Sámediggi oassálasttii riikkabeivviid čohkkánbaji 2026 rahpandoaluide – Dásseválddi presideanta buvttii iežas sáhkavuorus ovdan sápmelaččaid
Sámedikki stivrra lahttu Inka Musta oassálasttii odne guovvamánu 4. beaivve riikkabeivviid čohkkánbaji rahpandoaluide, mat ordnejuvvojedje Helssega duopmokirkus ja Riikabeaivedálus.
Govva: Sámedikki lahttu Inka Musta riikkabeivviid čohkkánbaji rahpandoaluin. Markku Ulander/ Lehtikuva.
Dásseválddi presideanta Alexander Stubb čujuhii iežas rahpansáhkavuorus sápmelaččaide ja ovdanbuvttii temáid, mat gusket sápmelaččaid. Sáhkavuorustis son hálai čuovvovaš áššiin:
“Okta dehálaš mearrádus lei sámediggelága ođasmahttin. Sámit leat Suoma áidna eamiálbmot. Dat, mo mii láhttet sin vuostá, muitala makkár servodat ja demokratiija mii leat.
Sámiid duohtavuohta- ja soabadankommišuvdna almmustahtii iežas raportta juovlamánus. Ávžžuhan váldit kommišuvnna barggu duođas – ja joatkit soabadeami, nuppiideamet gudnejahttima ja ovttasbarggu.”
– Mii atnit árvvus dan, ahte dásseválddi presideanta ovdanbuvttii sápmelaččaid iežas riikkabeivviid čohkkánbaji rahpansáhkavuorus. Sápmelaččaid vuhtiiváldin suopmelaš servodaga oassin ja dan mearrádusbargama váibmosis lea dehálaš dieđáhus sihke sámeservošii ja min mearrideaddjiide. Mii giitit presideantta dán ovddas ja iežamet oasil mii háliidat ovddidit buorredáhtolaš gulahallama riikkabeivviid, stáhta ja sápmelaččaid gaskkas, dadjá Sámedikki stivrra lahttu Inka Musta.
Dásseválddi presideanta dearvvahii rahpandoaluin riikkabeivviid ja almmuhii ahte riikkabeivviid čohkkánbadji rahppojuvvo. Dásseválddi presideantta sáhkavuoru sáhttá lohkat ollislaččat dáppe.
Sámedikki stivra ja virgegoddi deaivvadedje dásseválddi presideanttain mannan vahkus 29.1. Presideantta šloahtas Helssegis. Deaivvadeapmi lei goalmmát presideanta Stubb bajis.
Lassedieđut:
Inka Musta
Sámedikki stivrra lahttu
040 634 9900
Johanna Alatorvinen
Dieđihančalli
040 663 4493
johanna.alatorvinen@samediggi.fi
