Sámi boazodoalu doarjun girjejuvvon Eurohpa kommišuvnna mearrádussii - ”Historjjálaš dáhpáhus”
Eurohpa kommišuvnna ollašuhttinmearrádussii lea čahkaduvvon vuosttas háve girjen, man vuođul Suoma stáhta sáhttá boahttevuođas ruhtadit doaibmabijuid, maiguin doarjut eamiálbmot sámiid boazodoalu.
Govva: Tarja Länsman / Sámediggi
Eurohpa kommišuvdna attii 9.12.2025 ođđa ollašuhttinmearrádusa, mii guoská bohccuid ja boazobuktagiid buvttadeapmái ja gávppašeapmái Suomas mieđihuvvon álbmotlaš doarjagiid dohkkeheami (C(2025) 8458 final). Boazodoalu vahágiid buhttemii, maid dálkedilit ja ealliiddávddat leat dagahan, ja sámi boazodoalu doarju doaibmabijuid doaibmabidjoluohkkái lea várrejuvvon oktiibuot 10 miljovnna euro jahkásaš mearreruđa eanemusrádji.
– Dát lea historjjálaš dáhpáhus sámi boazodollui. Dát girjen addá midjiide doaivaga das, ahte maiddái Suoma stáhta háliida ovddidit ođđa doarjjahámiid sámi boazodoalu eallinfámolašvuođa seailluheami várás. Mun háliidan de giitit eana- ja meahccedoalloministeriija das, ahte sii leat ovddidan min ášši maiddái Eurohpa kommišuvnna guvlui ja ná de ollašuhttán maiddái boazodoalu boahttevuohtabargojoavkku loahpparaporta ávžžuhusaid, gávnnaha Sámedikki ságajođiheaddji sadjásaš Tuomas Aslak Juuso.
Sámediggi deattuha, ahte stáhta galgá dáhkidit doarvái stuorra ruhtadeami vai Eurohpa kommišuvnna ollašuhttinmearrádusa girjema sáhttá dál albma láhkai ollašuhttigoahtit sámi boazodoalus. Stáhta galgá maid farggamusat álggahit aktiivvalaš ságastallama ja ovttasbarggu Sámiid ruovttuguovllu bálgosiiguin, Sámi bálgosat rs:in ja Sámedikkiin das, mo mearrádusa sáhtášii buoremus vuogi mielde ollašuhttit álbmotlaš dásis.
– Vaikko sámi boazodoalu doarjjadoaimmaid guoski girjen lea dál ožžojuvvon Eurohpa kommišuvnna ollašuhttinmearrádussii, bargu dan ollašuhttima várás álgá duođalaččat easkka dál. Ášši ovddideapmi doarju njuolga maiddái easkka almmuhuvvon sámi duohtavuođa- ja soabadankommišuvnna raportta doaibmabidjoevttohusaid boazodoalu oasil, joatká Juuso.
Seamma ollašuhttinmearrádusas Eurohpa kommišuvdna loktii spiriid dagahan vahágiid buhttema eanemusráji 10 miljovnnas 12 miljon euroi, ja árbevirolaš boazodoallovuogádagaid investerendoarjagii ja bajásdoallamii várrejuvvon álbmotlaš mearreruđa eanemusmeari 2,4 miljovnna euroi. Sámedikki oainnu mielde bajádusat álbmotlaš mearreruđaid eanemusmeriide leat mannamin rivttes guvlui, muhto eai reahkká go buohtastahttá spiriid dagahan vahágiid ovdáneapmái ovdamearkan ovddit jagiid áigge.
Lassedieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Laura Olsén-Ljetoff
Ealáhusčálli
040 617 5113 / 010 839 3123
laura.olsen-ljetoff@samediggi.fi
