Sámedikki čoahkkin 14.4. ordnejuvvo gáiddusoktavuođa bokte

Čoahkkináššin leat Sámedikki almmolašdoarjaga bušeahttaevttohus jahkái 2026, Sámedikki buhtadusnjuolggadusa dárkkisteapmi ja ovddasdeaddji nammadeapmi Lappi buresveadjinguovllu sámegiela lávdegoddái. Dan lassin dievasčoahkkin geavvá sáttaságastallama lávvaráhkadeamis ja eanageavahanprošeavttaid sámiid kultuvrii dagahan váikkuhusaid árvvoštallama ovddideamis ja gullá Erva Niittyvuopio ja Mari Valjakka áššedovdin Sámit kirkus -prošeavtta loahpparaportta oktavuođas. 

Sámedikki čoahkkin mearridii jagi 2025 doaibmaplána oktavuođas ekonomiija seastindoaimmain. Seastindoaimmat gusket vuoigatvuođaministeriija Sámediggái mieđihan almmolašdoarjaga, mainna ruhtaduvvojit almmolaš-, bargoveahka- ja ekonomiijahálddahus, mearrádusbargan ja politihkalaš doaibma. Seastindoaimmaid ekonomalaš váikkuhus lea buohkanassii Sámedikki oasil 193 000. 

Čuovo čoahkkima Zoom-gáiddusoktavuođa bokte 

Beasat čuovvut Sámedikki čoahkkima Zoom-webinár bokte. It dárbbaš sierra applikašuvnna, muhto sáhtát čuovvut čoahkkima neahttabláđejeaddji bokte. Sáhtát goittotge jos háliidat luđet applikašuvnna Zoom siidduin. Čoahkkimis lea tulkon davvisámegillii, anárašgillii, nuortalašgillii ja suomagillii. 

• Webinár liŋka: https://us06web.zoom.us/j/82766639361  

• Čoahkkima 2/2025 áššelistu gávdno dokumeantabáŋkkus 

Lassidieđut: 

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi  

Pia Ruotsala-Kangasniemi
Hálddahushoavda
040 726 2688
pia.ruotsala@samediggi.fi