Sámenuoraid konferánssa resolušuvdna: “Mis lea riekti boahtteáigái ja dat galgá leat min lágan”
“Mii sámenuorat háliidit ja leat beroštuvvan oahppat sámegiela ja sirdit dan čuovvovaš sohkabuolvvaide ja doalahit árbedieđu. Ná sámekultuvra seailu ealli kultuvran. Árbediehtu ii leat juoga maid mii geahččat olggobealde, dat gullá midjiide sámiide ja lea lunddolaš oassi mis.”
Resolušuvdna geigejuvvui sámenuoraid konferánssas Sámediggái ja dan vuostáiválddii Sámedikki ságajođiheaddji sadjásaš Tuomas Aslak Juuso. Govva: Ville Fofonoff / nuoraidráđđi.
Sámenuoraid resolušuvdna čalmmustahttá oahppaplánaid, oahppamateriála ja skuvlejumi mearkkašumi árbedieđu nannemis sámenuoraid eallimis.
Resolušuvnnas gávnnahuvvo, ahte sámenuorat ánssášit ja dárbbašit historjjá oahpahusa sámi geahččanguovllus vugiin, mii guođđá stáhtaid rájiid duogábeallái ja gieđahallá sápmelaččaid álbmogin ja iežaset historjjálaš narratiivva váldofiguvran.
– Sámenuoraide lea dehálaš, ahte sii sáhttet oahppat iežaset kultuvrra ja identitehta dáfus mávssolaš áššiid, dego iežaset giela ja sámiid historjjá. Resolušuvdna sisttisdoallá konferánsii oassálastán nuoraid jurdagiid das, maid árbediehtu ja dan doalaheapmi mearkkaša sidjiide. Mii sávvat, ahte Sámediggi joatká barggus ja dáistala boahttevaš sámesohkabuolvvaid boahtteáiggi beales, gávnnaha resolušuvnna ráhkadeapmái oassálastán nuoraidráđi várreságajođiheaddji Niila-Juhán Valkeapää.
Resolušuvdna geigejuvvui sámenuoraid konferánssas Sámediggái ja dan vuostáiválddii Sámedikki ságajođiheaddji sadjásaš Tuomas Aslak Juuso.
– Sámenuorain lea earenoamáš rolla árbedieđu seailluheamis, ovddideames ja sirdimis ođđa sohkabuolvvaide. Lea dehálaš, ahte resolušuvnnas leat konkrehtalaš evttohusat, vai sáhttit Sámedikkis ovttas nuoraidráđiin suokkardit dárbbašlaš doaibmabijuid, dadjá Sámedikki ságajođiheaddji sadjásaš Tuomas Aslak Juuso.
Resolušuvnnas gávnnahuvvo, ahte dorvvastan dihte árbedieđu sirdašuvvama sohkabuolvvas nubbái, ferte čujuhit návccaid maid skuvlejupmái. Árbediehtu ii goittotge sirdašuva dušše luohkkálanjas sohkabuolvvas nubbái, muhto árbevirolaččat maid ruovttus. Mii nuorat bivdit, ahte boarrásit sohkabuolvvat, geain lea árbediehtu, hilgot baluideaset iežaset diehtodási ja máhtu váilliin ja juogadit árbedieđuideaset minguin.
Resolušuvnnas evttohuvvo, ahte ahte sámenuoraide lágiduvvojit jeavddalaš “arenat” čoahkkanit ja nanosmahttit searvvušlašvuođa. Dasa lassin gielaid oahpahusas galggašii sihkkarastit doarvái stuorra mearreruđaid ođđa oahppamateriálaide.
Resolušuvnna sáhttá lohkat: Konferánsa resolušuvdna
Sámenuoraid konferánsa lágiduvvui Anáris 14.-15.8.2025. Resolušuvdna lea ráhkaduvvon konferánssa resolušuvdnabargobájis. Konferánssa prográmmas ledje ee. sáhkavuorut Sámedikki sadjásašságajođiheaddjis Tuomas Aslak Juusos, nuoraidráđi várreságajođiheaddji Niila-Juhán Valkeapääs, musihkkapedagoga ja juoigi Laura Tapiolas ja filbmadearvvahus lihkadan-, valáštallan-, ja nuoraidministtar Mika Poutalas. Prográmmas ledje sáhkavuoruid lassin searvadeaddji bargobájit. Konferánssa fáddán lea árbevirolaš diehtu ja dan váldolágideaddjin lei Sámedikki nuoraidráđđi.
Lassedieđut:
Nuoraidráđi konferánssa bargojoavkku ságadoalli,
nuoraidráđi várreságadoalli
Niila-Juhán Valkeapää
niila-juhan.valkeapaa(at)samediggi.fi
Tuomas Aslak Juuso
Sámedikki sadjásaš ságadoalli
040 687 3394
tuomas.juuso@samediggi.fi
Nuoraidráđi prošeaktabargi
Lifu Torikka
Tel. 044 902 4833
lifu.torikka@samediggi.fi
Nuoraidčálli
Elli-Marja Hetta
tel. 050 382 5179
elli-marja.hetta(at)samediggi.fi
Nuoraidráđi váldobargun lea ovddidit sámenuoraid gielalaš ja kultuvrralaš vuoigatvuođaid birra Suoma ja nannet sámenuoraid gullevašvuođa sámekultuvrii. Nuoraidráđđi válmmaštallá maiddái daid Sámedikki cealkámušaid, álgagiid ja eará bealiváldimiid, mat gusket sámenuoraid dahje sámenuoraid eallindiliid.
