Eana- ja meahccedoalloministeriijas ii doarjja boazojámuid ovddalgihtii eastadeapmái iige boazovahátlága heiveheapmái dán dálvvi oasil – oasis bálgosiin dilli lea erenoamáš váttis

Sámediggi ja eana- ja meahccedoalloministeriija ráđđádalle 18.2.2022 sámediggelága 9 §:a ráđđádallangeatnegasvuođa mielde dán dálvvi boazojámuid ovddalgihtii eastadeamis ja lága boazodoalu deaividan vahágiid buhtadeamis (boazovahátláhka) heiveheamis dán dálvvi spiehkastatdiliide. Ráđđádallamis ii gávdnon oktasaš čoavddus.

Sámediggi evttohii ráđđádallamis, ahte stáhta galggašii álggahit sihke ovddalgihtii eastadeaddji doaimmaid boazojámuid eastadeami dihte ja boazovahátlága ja -ásahusa mieldásaš meannudeami spiehkastatdiliid gávnnaheapmin dán dálvvi oasil. Eana- ja meahccedoalloministeriija ovdanbuvttii ráđđádallamis, ahte dat ii evttot boazovahátlága mieldásaš meannudeami álggaheami, iige dál leat guorahallamis ovdamávssuid bokte ekonomalaš doarjja boazojámuid ovddalgihtii eastadeapmái. Ministeriija mielde dálvvi diliid ii sáhte doallat spiehkastahkan, go arvemearit leat leamaš unnit.

– Mii leat hui behtton ráđđádallama loahppabohtosiidda ja dasa, ahte eana- ja meahccedoalloministeriija ii ádde boazodoalu erenoamáš váttis dili, vaikko das lea čielgasit sidjiide muitaluvvon, dadjá Sámedikki ságajođiheaddji Tuomas Aslak Juuso.

– Dás lea maiddái oassái gažaldat sámiid boazodoalu ja sámekultuvrra boahttevuođas. Juos eat oaččo doarjaga boazojámuid ovddalgihtii eastadeapmái ja boazovahátlága mieldásaš meannudeapmi ii álggahuvvo, sáhttá dát vearrámus dáhpáhusas mannat dasa, ahte buohkain ii leat šat vejolašvuohta joatkit ealáhusain, joatká Juuso.

Máŋggain sámiid ruovttuguovllu bálgosiin lea dál erenoamáš hástaleaddji dilli. Čakčat muhtii bievla eatnama ala, mii fas dagahii máŋggain báikkiin bohccuid borramuššan geavahan šattuid guohppuma. Muohta lea lassin dálvvi áigge jikŋon hui garasin, man dihte bohccuid guohtun lea máŋgga báikkis veadjemeahttun.

– Lean fuolas eana- ja meahccedoalloministeriija áššedovdamušas. Ministeriija čuovvu boazodoalu dili dušše arvemeriid vuođul. Dát dagaha dulkojumi, man mielde dilit eai leat spiehkastatláganat, iige vahát boazodollui livčče šaddan. Ministeriijas ii leat makkárge diehtu ovdamearkka dihte guohtuneatnamiid guohppumis dahje muohttaga čavgatvuođas ja danin galggašiige bivdit Luondduriggodatguovddáža čielggadit dili ja vahágiid eará guovlluin, dadjá nubbi várreságajođiheaddji Leo Aikio.

Sálleváre bálgosis heahti lea stuoris

Govva: Inga-Briitta Magga

Sálleváre bálgosa guovllus dálvi lea leamaš erenomáš váttis. Golggotmánu loahpas muhtii bievla eatnamii ja maŋŋá arvvii máŋga beaivvi, mii njuoskadii muohttaga eatnama rádjái. Dán dihte muohta lea jikŋon hui garasin eatnama rádjái. Olles bálgosa guovllus dušše vihtta proseantta lea leamaš anihahtti guohtuneana dálvvi áigge.

Sálleváre bálgosa boazoisit Iisko-Henrik Näkkäläjärvi lea hui fuolas boazoealáhusa dilis.  – Dás lea gažaldat eallimis ja jápmimis. Heahteveahki galggašii oažžut dallego heahti lea. Jos veahki ii oaččo, fertejit máŋggat boazodoallit heaitit ealáhusain dán dálvvi maŋŋá, dadjá Näkkäläjärvi.

Jo čakčat bohccuin oinnii dan, ahte guobbarat eai lean. Bohccot geavahit guobbariid borramuššan ja čogget buoiddi čuovvovaš dálvvi várás. Ovddit goavvedálvvis lea easkka guokte jagi áigi, eaige bohccot leat geargan ollásit vel fámosnuvvat.

– Čakčat njuovvanmearit ledje áibbas unnánaččat, de boazodoalliid boađut báhce heittogin. Dál máŋggat leat dán dilis, ahte galggašii bastit lassebiebmat, muhto ruhta ii leat. Mannan vahkus bigálusas vuorrasut boazodoallit ledje jierásmuvvan das, man fuones ortnegis bohccot leat dán muttos jagi, joatká Näkkäläjärvi.

Sálleváre bálggus lea Anára gieldda oarjjábealde. Stuorámus oassi bálgosis lea Leammi álbmotmeahcis ja Bátneduoddara meahcceguovllus. Bálgosa viidodat lea measta 3000 njealjehaskilomehtera.

Lassedieđut:

Tuomas Aslak juuso
Ságajođiheaddji
040 687 3394
tuomas.juuso@samediggi.fi

Leo Aikio
II várreságajođiheaddji
040 621 6505
leo.aikio@samediggi.fi

Iisko-Henrik Näkkäläjärvi
Sálleváre bálgosa boazoisit
040 481 7212


Juoge siiddu ovddosguvlui

Eará ođđasat