Tuomas Aslak Juuso EMRIP-čoahkkimis Geneves: sámediggelága ođasmahttin ja eamiálbmogiid oassálastinvuoigatvuođa nannen ovddidit olmmošvuoigatvuođaid ollašuvvama
Sámedikki II várreságadoalli Tuomas Aslak Juuso oassálasttii suoidnemánu 13.-17. beaivve Geneves ordnejuvvon Ovttastuvvan Našuvnnaid eamiálbmogiid vuoigatvuođaid áššedovdimekanismma (EMRIP) jahkásaš čoahkkimii. Sámediggi giittii sáhkavuoruinis EMRIPa doarjagis sámediggelága ođasmahttimis.
- EMRIPa doarjja Sámediggái leamašan dehálaš láhkaođastusa iešguđet muttuin. Dan áššedovdámuš lea nannen áddejumi ON:id eamiálbmogiid vuoigatvuođaid julggaštusas ja dan heiveheamis. Sámediggelága ođasmahttin lea dehálaš lávki sámiid iešmearrideami nannemis Suomas, lohká Juuso
Juuso dehálamos dearvvuođat čoahkkimii ledje dat ahte eamiálbmogiid oassálastinvuoigatvuođa ON:id barggus galgá ain nannet. Oassálastinvuoigatvuođa hárrái leat juksan bohtosiid, muhto bargu joatkašuvvá ain.
- ON lea jo váldán dehálaš lávkkiid eamiálbmogiid oassálastinvuoigatvuođaid nannema ovdii. Dál lea dehálaš joatkit barggu ja ráđđádallagoahtit das, mo eamiálbmogiid iežas ovddastanorgánaide sáhttit sihkkarastit bistevaš ja čielga vejolašvuođaid oassálastit ON:id olmmošvuoigatvuođaráđi bargui. Oassálastin galgá vuođđuduvvat dasa, ahte eamiálbmogat sáhttet leat mielde iežaset, ieš válljen ovddasteaddjiid bokte, Juuso deattuha sáhkavuorustis.
EMRIP lea ON:id olmmošvuoigatvuođaráđi áššedovdiorgána, mii doarju stáhtaid ja eamiálbmogiid ON:id eamiálbmotjulggaštusa čađaheamis. Sámedikki mielas lea dehálaš joatkit ságastallama ja ovttasbarggu EMRIPiin.
Tuomas Aslak Juuso
II várreságadoalli
Sámediggi
