Sámediggi doarjala oaiveministarii Suoma siskkáldas johtima ráddjema dihte

Sámediggi doarjala oaiveministarii Suoma siskkáldas johtima ráddjema dihte, vai koronavirusa leavvama sáhttá njoahcudit ja riskajoavkkuid suodjalit.

Vahkuloahpa áigge máŋggat mediat leat dieđihan Suoma siskkáldas turismmas ja luomuid doallamis Lappi guovllus, vaikko Suoma ráđđehus lea rávven garvit sosiálalaš oktavuođaid ja gieldán badjel 10 olbmo almmolaš čoahkkanemiid.

– Lean čuvvon dili hui fuolas ja dál galggašii juohkeokta váldit dili duođalaččat ja čuovvut addojuvvon rávvagiid. Eat hálit bidjat riskajoavkkuid vára vuollái, erenomážit sámeboarrásat leat joavku, man mii galgat dál suodjalit, deattuha Sámedikki ságadoalli Tuomas Aslak Juuso.

Sámedikki mielde Suoma siskkáldas johtima ráddjen livččii buoremus vuohki sámeveahkadaga ja erenomážit riskajoavkkuid, nugo sámeboarrásiid suodjaleapmái njoammuma vuostá ja dan dorvvasteapmái ahte dikšu reahkká buohkaide. Sámegielmáhtolaš dearvvasvuođafuolahusa bargoveahka lea dálá dilisge uhcán ja erenomážit hohpolaš divššu oktavuođas ja kriisadiliin eatnigielat bálvalusa mearkkašupmi lea stuoris.

Sámeboarrásiin mearkkašahtti oassi orru sámiid ruovttuguovllus. – Sámediggi doarjala oaiveministarii, ahte son dagašii dárbbašlaš doaibmabijuid, vai dušši mátkkošteapmi Suomas nogašii, loahpaha ságadoalli Juuso.

Sámegielat diehtojuohkima berre lasihit

Sámediggi muittuha sierra eiseválddiid nugo THL:a ja stáhtaráđi kansliija sámegielat diehtojuohkima dehálašvuođas. Sámediggi lea evttohan sámegielat diehtojuohkima lasiheami ja buorideami sámi giellalága vuođul ja oppalaš dorvvolašvuođa geažil. Diehtojuohkimis berre maid váldit vuhtii sámegielagiid sierradárbbuid olahahttivuođagáibádusaid dáfus, nugo dan ahte máŋggat sámegielagat eai máhte lohkat iežaset eatnigiela.

– Dan, ahte dieđut rivdet oppa áigge, ii sáhte atnit ággan dasa, ahte almmolaš rávvagat eai jorgaluvvo sámegielaide, baicce sámegielat diehtojuohkimis galgá maid ovdánit mearrediđolaččat ja nu ahte rávvagat biddjojuvvojit áiggi dássái, rávve gielladorvočálli Anne Kirste Aikio. – Dán dilis galget maid sierra eiseválddit fuolahit erenomážit das, ahte sámiid gielalaš rievttit ollašuvvet ja olmmoš áddehallá earáiguin sámegillii, vaikkoba dalle go riŋge heahteguovddážii dahje dearvvasvuođaguovddážii, jos eahpida koronanjoammuma.

Lassediehtu:

Ságadoalli Tuomas Aslak Juuso 010 839 3101 / 040 687 3394, tuomas.juuso(at)samediggi.fi

Gielladorvočálli Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiála- ja dearvvasvuođačálli Anne Länsman-Magga, 010 839 3128 / 040 182 9998, anne.lansman-magga(at)samediggi.fi