Sääʹmteʹǧǧ oudd vuõssmõs vuâra čiõlǥtõõzz eeʹttiǩ-kådda – ”Čiõlǥtõs lij ouddmiârkk oođuum sääʹmteʹǧǧlääʹjj ouddnemlaauʹǩin”
Oođuum sääʹmteʹǧǧlääʹjj meâldlânji Sääʹmteʹǧǧ tååimat piiri-iiʹjji čiõlǥtõõzz eeʹttiǩ-kådda. Ooudbeäʹlnn čiõlǥtõõzz uʹvddeš riikksuåvtõʹsse ij-ǥa tõt âânnam seʹst lääʹjjmeâldlânji eʹtǩǩõõzzid säʹmmlai vuõiggâdvuõđi tuõrvvmõššân.
Sääʹmteʹǧǧ priimi såbbreʹstes 2/2026 õõutmiõʹlle čiõlǥtõõzz eeʹjjest 2025. Sääʹmteeʹǧǧ čiõlǥtõs âânn seʹst eʹtǩǩõõzz lââʹssen čiõlǥtõõzz säʹmmlai ǩiõl da kulttuur kuõskki jiõččvaaldâšm, vuâđđ- da ooumažvuõiggâdvuõđi di jieʹllemåårrmõõžži ouddnummšest čiõlǥtõseeʹǩǩen.
Sääʹmteʹǧǧ âânn teâđtõspoodd Sääʹmteeʹǧǧ čiõlǥtõõzzâst eeʹttiǩ-kådda da tõn miârktõõzzâst neljdpeeiʹv 4.6. čiâss 14.00 Sajoozzâst, Aanrest di neʹttvuõlttõssân. Poʹdde vuässâʹtte Sääʹmteeʹǧǧ saaǥǥjååʹđteeʹjj Pirita Näkkäläjärvi, I väärrsaaǥǥjååʹđteeʹjj Leo Aikio da 2. väärrsaaǥǥjååʹđteeʹjj Tuomas Aslak Juuso, Lââʹssen čiõlǥtõõzz miârktõõzz kommentâstt pooddâst tuʹtǩǩeeʹjjtohttor Saara Alakorva (Lääʹdd Akatemia teäggtem tuʹtǩǩummuž njoonašjuâǥǥas MULTIBEING, Lappi universiteʹtt).
Čiõlǥtõs lââʹzzat eeʹttiǩ-kååʹdd teâđ säʹmmlain
Čiõlǥtõõzz täävtõssân lij oouʹdeed säʹmmlai alggmeervuõiggâdvuõđi tiuʹddepiijjmõõžž vuåppmõõžž, raavad eeʹttiǩ-kååʹdd vuõigg vuârrvaaiktõõzz Sääʹmtiiʹǧǧin da lââʹzzteʹči vaiddsab tieʹttemvuõđ säʹmmlai tuõttääʹššlaž vueʹjjest Lääʹddjânnmest.
Ouddmiârk oouʹdeemeʹtǩǩõõzzin liâ jeäʹrbi mieʹldd veʹrǧǧniiʹǩǩi škooultummuš oođuum sääʹmteʹǧǧlääʹjj õhttsažtåimmam- da saǥstõõllâmõõlǥtõõzzâst, säʹmmlai äʹrbbvuõđlaž jieʹllemvuõʹjji äimmõsmuttâz šiõttlõõvvâmprogramm da šiõttlõõvvâmtååimai teäggtõs di rääʹves oummui sääʹmǩiõli mättʼtõõttmõõžž vueiʹtlvâsttmõš juʹna rääʹves oummui škooultemtuärjjõõzzin leʹbe vaʹstteei teäggtõõzzin.
– Čiõlǥtõõzz da tõn seʹst ââʹnnem ouddnemeʹtǩǩõõzzi ouddmõš vuõiʹǧǧest eeʹttiǩ-kådda lij miârkteei oođõs, ǥu čiõlǥtõõzz mieʹtt teâtt säʹmmlai sââʹjest da sääʹmõhttsažkååʹdd oouʹdeemtaarbin lâssan väʹlddkååʹdd pââimõs tääʹzzest. Čiõlǥtõs lij ouddmiârkk ođđ sääʹmteʹǧǧlääʹjj mieʹldd puʹhttem ouddnemlaauʹǩin säʹmmlai aaʹššin, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Sääʹmteʹǧǧlääʹjj oođummuš raavad Sääʹmteeʹǧǧ sââʹj, leša čõõđ viikkmõš lij eman alggtuâj vueʹlnn
Čiõlǥtõõzz mieʹldd čiõlǥtõseeʹjj pukin miârkteei šõddmõš leäi oođuum sääʹmteʹǧǧlääʹjj viõʹǩǩešõddmõš 1.8.2025. Lääʹǩǩ raavii Sääʹmteeʹǧǧ sââʹj säʹmmlai eeʹttkâsttmallaž jiõččvaaldšemorgaanân da tääʹrǩsmõʹtti veʹrǧǧniiʹǩǩi saǥstõõllâm‑ da õhttsažtåimmamõõlǥtõõzzid. Lääʹjj čõõđ viikkmõš lij kuuitâǥ eman alggtuâj vueʹlnn.
– Lääʹjjšiõtlvaž ouddnemlääuʹǩest huõlǩani čiõlǥtõs čuäʹjat, što jiõččvaaldâšm tuõttvueʹǩǩšõs õõudldõõzz jiâ veâl tiuddu tiuddmeärrsânji. Kõskksa vaʹǯǯtõõzzid tuejjee raajõõzzlaž vueʹllresursâsttmõš, saǥstõõllâmvuõʹjji vaajtõõlli vaaiktemvuõtt di veʹrǧǧniiʹǩǩin väjja åårrai jäʹrjsteelmlaž vaaiktõõzzi ärvvtõõllmõš. särnn I väärrsaaǥǥjååʹđteeʹjj Leo Aikio.
Čiõlǥtõõzzâst tuõđât, što eeʹttiǩ-kååʹddest lij riikkvuâkkõsnallšem vasttõs ââʹnned huõl tõʹst, što vuâđđlääʹjjest da meeraikõskksaž ooumažvuõiggâdvuõttsuåppmõõžžin tuõrvvum säʹmmlai vuõiggâdvuõđ teâuddje še vueʹjjest. Tät õõlǥat čiõlǥtõõzz mieʹldd lääʹjjšiõttummuž tiuʹddepiijjmõõžž aktiivlaž seuʹrrjummuž, riʹjttjeei da õudlkõʹstti resuursid di säʹmmlai jiõččvaaldâšm tuʹmmjem-meâldlaž ciʹsttjummuž juõʹǩǩ õõlmâs tuʹmmstõktuâjast.
Sääʹmteʹǧǧ tuäivv veiddsõs eeʹttiǩ-kåʹddǩiõttʼtõõllmõõžž čiõlǥtõõzzâst
Oođuum sääʹmteʹǧǧlääʹjj meâldlaž veeiduum čiõlǥtõs uuʹdet piiri-iiʹjji vuõiʹǧǧest eeʹttiǩ-kådda.
Čiõlǥtõõzz tååimtummša jiâ leäkku suåppum mieʹrrääiʹj da tõn vuõlttõs-saǥstõõllmõš ǩiččlõõđât jäʹrjstet vueiʹtlva sõrgg čiõlǥtõõzz puäʹđeen eeʹttiǩ-kådda. Čiõlǥtõõzz vueiʹtet ǩiõttʼtõõllâd vuâđđlääʹǩǩvälljkååʹddest. Ääʹšš ǩiõttʼtõõlli välljkåʹdd seʹlvvan vuõlttõs-saǥstõõllmõõžžâst saakkooumažsuåvtõõzz eʹtǩǩõõzz vuâđald.
– Tuäivvap, što eeʹttiǩ-kååʹddest lij vueiʹtlvažvuõtt tobdstõõttâd čiõlǥtõʹsse vuâđai mieʹldd da saǥstõõllâd tõn seʹst ââʹnnem teâđain da eʹtǩǩõõzzin vaiddsânji, särnn Sääʹmteeʹǧǧ II väärrsaaǥǥjååʹđteeʹjj Tuomas Aslak Juuso.
Lââʹssteâđaid oudd:
Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi
Leo Aikio
I väärrsaaǥǥjååʹđteeʹjj
040 621 6505
leo.aikio@samediggi.fi
Tuomas Aslak Juuso
II väärrsaaǥǥjååʹđteeʹjj
040 687 3394
tuomas.juuso@samediggi.fi
