Mii mááccuh, mij sääʹmpihttâz, min gávttit – virtuála oahppodiimmut sámiid álbmotbeaivvi gudnin 8.–10.2.2022
Sámegielaid gáiddusoahpahusa pilohttafidnu ávvuda sámiid álbmotbeaivve 6.2. ja lágida virtuála oahppodiimmuid sámebiktasiid birra 8.–10.2.2022. Oahppodiimmut leat oktiibuot golbma, ja daid fáddán leat anáraš mááccuh, nuortalaš sääʹmpihttâz ja gákti. Oahppodiimmuid ulbmilin lea fállat dieđuid iešguđet guovllu sámiid biktasiid birra. Diimmuin ovdamearkka dihte čielgá, mat oasit bivttasollisvuhtii gullet, mat ivnnit leat mihtilmasat guđege biktasis ja mat áššit bohtet ovdan sámebiktasa geavaheaddjis, go geahčada mo son lea gárvodan.
Diimmuid beassá čuovvut njuolggorávdnjemin oassálastinliŋkkaid bokte dahje nu, ahte geahččá báddejuvvon oahppodiimmuid maŋŋelgihtii. Báttiid sáhttá geahččat 10.–24.2. čujuhusas https://www.saamenetaopetus.com/tapahtumat-ja-tallenteet. Oahppodiimmuid čuovvun lea nuvttá iige daidda dárbbaš almmuhit iežas ovddalgihtii. Diimmuin lea maiddái vejolašvuohta jearrat ja ságastit chattas.
Áigetávval
Disdat 8.2. dii 10–11
Gákti
Oahpaheaddjin Teija Kaartokallio
Oassálastinliŋka
Gaskavahkku 9.2. dii 10–11
Mááccuh
Oahpaheaddjin Essi Morottaja
Oassálastinliŋka
Duorastat 10.2. dii 15–16
Sääʹmpihttâz
Oahpaheaddjin Heini Wesslin
Oassálastinliŋka
Oahppodiimmuide leat bures boahtin buohkat, geat háliidit oahppat eanet iešguđet guovllu sámebiktasiid birra. Diimmuide sáhttá oassálastit iehčanassii dahje searvat luohkáin mielde oktasaš dihtoriin. Diimmut leat suomagillii, muhto dain oahpásnuvvat maiddái sámegielat bivttasnamahusaide.
Dárkilut rávvagat mo oassálastit diimmuide leat dáppe.
Bures boahtin! Pyeri puáttim! Tiõrv pueʹttem! Tervetuloa!
Lassedieđut:
Anni-Sofia Niittyvuopio, fidnohoavda
anni-sofia.niittyvuopio@edu.utsjoki.fi
040 701 2094
Arla Magga, fidnokoordináhtor
arla.magga@samediggi.fi
040 687 5989
Sámiid álbmotbeaivvi ávvudit juohke guovvamánu 6. beaivve. Ávvudeamit lágiduvvojit dalle dábálaččat ieguđege guovllus Sámi ja dál maiddái Sámi olggobealde.
Sáhtát oassálastit sámiid álbmobeaivvi ávvudeapmái maiddái ná:
- Čuovo Suoma Álbmotmusea virtuála dilálašvuođa bearjadaga 4.2. dii 9.15.
- Searvva sámiid álbmotbeaivvi njuolggodilálašvuhtii sotnabeaivve Sadjosis 6.2. dii 16.00
- Oahpásnuva Oktavuohta – saamelaistietoa opetukseen-siidduide. Siidduin gávdnojit fáddáoasit ja bargobihtát iešguđet skuvla- ja luohkkádássái.
- Diŋgo video-oahppodiimmuid sámefáttáid gieđahallamii skuvllas.
- Oahpásnuva sámefáttát mobiilaspealuide ja bargobihtáid sisttisdoalli gihppagii Nuoraid Akademiija siidduin.
- Oahpásnuva Sano se saameksi-frásasátnegirjái davvi-, anáraš- ja nuortalašgillii. Siidduin leat maiddái vihtta oanehisdokumeantta, almmolaš dieđut sámiid kultuvrra birra, soundboard ja maiddái guokte artihkkala, mat gieđahallet sámegielaid.
- Oahpahala davvisámegiela Sámiráđi IndyLan-giellaoahppanáppain! Áppa gávdno Apple Stores ja Google Plays
- Oahpala davvi-, anáraš- dahje nuortalašgiela mánáide oaivvilduvvon Gávpotfearán-spealuin, mas leat ovttastahtton lávde- ja goartaspeallu. Speallu gávdno Apple Stores ja Google Plays.
Lassedieđut Sámegielaid gáiddusoahpahusa pilohttaprošeavtta birra:
Sámegielaid gáiddusoahpahusa pilohttafidnu lea fidnu, man jođiha Ohcejoga gielda ja koordinere Sámediggi. Dan ruhtada oahpahus- ja kulturministeriija. Fitnu mihttomearrin lea láhčit sámegiela oahpahusa nu máŋga sámeoahppái go vejolaš sámiid ruovttuguovllu olggobealde. Fidnu fállá anáraš-, nuortalaš- ja davvisámegiela vuođđooahpahusa ja logahatskuvlejumi dievasmahtti sámegiela oahpahusa guokte vahkkodiimmu gáiddusoahpahussan miehtá Suoma. Dál oahpahusa ožžot 109 oahppi ja studeantta. Fidnu lea ožžon joatkkaruhtadeami 31.8.2023 rádjai. Almmuheapmi lohkanjahkái 2022–2023 rahppojuvvo guovvamánus 2022.
