Sámediggi ohcá sámemusihkkaguovddáža plánejeaddji
Sámediggi almmuha ohcan láhkai sámemusihkkaguovddáža plánejeaddji fásta virggi.
Sámedikki vuolde doaibmi sámemusihkkaguovddáža dárkkuhussan lea doarjut árbevirolaš sámi musihkkavugiid (luohti, leuʹdd ja livđe) seailuma ja viidásabbot ovdáneami ja maid doarjut ja ovddidit modeardna sámemusihka.
Sámemusihkkaguovddáža doaimma jođiha plánejeaddji. Musihkkaguovddáža plánejeaddji doaibmá maiddái áššemeannudeaddjin Sámedikki stivrii iežas doaimmaide ja doaibmasuorgái gullevaš áššiin ja ollašuhttá dan mearrádusaid. Plánejeaddji bargun lea dikšut guovddáža doaibmabadjái nannejuvvon doaibmaplána mielde bargguid, ja maiddái hálddahushoavdda sutnje sierra mearridan bargguid. Stuorámus bargoollisvuohtan musihkkaguovddáža plánejeaddjis lea Ijahis idja – eamiálbmogiid musihkkafestivála buvttadeaddjin doaibman.
Bálvalangaskavuođa dieđut
Bargu álggášii soahpamuša mielde jagi 2025 áigge ja dat lea doaisttážii fámus. Plánejeaddji bargoáigi ja vejolaš oasseáigásašvuohta mearrašuvvá Oahpahus- ja kulturministeriija juolludan stáhtadoarjaga vuođul.
Doaimma deavdimis čuvvojuvvo guđa mánotbaji geahččalanáigi.
Musihkkaguovddáža doaibmabáiki lea Sámekulturguovddáš Sajosis, Anáris, muhto barggu lea vejolaš bargat muhtin muddui gáiddusin.
Ohccis vurdojuvvo
Seađusvuđot gelbbolašvuođagáibádussan lea heivvolaš skuvlejupmi ja sámegiela máhttu (ásahus 1727/95). Barggu ceavzilis dikšuma eaktun lea viiddes sámekultuvrra ja sámi musihkkaárbevieru dovdámuš, buorre hálddahuslaš doaimmaid dovdámuš, návccat hálddašit ollisvuođaid plánemis operatiivvalaš ollašuhttimii, buorit ovttasbargo- ja organiserendáiddut ja čielga čálalaš gulahallandáidu.
Balká
Bálká mearrašuvvá Sámedikki bálkávuogádaga gáibádusdási IV/II mielde (vuođđobálká ollesbargoáiggis 2998,97 euro/mb). Vuođđobálkká lassin máksojuvvojit 24 % sámeguovllu lassi, go bargá sámiid ruovttuguovllus ja ahkelasit, mat mearrašuvvet bargohárjánumi mielde.
Ohcan
Ohcamušskovi, ja friijahápmásaš eaktodáhtolaš ohcanreivve ja vejolaš ánsologahallama ja eará čuvvosiid galgá doaimmahit Sámedikki čállingoddái maŋimustá 25.10.2025 dán elektrovnnalaš ohcamušskovi bokte (rahpasa ođđa ruvttui): Ohcamušskovvi
Lassedieđuid doaimmas addá hálddahushoavda Pia Ruotsala-Kangasniemi, pia.ruotsala@samediggi.fi, tel. 040 726 2688
Sámedikki doibmii sáhttá oahpásmuvvat neahttačujuhusas www.samediggi.fi
Anáris 25.9.2025
Sámediggi
