Dehálaš beaivemearit erenomážit nuoraide, geat devdet 18 jagi – Sámedikki ságadoallit muittuhit ohcat válgalogahallamii maŋimustá 30.9.2026

Čuovvovaš sámediggeválggat lágiduvvojit boahtte jagi 23.8.–3.10.2027. Válgalogahallamii galgá lihkká ohcat jo dán jagi bealde čakčamánu loahpa rádjai.

Ođđa mearreáigi 30.9. boahtá ođasmahttojuvvon sámediggelágas. Ovddit lága áigge ohcanáigi válgalogahallamii nogai juovlamánu maŋimus beaivve válgajagi ovddit jagi.

–Dál ferte leat dárki! Jagi 2027 válgalogahallamii ohcan guoská erenomážit nuoraid ja dakkár olbmuid, geat eai leat ovdal leamašan Sámedikki válgalogahallamis. Lea dehálaš ahte sámeálbmot fuolaha das, ahte min iežamet nuorat ohcet válgalogahallamii, lohká Sámedikki ságadoalli Pirita Näkkäläjärvi.

Ohcanskovvi válgalogahallamii lea almmustahtton 15.7.2026

Sámedikki válgalávdegoddi lea almmustahttán 15.7.2026 válgalogahallama ohcanskovi buot golmma Suomas ealli sámegillii ja suomagillii. Skovvi gávdno siiddus https://vaalit.samediggi.fi/valggat/.

– Vaikko leage sáhka oalle oktageardánis proseassas, gánneha ohcamuša válmmaštallagoahtit áiggil. Ohcamuššii sáhttá laktit ovdamearkka dihtii virgeduođaštusa, man oažžu evangelalaš-luterálaš searvegotti guovddášregistaris dahje ortodoksalaš kirku guovddášregistaris dahje duođaštusa olmmoš- ja bearašgaskavuohtadieđuin, man oažžu Digi- ja álbmotdiehtodoaimmahagas, lohká Sámedikki I várreságadoalli Leo Aikio.

Jienastit besset nuorat, guhte devdet 18 jagi maŋimustá 3.10.2027

Čuovvovaš Sámediggeválggain 23.8–3.10.2027 besset jienastit nuorat, geat devdet jienastanvuoigatvuođa kritearaid ja devdet 18 jagi maŋimustá válgabeaivve (3.10.2027). Sidjiide sáddejuvvojit muittuhanreivvet válgalogahallamii ohcamis sullii borgemánu beallemuttus.

Go sámediggeláhka ođasmahttui, de maiddái vuoigatvuohta merkejuvvot válgalogahallamii rievddai.

Ođasmahttojuvvon ja dál gustojeaddji sámediggelága mielde Sámedikki jagi 2027 válgalogahallamii merkema eaktun lea jagi 2026:

3 § (27.6.2025/414)

Vuoigatvuohta merkejuvvot válgalogahallamii

Vuoigatvuohta merkejuvvot válgalogahallamii lea olbmos, guhte atná iežas sápmelažžan, dainna eavttuin ahte:

1. olmmoš ieš dahje aŋkke okta su váhnemiin, áhkuin ja ádjáin dahje máttaráhkuin ja -ádjáin lea oahppan sámegiela vuosttas giellanis.

Dasa lassin:

Sámedikki válgalogahallamii merkema eaktun lea olbmo ássanbáikkis fuolakeahttá dat, mii 3 §:s ásahuvvo, ahte olmmoš deavdá maŋimustá maŋimus válgabeaivve 18 jagi ja ahte son lea Suoma riikkalahttu dahje sus lea olgoriikka riikkalahttun leamašan ruoktogieldalágas (201/1994) oaivvilduvvon ruoktogielda Suomas dalle, go ohcamuša válgalogahallamii váldimis galgá maŋimustá dahkat.

– Vuoigatvuohta merkejuvvot válgalogahallamii vuođđuduvvá soga gillii. Jagi 2027 válgalogahallamii ohcci ii dárbbaš ieš máhttit sámegiela, muhto son galgá atnit iežas sápmelažžan ja unnimusat okta su máttaráhkuin dahje -ádjáin galgá leat oahppan sámegiela vuosttas giellan, lohká Sámedikki II várreságadoalli Tuomas Aslak Juuso.

Lassedieđut válgalávdegotti doaimmahagas ja ođasmahttojuvvon válgasiidduin

Lassedieđuid Sámediggeválggain ja válgalogahallamii ohcamis oažžu válgalávdegottis ja válgasiidduin. Válgalávdegotti njuolggo oktavuohtadieđut gávdnojit siiddus https://samediggi.fi/dav/oktavuodadiedut/.

Sámedikki válggaid várás rahppojuvvui suoidnemánu álggus ođasmahttojuvvon neahttasiiddut čujuhusas https://vaalit.samediggi.fi/valggat/. Siidduin gávdnojit vuođđodieđut sámediggeválggain ja geavatlaš rávvagat sihke evttohasaide ja jienasteaddjiide. Siidduin gávdnojit rávvagat earret eará válgalogahallamii ohcamis, evttohassan álgimis ja jienasteamis.

Dehálaš beaivemearit 2026-2027

2.1.2026 dieđáhus válgalogahallamii ohcamis. Sámedikki válgalávdegoddi lea čohkkemin válgalogahallama ođđasit jagi 2027 válggaid várás. Jagi 2024 sámediggeválggain válgalogahallamii merkejuvvon olbmuin ii gáibiduvvo ođđa ohcamuš. Jagi 2024 válggain válgalogahallamii merkejuvvon olmmoš váldo válgalogahallamii ohcamuša haga, jus son deavdá gustojeaddji lágas ásahuvvon válgalogahallamii merkema eavttuid. Lassedieđut  Sámedikki siidduin.

Giđđa 2026. Lassečielggadanbivdagat. Sámedikki válgalávdegoddi lea sádden lassečielggadanbivdagiid jagi 2027 sámediggeválggaid válgalogahallama čohkkema várás. Lassedieđut   Sámedikki siidduin .

1.7.2026. Ođđa válgasiiddut. Ođasmahttojuvvon válgasiiddut  https://vaalit.samediggi.fi/valggat/ rahpasit buot golmma Suomas ealli sámegillii ja suomagillii.

15.7.2026 Ohcanskovvi. Ohcanskovvi jagi 2027 válgalogahallamii almmustahtto buot golmma Suomas ealli sámegillii ja suomagillii čujuhusas https://vaalit.samediggi.fi/valggat/.

Borgemánu beallemuddu 2026. Muittuhanreivvet. Maŋimustá 3.10.2027 18 jagi deavdi olbmuide sáddejuvvojit muittuhanreivvet válgalogahallamii ohcamis sullii borgemánu beallemuttus.

30.9.2026 Ohcanáigi nohká. Jagi 2027 sámediggeválggaid válgalogahallamii ohcan nohká 30.9.2026. Ohcamuš galgá leat doaimmahuvvon válgalávdegotti doaimmahahkii maŋimustá mearrebeaivve dii 23.59. Ođđa mearreáigi 30.9.2026 boahtá ođasmahttojuvvon sámediggelágas. Ovddit lága áigge ohcanáigi lei juovlamánu maŋimus beaivi válgajagi ovddit jagi.

23.8.–3.10.2027 Čuovvovaš sámediggeválggat. Sámediggeválggat bistet dál guhtta vahku ovddit njealji vahku sadjái. Válggat álget dál vahku ovdal ja válgadoaimmahus lea guokte vahku guhkit go dál. Ođđa áiggit čuvvot ođasmahttojuvvon sámediggelága. Válggat lágiduvvojit poastta fáro dahje jienastanlihpo sáhttá buktit válgalávdegotti almmuhan báikái. Válggat lágiduvvojit sámiid ruovttuguovllus maiddái válgabeaivvi jienasteapmin.

Lassedieđut:

Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi

Leo Aikio
I várreságadoalli
040 621 6505
leo.aikio@samediggi.fi

Tuomas Aslak Juuso
II várreságadoalli
040 687 3394
tuomas.juuso@samediggi.fi