Sámediggi ja Lappi buresveadjinguovlu ságastalle sámegielat ja kulturmieldásaš sode-bálvalusaid birra jahkásaš ráđđádallamiin
Sámedikki ja Lappi buresveadjinguovllu áirasat deaivvadedje Roavvenjárggas 9.6.2026 jahkásaš ráđđádallamiin. Lappi buresveadjinguovllu hálddahusnjuolggadusa mielde buresveadjinguovlu ráđđádallá Sámedikkiin jahkásaččat buresveadjinguovllu sámegielat ja kulturmieldásaš bálvalusaid lágideamis, ovddideamis ja bálvalusaid guoskevaš ovttasbarggus, ulbmiliin ja bargojuogus.
Dán jagáš ráđđádallamiin gieđahalle earret eará sámegielat bálvalusaid ovddideami deaddočuoggáid jagi 2027 várás, buresveadjinguovllu ekonomiija heivehandoaibmabijuid dili nugo maiddái ovttasdoaibman- ja ráđđádallanproseassa ovddideami.
– Buorre ja rievttes áiggi ovttasbargu nu válmmaštallamis go maiddái mearrádusdahkamis lea guovddážis, vai mii sáhttit dorvvastit sámegielat ja kulturmieldásaš bálvalusaid ovttaveardásaččat. Rabas gulahallan veahkeha maid nanosmahttit luohttámuša ja reageret nuppástusaide doarvái árrat, dadjá Sámedikki II várreságadoalli Tuomas Aslak Juuso.
Jahkásaš ráđđádallamiin gieđahallojuvvojedje maiddái oktasaš ovdogoziheami guoskevaš ulbmilat. Nu Sámediggi go Lappi buresveadjinguovluge deattuhit, ahte bálvalusaid gillilis ovddideapmi gáibida doaimmaid maid stáhtadásis, eandalii vai sámegielat bálvalusaid ruhtadeapmi nannejuvvošii ja bargiid oažžun buorránivččii.
– Lappi buresveadjinguovllu lágas mearriduvvon bargu lea doarjut sámegielat sosiála- ja dearvvasvuođafuolahusa bálvalusaid ovddideami olles Suomas. Gokčevaš ja stáđis ruhtadeapmi dán barggu ollašuhttimii lea dehálaš oktasaš ovdogozihanulbmil, dadjá buresveadjinguovlojođiheaddji Jari Jokela.
Lappi buresveadjinguovllus ráđđádallamiidda oassálaste buresveadjinguovlojođiheaddji Jari Jokela, gádjunjođiheaddji Markus Aarto, doarjjabálvalusaid doaibmasuorgejođiheaddji Mikko Häikiö, sosiála- ja dearvvašvuođabálvalusaid doaibmasuorgejođiheaddji Miia Palo, sodeguovddášbálvalusaid vástoguovlojođiheaddji Antti Alaräisänen, sámegielat ja kulturmieldásaš bálvalusaid vásttoovttadatjođiheaddji Tuuli Miettunen ja sámegielat ja kulturmieldásaš bálvalusaid bálvalanhoavda Kati Mikkola. Sámedikki áirasat ráđđádallamiin ledje II várreságadoalli Tuomas Aslak Juuso, sosiála- ja dearvvašvuođalávdegotti várreságadoalli Ulla Maarit magga, sadjásaš sosiála- ja dearvvašvuođaáššiid spesiálaáššedovdi Anni Koivisto ja II várreságadoalli spesiálaveahkki Minna Näkkäläjärvi.
Lassedieđut:
Tuomas Aslak Juuso
II várreságadoalli
+358 40 687 3394
Jari Jokela
buresveadjinguovlojođiheaddji
+358 40 532 3998
jari.jokela@lapha.fi
