Sámediggi sávvá lihku duohtavuohta- ja soabadankomišuvnna komissáraide dieđualmmustahttima stáhtabálkkašumis

Sámiid duohtavuohta- ja soabadankomišuvnna komissárat ožžo dieđualmmustahttima stáhtabálkkašumi 2026. Bálkkašupmi mieđihuvvui váttes historjjálaš vásáhusaid ovdanbuktimis servodatlaš ipmárdusa lasiheami várás ja ságastallama ovddideami várás.

Dieđa- ja kulturminister Mari-Leena Talvitie jugii bálkkašumi 8.6.2026 Oulus komissáraide dahjege riektediehtaga doavttir Hannele Pokkai, hálddahusdiehtagiid magisttar Irja Jefremoffii, earkebisma emeritus, teologiija doavttir Kari Mäkisii, universitehtalektor emerita, servodatdiehtagiid doavttir Anni-Siiri Länsmanii ja boazodoalli ja fitnodatdoalli Heikki Palttoi.

– Sámediggi sávvá lihku váimmolaččat duohtavuohta- ja soabadankomišuvnna komissáraide mearkkašahtti dovddastusa ovddas. Dovddastus lea giittus maiddái daidda 400 sápmelažžii, geat juogadedje iežaset muitalusaid komišuvnnain ja geaid vásáhusat ledje vuođđun duohtavuohta- ja soabadankomišuvnna viiddes raportii, dadjá Sámedikki ságajođiheaddji Pirita Näkkäläjärvi.

Vuođuštusain gávnnahuvvo, ahte Sámiid duohtavuohta- ja soabadankomišuvnna barggus ovdanbukton diehtu čuohcá sihke mearrádusbargamii ja almmolaš ságastallamii ja kultuvrii. Suoma stáhta lea huksejuvvon suopmelaččaid ja sápmelaččaid eatnamiidda, muhto sápmelaččaid vásáhusat leat guhká báhcán priváhtan. Doaibmi ja vuoiggalaš servodaga eaktun lea nákca deaivat iežas historjjá bávččagahtti áššiid. Dát gáibida, ahte váttes ja bávččas vásáhusat buktojit oidnosii ja gieđahallojit. Dušše ná huksejuvvo vuođđu boahttevaš bargui ja servodatlaš čavddásmuvvamii.

Soabadeami huksen lea mearrediđolaš bargu

Stáhtabálkkašumi vuođuštusain gávnnahuvvo maiddái, ahte Sámiid duohtavuohta- ja soabadankomišuvnna bargu nanne dieđu bokte eavttuid sápmelašvuođa boahtteáiggi huksemii Suomas.

Sámediggi doarju dán jurdaga. Soabadeami huksen lea mearrediđolaš bargu buori ovttasbarggus.

– Duohtavuohta- ja soabadankomišuvdnabargu lea midjiide stuorra vejolašvuohta. Duohtavuohta- ja soabadankomišuvnna evttohusaid vuođul lea vejolaš ollašuhttit duođalaš nuppástusa ja ođđa álgguid sámeáššiin Suomas. Sámedikkis leat alla vuordámušat joatkkabarggu ektui, dadjá ságajođiheaddji Näkkäläjärvi.

Duohtavuohta- ja soabadankomišuvdna evttohii iežas loahpparaporttas 68 doaibmabidjoevttohusa. Evttohusaid duogážis lea komišuvnna ožžon ipmárdus politihkalaš linnjemiin ja doaibmabijuin, maid sámiid buorre boahtteáigi eaktuda.

Sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavku lea álggahan barggustis. Váldočállin lea ovddeš oaiveministtar Antti Rinne. Parlamentáralaš bargojoavkku barggu doarju Sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavkku koordineren- ja čuovvunjoavku, mas leat ovddastuvvon maiddái Sámediggi ja Nuortalaččaid siidačoahkkin.

Sámediggi mearridii čoahkkimisttis 26.2.2026 iežas oaiviliid doaibmabidjoevttohusaide. Buot doaibmabijuid oidne doarjunvearan, muhto lassin Sámediggi čohkkii guovddáš hohpolaš doaibmabijuid guvttiin lasáhusain.

Stáhtaráđđi ásahii Sámiid duohtavuohta- ja soabadankomišuvnna ovttasráđiid Sámedikkiin ja nuortalaččaid siidačoahkkimiin 28.10.2021.

Lassidieđut:

Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi