Tääʹrǩes peiʹvvmeäʹr jeäʹrben 18 eeʹǩǩed tiõuʹddi nuõrid – Sääʹmteeʹǧǧ saaǥǥjååʹđteeikåʹdd mošttat vaal-loǥstõʹǩǩe ooccmest 30.9.2026 mõõneeʹst

Pueʹtti sääʹmteʹǧǧvaal lie pueʹtti eeʹjj, tääʹrǩben vääʹldeeʹl 23.8.–3.10.2027. Vaal-loǥstõʹǩǩe âlgg kuuitâǥ ooʒʒõõttâd juʹn tän eeʹjj peäʹlnn čõhččmannu loopp räjja mõõneeʹst.

Ođđ mieʹrräiʹǧǧ 30.9.2026 puätt oođuum sääʹmteʹǧǧlääʹjjest. Ääiʹjab lääʹjj ääiʹj ooccâmäiʹǧǧ vaal-loǥstõʹǩǩe puuđi rosttovmannu mââimõs peeiʹv vaaleeʹjj oudldeei eeʹjj.

– Ååʹn lij vääžnai leeʹd täʹrǩǩ! Eeʹjj 2027 vaal-loǥstõʹǩǩe ooccâm kuâskk jeäʹrben nuõrid da nåkam oummuid, kook jie leäkku ääiʹjben kuullâm Sääʹmteeʹǧǧ vaal-loǥstõʹǩǩe. Lij vääžnai, što sääʹm-meer âânn huõl, što mij nuõr åʹcce vaal-loǥstõʹǩǩe, ceälkk Sääʹmteeʹǧǧ saaǥǥjååʹđteei Pirita Näkkäläjärvi.

Ooccâmlomakk vaal-loǥstõʹǩǩe lij õlmstõttum 15.7.2026

Sääʹmteeʹǧǧ vaal-luʹvddkåʹdd lij õlmstâttam 6.7.2026 ooccâmlomaakk vaal-loǥstõʹǩǩe puk kooum Lääʹddjânnmest jieʹlli sääʹmǩiõʹlle da lääddas. Lomakk käunnai seeidast https://vaalit.samediggi.fi/vaal/.

– Håʹt kõõččmõõžžâst lij miâlggâd õõutǩeärddsaž proseʹss, kaʹnnat ooccmõõžž valmštõõllmõõžž altteed ääiʹjpeäʹlnn. Ooccmõʹšše vuäitt õhtteed ouddmiârkkân veʹrǧǧtuõđštõõzz, koon vuäǯǯ evaŋkeel-luteerlaž seäʹbrrkååʹdd kõõskõsrekisteeʹrest leʹbe ortodookslaž ceerkav kõõskõsrekisteeʹrest leʹbe tuõđštõõzz ooumaž- da piârkõskkvuõtt-teâđain, koon vuäǯǯ Digi- da meerteâttkonttrest, särnn Sääʹmteeʹǧǧ I väärrsaaǥǥjååʹđteei Leo Aikio.

Jiõnsted peäʹsse mââimõsân 3.10.2027 tiuddâkksiʹžžen šõddi nuõr

Pueʹtti Sääʹmteeʹǧǧ vaalin 23.8.–3.10.2027 peäʹsse jiõnsted mââimõsân mââimõs vaalpeeiʹv (3.10.2027) 18 eeʹǩǩed tiõuʹddi nuõr, kook teäuʹdde jiõnstemvuõiggâdvuõttkriteeʹrid. Siʹjjid vuõltteet mošttʼtemǩiiʹrjid vaal-loǥstõʹǩǩe ooʒʒõõttmõõžžâst nuʹtt påʹrǧǧmannu pieʹllrääʹjest.

Ko sääʹmteʹǧǧlääʹjj oođeeš, de vuõiggâdvuõtt šõddâd mieʹrǩǩuum vaal-loǥstõʹǩǩe še mottji.

Oođuum da ååʹn viõǥǥâst åårrai sääʹmteʹǧǧlääʹjj mieʹldd Sääʹmteeʹǧǧ eeʹjj 2027 vaal-loǥstõʹǩǩe mieʹrǩǩeem oudldõs lij eeʹjj 2026 tät:

3 § (27.6.2025/414)

Vuõiggâdvuõtt šõddâd mieʹrǩǩuum vaal-loǥstõʹǩǩe

Vuõiggâdvuõtt šõddâd mieʹrǩǩuum vaal-loǥstõʹǩǩe lij oummust, kååʹtt âânn jiiʹjjes säʹmmliʹžžen, oudldeeʹl što:

1. ooumaž jiõčč leʹbe aainâs õhtt suu puärrsin, ääkkain leʹbe aaʹjjin leʹbe ääkkai leʹbe aaʹjji puärrsin lij mättjam sääʹmǩiõl vuõssmõs ǩiõllnes.

Lââʹssen:

Sääʹmteeʹǧǧ vaal-loǥstõʹǩǩe mieʹrǩǩeem oudldõssân lij oummu jälstempäikka ǩiõččǩani tõn lââʹssen, mâid 3 §:st šiõtteet, što ooumaž teâudd mââimõsân vaaltååimtõõzz mââimõs peeiʹv 18 eeʹǩǩed da što son lij Lääʹddjânnam meerlaž leʹbe suʹst lij ålggjânnam meerliʹžžen leämmaž dommkåʹddlääʹjjest (201/1994) jurddum dommkåʹdd Lääʹddjânnmest teʹl, ko ooccmõõžž vaal-loǥstõʹǩǩe välddmõõžžâst âlgg mââimõõzzâst tuejjeed.

– Vuõiggâdvuõtt šõddâd mieʹrǩǩuum vaal-loǥstõʹǩǩe vuâđđââvv sooǥǥ ǩiõʹlle. Eeʹjj 2027 vaal-loǥstõʹǩǩe oocci ij taarbâž jiõčč siltteed sääʹmǩiõl, leâša suʹst feʹrttai ââʹnned jiijjâs säʹmmliʹžžen da uuʹccmõsân õhtt ääkkai leʹbe aaʹjji puärrsin lij õlggâm mättjed sääʹmǩiõl vuõssmõs ǩiõllnes, särnn Sääʹmteeʹǧǧ II väärrsaaǥǥjååʹđteei Tuomas Aslak Juuso.

Lââʹssteâđ vaal-luʹvddkååʹdd konttrest da ođsmõttum vaalseeidain

Lââʹssteâđaid Sääʹmteeʹǧǧ vaalin da vaal-loǥstõʹǩǩe ooʒʒõõttmõõžžâst vuäǯǯ vaal-luʹvddkååʹddest da vaalseiddõõzzâst. Vaal-luʹvddkååʹdd konttâr vuõigg õhttvuõtt-teâđ käunnʼje seeidast https://samediggi.fi/nuo/ohttvuott-tead/.

Sääʹmteeʹǧǧ vaalid lij äävuum sueiʹnnmannu aalǥâst oođuum neʹttseeidaid addrõõzzâst https://vaalit.samediggi.fi/vaal/. Seeidain käunnʼje vuâđđteâđ sääʹmteʹǧǧvaalin di tåimmamvuäʹppõõzz nuʹtt võboršiiʹǩǩid ko še jiõnsteeʹjid. Seeidain käunnʼje vuäʹppõõzz jeäʹrbi mieʹldd vaal-loǥstõʹǩǩe ooʒʒõõttmõõžžâst, võboršeʹǩǩen älggmõõžžâst di jiõnstummšest.

Listt tääʹrǩes peiʹvvmieʹrin 2026–2027

2.1.2026 teâđtõs vaal-loǥstõʹǩǩe ooʒʒõõttmõõžžâst. Sääʹmteeʹǧǧ vaal-luʹvddkåʹdd lij noorrmen vaal-loǥstõõǥǥ oʹđđest eeʹjj 2027 vaali vääras. Eeʹjj 2024 sääʹmteʹǧǧvaalin vaal-loǥstõʹǩǩe mieʹrǩǩuum oummuin jeät oudlduku ođđ ooccâmlomaakk teâuddmõõžž. Eeʹjj 2024 vaalin vaal-loǥstõʹǩǩe mieʹrǩǩuum oummu vääʹldet vaal-loǥstõʹǩǩe ooccmõõžžtää, jõs son teâudd viõǥǥâst åårrai lääʹjjest šiõttuum vaal-loǥstõʹǩǩe mieʹrǩǩeem oudldõõzzid. Lââʹssteâđ  Sääʹmteeʹǧǧ seeidain.

Ǩiđđ 2026. Lââʹssčiõlǥtemraukkmõõžž. Sääʹmteeʹǧǧ vaal-luʹvddkåʹdd lij vuõlttääm lââʹssčiõlǥtemraukkmõõžžid kuõskeeʹl eeʹjj 2027 sääʹmteʹǧǧvaali vaal-loǥstõõǥǥ tuejjummuž. Lââʹssteâđ  Sääʹmteeʹǧǧ seeidain.

1.7.2026. Ođđ vaalseeid. Oođuum vaalseiddõs https://vaalit.samediggi.fi/vaal/ ävvan puk kooum Lääʹddjânnmest jieʹlli sääʹmǩiõʹlle da lääddas.

15.7.2026 Ooccâmlomakk. Ooccâmlomaakk eeʹjj 2027 vaal-loǥstõʹǩǩe õlmstââʹttet puk kooum Lääʹddjânnmest jieʹlli sääʹmǩiõʹlle da lääddas addrõõzzâst https://vaalit.samediggi.fi/vaal/ .

Påʹrǧǧmannu pieʹllrääʹjj 2026. Mošttʼtemǩeeʹrj. Mââimõõzzâst 3.10.2027 18 eeʹǩǩed tiõuʹddi oummuid vuõltteet mošttʼtemǩiiʹrjid vaal-loǥstõʹǩǩe ooʒʒõõttmõõžžâst nuʹtt påʹrǧǧmannu pieʹllrääʹjest.

30.9.2026 Ooccâmäiʹǧǧ poott. Eeʹjj 2027 sääʹmteʹǧǧvaali vaal-loǥstõʹǩǩe ooʒʒõõttmõõžž mieʹrräiʹǧǧ poott 30.9.2026. Ooccmõš âlgg leeʹd tååimtum vaal-luʹvddkååʹdd konttra mââimõõzzâst mieʹrrpeeiʹv čiâss 23.59. Ođđ mieʹrräiʹǧǧ 30.9.2026 puätt oođuum sääʹmteʹǧǧlääʹjjest. Ääiʹjab lääʹjj ääiʹj ooccâmäiʹǧǧ leäi rosttovmannu mââimõs peeiʹv vaaleeʹjj oudldeei eeʹjj.

23.8.–3.10.2027 Pueʹtti sääʹmteʹǧǧvaal. Sääʹmteeʹǧǧ vaal peʹštte ååʹn kutt neäʹttel ääiʹjab neellj neäʹttel sâjja. Vaali alttummuž ääiʹjeet neäʹttlin da vaaltååimtõs lij kueʹhtt neäʹttel kuuʹǩǩab ânnʼjõž vuâkka veʹrddeeʹl. Ođđ äiʹǧǧmeäʹr puäʹtte oođuum sääʹmteʹǧǧlääʹjjest. Vaalid tååimtet pååʹšt mieʹldd leʹbe tååimteeʹl jiõnstemliipp muđoi ko pååʹšt mieʹldd vaal-luʹvddkååʹdd iʹlmmtem päikka. Vaal tååimtet säʹmmlai dommvuuʹdest še vaalpeeiʹv jiõnstummšen.

Lââʹssteâđ:

Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi

Leo Aikio
I väärrsaaǥǥjååʹđteei
040 621 6505
leo.aikio@samediggi.fi

Tuomas Aslak Juuso
II väärrsaaǥǥjååʹđteei
040 687 3394
tuomas.juuso@samediggi.fi