Sámedikki ságajođiheaddji álbmotbeaivvi ságastis: sámiid iešstivrema galgá gudnejahttit
Sámedikki ságajođiheaddji Tuomas Aslak Juuso jearrá sámi álbmotbeaivvi ságastis riikkabeaiáirasiin: lehpetgo gergosat gudnejahttit sámiid vuođđolágalaš iešstivrema ja riikkaidgaskasaš soahpamušaid, nugo lehpet midjiide logijagiid lohpidan?
Ságajođiheaddji Tuomas Aslak Juuso illuda álbmotbeaivvi ságastis máŋggaid válgabaji dehálaš ulbmiliid joksamis. Son lokte ovdamearkan ráđđádallamiin lihkostuvvama luonddusuodjalanlága ja dálkkádatlága ođastusain.
– Lean hui duđavaš dasa, ahte láhkaođastusas dorvvastit min árbevirolaš ealáhusaid ja kultuvrra, ja lassin min áššedovdamuša váldit vuhtii boahttevuođas buorebutgo ovdal sámi dálkkádatráđi barggu bokte, ságajođiheaddji Juuso gávnnaha.
Son lokte maiddái Sámedikki bušeahtas ovdan áššiid main illudit ja fuolastuvvat. – Mii oaččuimet bušehttii lasáhusa doaibmaneavttuideamet nannema várás, ja maiddái kulturmearreruhtii oaččuimet bajádusa. Daid bokte mii sáhttit buorebutgo ovdal ovddidit vuoigatvuođaideamet ja kultuvramet iešguđet oassesurggiin. Nuppe dáfus sámi kulturguovddážiid ruhtadeami hástalusat leat ain čoavddekeahttá, ságajođiheaddji Juuso muitala.
Lassin ságajođiheaddji jearrá ságastis riikkabeaiáirasiin, áigotgo sii gudnejahttit sámediggeláhkaevttohusa, man sámiid virggálaš ovddastanorgánat leat dohkkehan. Son muittuha sin maiddái riektestáhta dárbbašlašvuođas. – Riektestáhta ii dárbbašuvvo dušše dain diliin, main vuoigatvuođaid dáhkideapmi lea álki, geahppat ja soabalaš, muhto dan duođalaš fápmu geahččaluvvo dalle, go čovdosiid ferte dahkat, vaikko dat eai livčče buohkaid miela mielde, son fuomášuhttá.
Ságajođiheaddji giitá álbmotbeaivve maiddái stáhtaráđi lahtuid ovttasbarggus sámeáššiin gollan válgabajis.
– Háliidan giitit erenoamážit oaiveministtar Sanna Marina ja vuoigatvuođaministtar Anna-Maja Henrikssona, ja maiddái eará ministariid geaid mii leat deaivvadan ja geaiguin mii leat dahkan buori ovttasbarggu, dego Li Anderssona, Pekka Haavisto, Emma Kari, Krista Mikkosa ja Maria Ohisalo, ságajođiheaddji gávnnaha.
- Loga Sámedikki ságajođiheaddji Tuomas Aslak Juuso álbmotbeaivvi sága dáppe.
- Geahča video Sámedikki ságajođiheaddji Tuomas Aslak Juuso álbmotbeaivvi ságas dáppe.
Lassedieđut:
Tuomas Aslak Juuso
Ságajođiheaddji
040 687 3394
tuomas.juuso@samediggi.fi
