Sámediggi gáibida sámegielat ja sámiid ruovttuguovllu sode-bálvalusaid dorvvasteami
Lappi buresveadjinguovllu bálvalusfierpmádaga guoski plánat váikkuhit mearkkašahttiláhkai sámeálbmoga buresveadjimii ja dearvvašvuhtii ja maid vejolašvuođaide bajásdoallat ja ovddidit iežaset giela ja kultuvrra. Sámediggelága 9 § mielde ráđđádallamat buresveadjinguovlluin joatkašuvvet álgojagi 2026 ovdal mearrádusa bargama.
Govva: Ville Fofonoff / Sámediggi
Lappi buresveadjinguovlu almmustahtii 22.10.2025 hápmosa bálvalusfierpmádaga nuppástusain ekonomiija heivehandoaimmaid oassin. Hápmosis leat ovdanbukton ee. ahte Avvila birrajándora gohcindikšu buhttejuvvo hohpolaš vuostáiváldimiin, Muoná seaŋgaossodat heaittihuvvo ja giliid bálvalusat heivehuvvojit.
– Mii háliidat sihkkarastit, ahte sámegielat ja sámiid ruovttuguovllu sode-bálvalusat seilot. Mii leat de Sámedikkis geahččalan váikkuhit áššái máŋgga láhkai, vai dát erenomáš dehálaš bálvalusat dorvvastuvvošedje, dadjá Sámedikki ságajođiheaddji sadjásaš Tuomas Aslak Juuso.
Sámediggi lea oassálastán almmolaš ságastallamii ášši birra bealiváldimiin 22.10.2025, oaivilčállosiin 5.11.2025 ja oktasaš bealiváldimiin Eanodaga, Anára, Muoná ja Ohcejoga gielddaiguin. Dasa lassin fáttá olis lea ovttas gielddaiguin deaivvaduvvon oaiveministtar Orpo ja gielda- ja guovloministtar Ikosa erenomášveahkit 27.11.2025.
Sámedikki stivra gieđahalai ášši čoahkkimis 19.11.2025 ja dohkkehii Sámedikki cealkámuša bálvalusfierpmádaga nuppástusain. Cealkámušas ee. doarjaluvvui sámegielat ja sámiid ruovttuguovllu sode-bálvalusaid dorvvasteapmái ja ovdanbuktui, ahte Sámediggi ii dohkket Muoná seaŋgaossodaga iige Avvila birrajándora gohcindivššu heaittiheami. Sámediggi bivddii Lappi buresveadjinguovllu luohpat dakkár plánain, mat heajudivčče sámegielat bálvalusaid ollašuvvama ovddežis.
Dasa lassin buresveadjinguovllus bivdojuvvui viiddit váikkuhusaid árvvoštallan ovdal mearrádusa bargama ja muittuhuvvui sámediggelága geatnegasvuođain.
Sámediggi lea juo árabut kritiseren Lappi buresveadjinguovllu das, ahte Sámediggi ii leat váldon mielde bálvalusfierpmádaga nuppástusaid válmmaštallanprosessii. Lappi buresveadjinguovlu bovdii Sámedikki sámediggelága 9 § mielde ráđđádallamii, mii dollojuvvui 25.11.2025. Ráđđádallamis gieđahallojuvvojedje ee. ráđđádallaneavttut. Ráđđádallama áigge Lappi buresveadjinguovlu almmuhii, ahte mearrádusat bálvalusfierpmádagas dahkkojit easkka álgojagi 2026. Ovttasdoaibman- ja ráđđádallanproseassa Sámedikki ja Lappi buresveadjinguovllu gaskkas joatkašuvvá álgojagi 2026 ovdal mearrádusa bargama.
Lassedieđut
Tuomas Aslak Juuso
II várreságajođiheaddji, ságajođiheaddji sadjásaš
040 687 3394
tuomas.juuso@samediggi.fi
