Sámediggi ohcá mearreáigásaš davvisámegiela giellabargi-jorgaleaddji

Giellabargi-jorgaleaddji bargun lea dikšut davvisámegiela jorgalanbargguid Sámedikki sámegiela doaimmahagas.

Bálvalangaskavuođa dieđut

Bargu álgá soahpamuša mielde. Mearreáigásaš bálvalangaskavuohta bistá guhtta mánotbaji, vejolaččat guhkit áigge. Vejolaš joatkašuvvamis sohppojuvvo sierra. Bálvalangaskavuođa deavdimis čuovvut guovtti mánotbaji geahččalanáiggi.

Sámegiela doaimmahat lea Anáris, Sámekulturguovddáš Sajosis. Barggu sáhttá bargat gáiddusin.

Ohccis vurdojuvvo

Giellabargi-jorgaleaddji gelbbolašvuođagáibádussan lea heivvolaš skuvlejupmi ja sámegiela máhttu (ásahus 1727/95). Dasa lassin jorgaleaddji gelbbolašvuođagáibádussan lea lágas auktoriserejuvvon jorgaleaddjiin (1231/2007) oaivvilduvvon vuoigatvuohta doaibmat auktoriserejuvvon jorgaleaddjin suomagielas davvisámegillii dahje nuppegežiid. Doaimma ceavzilis dikšuma veahkeha bargohárjánupmi jorgalanbargguin, ahte dovdá bures davvisámegiela ja sátneráju, ja nákce bargat iehčanasat ja fuolalaččat. Mii atnit árvvus buriid ovttasbargan- ja gulahallandáidduid.

Bálká

Bálká mearrašuvvá Sámedikki bálkávuogádaga gáibádusdási IV/IV dahje V/II mielde (vuođđobálká 2877,73–2762,37 euro/mb). Vuođđobálkká lassin máksojuvvojit 24 % sámeguovllu lassi, go bargá sámiid ruovttuguovllus, ja ahkelasit bargohárjánumi mielde.

Ohcan

Ohcamušskovi, friijahápmásaš eaktodáhtolaš ohcanreivve ja vejolaš ánsologahallama ja eará čuvvosiid galgá doaimmahit Sámedikki čállingoddái maŋimustá 10.3.2026 dán elektrovnnalaš ohcamušskovi bokte: Ohcamušskovvi

Lassedieđuid barggu birra addá Sámedikki gielladorvočálli Anne Kirste Aikio tel. +358 40 707 5626 dahje anne-kirste.aikio(at)samediggi.fi.

Anáris 24.2.2026
Sámediggi