Sämitigge addel vuossâmuu tove muštâlus ovdâskoodán – ”Muštâlus lii ovdâmerkkâ uđâsmittum sämitiggelaavâ ovdánemlaavhijn”
Uđâsmittum sämitiggelaavâ mield Sämitigge tooimât jyehi ive muštâlus ovdâskoodán. Ovdil muštâlus adelui staatârááđán ige tot annaam sistees lahâaasâtlijd iävtuttâsâid sämmilij vuoigâdvuođâi turvim várás.
Sämitigge tuhhiittij čuákkimstis 2/2026 oovtâmielâlávt muštâlus ivveest 2025. Sämitige muštâlus ana sistees iävtuttâsâi lasseen čielgiittâs sämmilij kielân já kulttuurân kyeskee jiešhaldâšem, vuáđu- já olmoošvuoigâdvuođâi já eellimtile ovdánmist muštâlusive.
Sämitigge tuálá tieđettemtilálâšvuođâ Sämitige muštâlusâst ovdâskoodán já ton merhâšuumeest tuorâstuv 4.6. tme 14.00 Sajosist Anarist sehe nettivuolgâttâssân. Tilálâšvuotân uásálisteh Sämitige saavâjođetteijee Pirita Näkkäläjärvi, 1. värisaavâjođetteijee Leo Aiko já 2. värisaavâjođetteijee Tuomas Aslak Juuso. Lasseen muštâlus merhâšume kommentist tilálâšvuođâst totkeetuáhtár Saara Alakorva (Suomâ Akatemia ruttâdem tutkâmuš njunošohtâdâh MULTIBEING, Laapi ollâopâttâh).
Muštâlus lasseet ovdâskode tiäđu sämmilijn
Muštâlus ulmen lii ovdediđ sämmilij algâaalmugvuoigâdvuođâi olášuttem čuávvum, nanodiđ ovdâskode njuolgâ vuáruvaikuttâs Sämitiggijn já lasettiđ vijđásub tiäđulâšvuođâ sämmilij tuođâlii tiileest Suomâst.
Ovdâmeerhah ovdedemiävtuttâsâin láá eereeb iärrás virgeomâhái škovlim uđâsmittum sämitiggelaavâ oovtâsttoimâm- já ráđádâllâmkenigâsvuođâst, sämmilij ärbivuáválij iäláttâsâi šoŋŋâdâhnubástus vuáhádumeohjelm já vuáhádumetooimâi ruttâdem sehe rävisulmui sämikielâuápui luuhâm máhđulâžžân toohâm jo-uv rävisolmooštorjuin tâi västideijee ruttâdmijn.
– Muštâlus já tast leijee ovdedemiävtuttâsâi adelem njuolgist ovdâskoodán lii merhâšittee uđâsmittem, tastko muštâlus mield tiätu sämmilij sajattuvâst já sämmilâšohtsâškode ovdedemtáárbuin lassaan väldikode alemuu tääsist. Muštâlus lii ovdâmerkkân uđđâ sämitiggelaavâ puáhtám ovdánemlaavhijn sämmilij aašijn, iätá Sämitige saavâjođetteijee Pirita Näkkäläjärvi.
Sämitiggelaavâ uđâsmittem naanood Sämitige sajattuv, mutâ olášuttem lii eskân algâmuddoost
Muštâluš mield muštâlusive merhâšitteemus tábáhtus lâi uđâsmittum sämitiggelaavâ vuáimánšoddâm 1.8.2025. Laahâ nanodij Sämitige sajattuv sämmilij ovdâstuslâžžân jiešhaldâšemorgaanin já tärkkilistij virgeomâhái ráđádâllâm- já oovtâsttoimâkenigâsvuođâid. Laavâ olášuttem lii kuittâg eskân algâmuddoost.
– Lahâaasâtlii ovdánemläävhist peerusthánnáá muštâlus čáittá, ete jiešhaldâšem tuođâliih iävtuh iä vala olášuu oleslâžžân. Kuávdášlijd hástusijd tovâtteh rááhtuslávt liijkás uccâ resursistem, ráđádâllâmvuovij mulsâšuvvee vaigutteijeevuotâ sehe virgeomâháin vááijuvlâš systemaatlâš vaikuttâsâi árvuštâllâm, iätá I värisaavâjođetteijee Leo Aikio.
Muštâlusâst pahuduvvoo, ete ovdâskoddeest lii vuáđulavâlâš ovdâsvástádâs huolâttiđ tast, ete vuáđulaavâst já aalmugijkoskâsijn olmoošvuoigâdvuotâsopâmušâin turvâstum sämmilij vuoigâdvuođah olášuveh meid keevâtlii elimist. Taat váátá muštâlus mield lahâasâttem olášuttem aktiivlii čuávvum, tuárvi pyereh já muuneeld tiäđust leijee resurseh sehe sämmilij jiešhaldâšem systemaatlii kunnijâttem puoh almos miärádâstohâmist.
Sämitigge tuáivu vijđes ovdâskoddekieđâvuššâm muštâlusâst
Uđâsmittum sämitiggelaavâ miäldásâš vijđedum muštâlus adeluvvoo jyehi ive njuolgist ovdâskoodán.
Muštâlus tooimâtmân ij lah eidusâš meriäigi já ton vuolgâttemsavâstâllâm viggeh orniđ nuuvt jotelávt ko máhđulâš tast maŋa ko muštâlus lii puáttám ovdâskoodán. Lii máhđulâš, ete muštâlus kieđâvuššoo vuáđulahâváljukoddeest. Ääši kieđâvuššee váljukodde selvân vuolgâttemsavâstâlmist sahâalmairääđi iävtuttâs vuáđuld.
– Mij tuáivup, ete ovdâskoddeest ličij máhđulâšvuotâ uápásmuđ muštâlusân vuáđulávt já savâstâllâđ vijđáht tiäđuin já iävtuttâsâin, moh tobbeen láá, iätá Sämitige II värisaavâjođetteijee Tuomas Aslak Juuso.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
Leo Aikio
I värisaavâjođetteijee
040 621 6505
leo.aikio@samediggi.fi
Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi
