Sámediggi deaivvadii Renew Europe -joavkku europarlamentarihkkáriiguin
Sámediggi deaivvadii Eurohpa parlameantta Ođasmuvvi Eurohpa -joavkku (eaŋgalasgillii Renew Europe) ovddasteaddjiiguin Suoločielggis njukčamánu 27. beaivve oassin joavkku Suomas galledeami. Deaivvadeapmái Sámedikkis oassálaste ságajođiheaddji Pirita Näkkäläjärvi, stivrra lahttu Asko Länsman, lahttu Leena Niittyvuopio-Jämsä ja álbmogiidgaskasaš áššiid čálli Inka Saara Arttijeff.
Renew Europe -joavkku, Sámedikki ja RÁB Sápmi ovddasteaddjit Suoločielggis 27.3. Govva: Renew Europe.
Deaivvadeamis ságastallojuvvui áigeguovdilis gažaldagaid birra, mat gusket sámiid, erenomážit EU mearrádusbargama váikkuhusain sámiid vuoigatvuođaide, sámegielaide, luondduriggodagaide, árbevirolaš ealáhusaide ja dálkkádatnuppástussii vuogáiduvvamii. Ságastallamiin deattuhuvvojedje maiddái sámiid oassálastinvuoigatvuođat EU:s ja dárbu nannet njuolggo ságastallama EU-doaibmaorgánaid ja sámeinstitušuvnnaid gaskkas. Dasa lassin ságastallojuvvui dorvvolašvuođa ja ráhkkaneami birra, mat ledje Renew Europe -joavkku Suomas galledeami temát.
– Lea dehálaš, ahte eurohpalaš mearrideaddjit galledit Sámis ja oahpásmuvvet báikki alde sámiid eallinvuohkái, sámegielaide ja árbevirolaš ealáhusaide, dadjá Sámedikki ságajođiheaddji Pirita Näkkäläjärvi.
Sámediggi ovdanbuvttii, ahte vaikko EU njuolggadusaid stivremis ja ruhtadanreaidduin leat mearkkašahtti váikkuhusat sámiid ruovttuguvlui, sámiin eai dál leat doarvái vejolašvuođat oassálastit EU mearrádusbargamii áššiin, mat gusket sin.
– Eu-áššit gullet Sámedikki dálá baji váldomihttomeriide. EU váikkuha sámiid árgii, muhto Sámediggi ii beasa váikkuhit EU mearrádusbargamii, vaikko sámit leat EU guovllu áidna eamiálbmot. Dán mii geahččalit nuppástahttit, Näkkäläjärvi gávnnaha.
– Sámediggi atná dehálažžan, ahte EU-mearrideaddjiid galledeamit Sámis joatkašuvvet ja ahte ságastallan ovddiduvvo mearrediđolaččat, joatká Näkkäläjärvi.
Ságastallamiin gieđahallojuvvojedje maiddái konkrehta vuogit nannet sámiid sajádaga EU:s, dego ovttasbarggu nannen Eurohpa parlameanttain ja bissovaččat oassálastinmekanismmaid ovddideapmi.
Eurohpa parlameantta lahttu Anna-Maja Henriksson deattuhii ságastallama mearkkašumi.
– Lea dehálaš, ahte EU:s gullat sámiid sin iežaset vuolggasajiin ja nannet ovttasbarggu Sámedikkiin. Lean erenomáš ilolaš das, ahte historjjálaš stuorra, badjel 20 europarlamentarihkkára delegašuvdnamet galledii Davvi-Suomas ja deaivvadii Sámedikki ovttasteaddjiiguin.
– Lean bargan diđolaččat dan ovdii, ahte sámiid jietna gullošii garrasabbot maiddái Brusselis. Min ságastallan váikkuhii ollu mu kollegaide, ja máŋgasat ožžo dáppe mielde čiekŋalut ipmárdusa go ovdal sámiid eallindiliin ja dain hástalusain, maid sámit deivet otná beaivve, joatká Henriksson.
Suomas Renew Europe -jovkui gullet Suoma ruoŧŧelaš álbmotbellodat (RÁB) ja Suoma Guovddášbellodat. Eurohpa parlameantta suopmelaš lahtuin jovkui gullet Anna-Maja Henriksson (RKP), Katri Kulmuni (Guovddášbellodat) ja Elsi Katainen (Guovddášbellodat), geat ledje buohkat mielde galledeamis.
Lassedieđut:
Inka-Saara Arttijeff
Álbmogiidgaskasaš áššiid čálli
050 5747629
inka-saara.arttijeff@samediggi.fi
