Guhká vurdojuvvon nuortalašgiela áppes almmustuvvan
Nuortalašgiela áppesgirjji “Jääkk-njaal AABBÂS” almmustahttindilálašvuohta lea Teamsis 16.12.2021 dmu 13.30 nuortalašgillii ja dmu 14.30 suomagillii.
Jääkk-njaal AABBÂS lea vuosttas luohká eatnigiela oahppagirji, mii láide smávva oahppi lohkama ja čállima máilbmái. Girji muitala Čeavetjávrris ássi 7-jahkásaš Jääkk-naalis. Suohtas ja ivdnás áppes lea movttiidahtti ja doarju máná bajásšaddama iežas gillii ja kultuvrii. Áppesa lea giehtačállán Tiina Sanila-Aikio, govain ja doadjinbarggus vástida Tanja Sanila. Áppesgirjji bargojovkui leat oassálastán Satu Moshnikoff, Seija Sivertsen, Hannu Kangasniemi ja Raija Lehtola.
Áppesgirjji almmustahttindilálašvuohta lea Teams-birrasis duorastaga 16.12.2021 diibmu 13.30 nuortalašgillii ja diibmu 14.30 suomagillii. Dilálašvuođain Tiina Sanila-Aikio muitala girjji sisdoaluin ja ráhkadeamis, ja suomagielat dilálašvuođas mielde maiddái sárgu Tanja Sanila. Muitalusaid lassin beassat oaidnit bihtáid girjji sisdoalus. Liggosit buresboahtin!
Liŋka Jääkk-njaal AABBÂS -girjji almmustahttindilálašvuhtii
Áppesis lea stuorra mearkkašupmi nuortalašgillii
Jääkk-njaal AABBÂS lea vuosttas ivnniiguin prentejuvvon nuortalašgiela áppesgirji ja dan gárváneapmi lea nuortalaš servošii mearkkašahtti ášši.
– Mii illudat sakka dán ođđa, fiinna áppesa almmustuvvamis. Dát lea máná vuosttas lávki nuortalašgielat skuvlabálgái. Áppes lea vuođđu čállindáiddu oahppamii ja skuvlamáná vuosttas iežas girji. Dál nuortalaš bearrašat ožžot fiinna bargoneavvu máná giela ovdáneapmái. Sávan maid, ahte girji ii báze dušše skuvlaatnui, muhto baicce maiddái váhnemat gávnnašedje girjji govaid ja máidnasa, dadjá Sámedikki skuvlen- ja oahppamateriálalávdegotti ságadoalli Tauno Ljetoff.
– Sávan, ahte mánát gávdnet oahpes áššiid áppesa sámebearrašis oktan gielain ja kultuvrrain. Sávan maiddái, ahte nu máŋggat mánát go vejolaš beasašedje oahppat min álbmoga dieđuid ja dáidduid iežaset bearraša ja servoša siste. Oamastan áppesa iežan niidii Elli-Dåʹmnnai ja iežan oahpaheaddjái Seija Sivertsenii, joatká girjji giehtačálli Tiina Sanila-Aikio.
– Govaid sárgun áppesii lea govvasárgui okta bargokarriera dehálamos bargguin. Dát projeakta báhcá munnje agibeaivái muitui. Dat, ahte oaččon sárgut mánáidasamet govaid iežamet kultuvrras, mearkkaša munnje ollu, muitala govvasárgu Tanja Sanila.
Maiddái Sámedikkis illudit áppesa gárváneamis.
– Áppes lea dávjá máná vuosttas konkrehtalaš vásáhus iežas eatnigielas čállojuvvon ja lohkkojuvvon hámis. Áiggedási ja movttiidahtti oahppamateriálat leat okta ovttaveardásaš skuvlema elemeanttain. Lea hui dehálaš, ahte nuortalašgielat mánáin lea viimmat vejolašvuohta oahpahallat iežaset giela áibba albma ja velába ná čáppa girjjis, lohká I várreságadoalli Anni Koivisto.
Áppesa sáhttá diŋgot Sámedikki skuvlen- ja oahppamateriáladoaimmahaga neahttagávppis.
Lassediehtu:
Tiina Sanila-Aikio
Giehtačálli
tiina(at)sanila.fi
Petra Kuuva
Oahppamateriálačálli
tel. +358406772275
petra.kuuva(at)samediggi.fi
