Sámedikki EU-váikkuheapmi ovdána
Sámediggi lea loahppajagi 2025 nannen iežas váikkuhanbarggu Eurohpa uniovnnas guovtti mearkkašahtti ollisvuođa bokte: galledii Eurohpa parlameantta dievasčoahkkinvahkus Strasbourgas ja oassálasttii Sámi Indigenous Summit -dáhpáhussii Brusselis.
EU-váikkuheapmi lea guovddáš riikkaidgaskasaš prioritehta Sámedikkis dán válgabajis. Váikkuhanbarggus deattuhuvvojit nuppiidasaset laktásan temán sámiid oassálastin- ja ovddastusvuoigatvuođaid nannen, dálkkádatnuppástus ja sámiid dárbbuid vástideaddji ruhtadančovdosat.
Rahpan ja panelaságastallama guovddáš oassálastit ovttas govas. Govva: Bárentsa euroárktalaš ráđđi.
Strasbourga galledeapmi 24.–26.11.2025 vuojulduvai sámiid oassálastin- ja ovddastusvuoigatvuođaid nannemii EU:s, sámiid vuoigatvuođaid oinnolašvuođa lasiheapmái politihkalaš proseassain ja maid EU-ruhtadanvejolašvuođaid dárkumii. Ságastallamiin deattuhuvvojedje erenomážit dálkkádatnuppástusa váikkuhusat sámeguovlluide ja árbevirolaš ealáhusaide ja dárbu vuhtiiváldit daid váikkuhusaid EU boahttevuođa politihkas ja ruhtadanrámmain.
Sámediggi deaivvadii galledeami áigge Eurohpa parlameantta virgeolbmuid njunnošiiguin ja suopmelaš europarlamentarihkkáriiguin. Galledeapmi nannii Sámedikki sajádaga aktiivvalaš ja duođalaš doaibmin EU-dási ságastallamiin. Sámedikki galledeamis ovddastii álbmogiidgaskasaš áššiid čálli Inka Saara Arttijeff.
Brusselis 9.–10.12.2025 ordnejuvvon Sámi Indigenous Summit čohkkii oktii joavkku EU-mearrideaddjiid, virgeolbmuid ja eamiálbmotdoibmiid. Dáhpáhusas gieđahallojuvvui árktalaš guovllu dorvvolašvuođa- ja geopolitihkalaš dilli sámi oaidninviŋkilis, dálkkádatnuppástusa ja ruoná sirdáseami váikkuhusat sámeguovlluide ja sámiid oassálastin biraspolitihkkii. Dasa lassin suokkardallojuvvui ekonomalaš ovdáneapmi, rájáid rasttildeaddji ovttasbargu ja EU-ruhtadeami mearkkašupmi sámiid servošiid ja ealáhusaid nannemis.
Dáhpáhusas deattuhuvvui, ahte sámiid bissovaš ovddastus EU:s ja FPIC-prinsihpa čadni ja systemáhtalaš ollašuhttin leat eavttut dasa, ahte EU dálkkádat-, biras- ja ekonomiijapolitihkka sáhttá leat albma láhkai vuoiggalaš ja gudnejahttit eamiálbmogiid vuoigatvuođaid. Sámedikkis dáhpáhussii oassálasttiiga ságajođiheaddji sadjásaš Tuomas Aslak Juuso ja álbmogiidgaskasaš áššiid čálli Inka Saara Arttijeff.
– Dálkkádatnuppástus ii leat sámiide boahttevuođa áitta, muhto dálá duođalašvuohta. Danin lea vealtameahttun, ahte EU dálkkádat- ja ruhtadanpolitihkas earuhuvvo eamiálbmogiid sierrasajádat ja dorvvastuvvojit albma vejolašvuođat oassálastit mearrádusbargamii, Sámedikki ságajođiheaddji sadjásaš Tuomas Aslak Juuso gávnnaha.
Oppalaččat ságastallamat Strasbourgas ja Brusselis čájehit, ahte EU:s lea lassáneaddji beroštupmi nannet EU áidna eamiálbmoga sajádaga, oassálastinvuoigatvuođaid ja vuhtiiváldit dálkkádatnuppástusa ja ruhtadeami guovddáš mearkkašumi sámiid vuoigatvuođaid ollašuvvamii. Sámediggi joatká mearrediđolaččat EU-váikkuhanbarggu daid temáid ovddideami várás válgabaji guovddáš riikkaidgaskasaš strategiijas oassin.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Inka Saara Arttijeff
Álbmogiidgaskasaš áššiid čálli
050 574 7629
Inka-saara.arttijeff@samediggi.fi
