Sámediggi giitá Lappi buresveadjinguovllu guovlostivrra
Lappi buresveadjinguovllu guovlostivra čoahkkanii vuossárgga 23.2.2026 mearridit mearkkašahtti ekonomiija vuogáiduhttindoaimmain. Guovlostivra mearridii doarjut guovlohálddahusa evttohusa, man mielde sihke Muoná seaŋgaossodat ja Avvila birrajándor doavttergohcima joatkašuvvan sihkkarasto. Dan lassin guovlostivra mearridii ahte Gárasavvona dearvvasvuođaguovddáš ii heaittihuvvo. Sámediggi lea duođaid duđavaš guovlostivrra mearrádusaide.
Govva: Johanna Labba
– Mii giitit guovlostivrra lahtuid, geat mearridedje bealuštit sámiid ruovttuguovllu ja dan ássiide oaivvilduvvon bálvalusaid. Bálvalusain, mat doibmet bures ja leat olbmuid olámuttus, lea stuorra mearkkašupmi guovllu olbmuide ja viidábut maiddái eallinfápmui. Lea dehálaš, ahte sámiid ruovttuguovllu olbmuin lea luohttámuš dasa, ahte sis váldo vára ovttaveardásaččat, lohká Sámedikki ságadoalli sadjásaš Tuomas Aslak Juuso.
Sámedikki mielas lea dehálaš ahte Lappi buresveadjinguovllu stivra válddii mearrádusain vuhtii Sámedikki oainnuid. Sámediggi lea figgan váikkuhit mearrádussii ráđđádallamiiguin, cealkámušain ja almmolaš oaiviliiguin.
– Lean duđavaš ahte guovlostivra lea oahpásmuvvan min fuomášumiide ja váldán daid duođas. Dat lea mielde doarjumin ovddideaddji ja buori ovttasbarggu maiddái boahtteáiggis, joatká Juuso.
Sámedikki mielas lea dehálaš ahte ovttasbargu joatkašuvvá ekonomiija vuogáidahttindoaimmaid ollašuhttima oktavuođas. Lappi buresveadjinguovllu vuogáidahttidoaimmain leat linnjen ee. giliid bálvalusaid nuppástuhttimis ja ahte Muonás seaŋgaossodaga seailumis fuolakeahttá virgeáiggi olggobealde hohpolaš vuostáiváldin nogašii. Go dát plánat čilget de Sámediggi háliida leat mielde sihkkarastimin, ahte nuppástusat eai heajudahte sámiid ruovttuguovllu giliid bálvalusaid muhto ahte bálvalusat leat buot ahke- ja áššehasjoavkkuid olámuttus.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
