mearrideaddjiide rabas reivve, mas dat gáibida sihkkarastit ahte sámegiel ja sámiid ruovttuguovllu sosiála- ja dearvvasvuođafuolahusa bálvalusaide leat govttolaš mátkkit. Sámediggi lea juo árabut ovdanbuktán duođalaš fuolas ekonomiija seastindoaimmaid váikkuhusain guovllu vealtameahttun bálvalusaide.
Govva: Ville Fofonoff
Erenomáš fuola leat boktán plánat Muoná seaŋgaossodaga giddemis ja Avvila birrajándora gohcindivššu heaittiheamis. Guktot bálvalusat leat mearkkašahttit baicca buohkaide guovllu áššehasaide, maiddái erenomážit sámeálbmogii guhkes mátkkiid ja sámegiel bálvalusaid dihte.
Sámedikki doallá dehálažžan, ahte guovlluráđđehus mearridii 9.2.2026 čoahkkimis evttohit guktuid bálvalusaid joatkima. Mearrádus čájeha ipmárdusa guovllu sierraiešvuođain ja ássiid dárbbuin.
– Guovlluráđđehus lea dahkan guhkálaš dehálaš dihkádeami, man mii doaivut ahte guovllustivra boahtte vahku čoahkkimis doarju. Muoná seaŋgaossodat ja Avvila birrajándora gohcindikšu leat vealtameahttun bálvalusat, maid heaittiheapmi heajudivčče sihke pasieantadorvvolašvuođa ja dorvvolašvuođa dovddu, dadjá Sámedikki ságajođiheaddji sadjásaš Tuomas Aslak Juuso.
Fuolla maiddái eará bálvalusain
Rabas reivves ovdanbuktojuvvo, ahte seastinplánas leat earáge sámiid dáfus kritihkalaš bálvalusat, mat eai leat leamaš nu olu almmolaš ságastallamis. Okta dain lea Gárasavvona dearvvašvuođastašuvnna beaivválaš doaimma heaittiheapmi, man Sámediggi ii dohkket. Erenomážit jeavddalaččat bálvalusaid dárbbašeaddji áššehasjoavkkuide olámuttot dearvvašvuođabálvalusat leat vealtameahttumat, ja guhkes mátkkit sáhttet dagahit mearkkašahtti eastagiid bálvalusaide ohcaleapmái.
Sámediggi muittuha, ahte maiddái ruovttuguovllu eará giliid bálvalusaid galgá dorvvastit, daningo dat leat dehálaččat baicce olbmuid buresveadjimii maiddái sámegielaid ja kultuvrra seailuma ja guovlluid eallinfámu dáfus. Bálvalusaid plánemis galgá vuhtiiváldit guovllu áššehasaid dárbbuid ja Sámedikki galgá váldit mielde ovttasbargui, dego láhkaásaheapmi eaktuda.
Ovttaveardásaš bálvalusat ovttasbarggus
Sode-ođastusain ulbmilin lea leamaš buoridit bálvalusaid ovttaveardásašvuođa ja olahahttivuođa. Sámediggi lea boahtteáiggisge gárvvis bargat nana ovttasbarggu, vai dát prinsihpat ollašuvašedje olles Lappi buresveadjinguovllus – maiddái dain giliin ja servošiin, mat álkit báhcet guovddážiid suoivanii.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
