Sámediggi lea fidnen ođđa erenomášáššedovdiid – virgeolbmot álggahan bargguineaset borgemánus

Árrabajásgeassináššiid erenoamášáššedovdi nanosmahttá Sámedikki barggu sámeoahpahusa ja -skuvlejumi áššedovdin

Sámedikki stivra válljii árrabajásgeassináššiid erenoamášáššedovdin Anni Koivisto. Koivisto lea ovdal dán doaibman sosiála- ja dearvvašvuođaáššiid erenoamášáššedovdi virgesadjásažžan ja Sámedikki várreságajođiheaddjin ja lahttun.

– Lea fiinna dovdu beassat ovddidit sámi árrabajásgeassima ja atnit ávkin máhtu ja hárjánumi man lean fidnen barggus ja Sámedikki doaimmain ja riikkaviidosaš organisašuvnnain. Árrabajásgeassin lea guovddážis sámemánáid vuoigatvuođaid ollašuvvamis. Danin doalan earenoamáš dehálažžan dán barggu ja eará ođastuvvon ráhkadusaid, mat dorjot sámi árrabajásgeassima, dadjá Koivisto.

Ođastuvvon sámediggelága 5 § mielde Sámediggi doaibmá sámeoahpahusa ja -skuvlejumi áššedovdin ja ovddida daid buorideami oppalašvuohtan vai sámegiela ja kultuvrra bajásdoallan ja ovddideapmi dorvvastuvvojit. Buorideami dihte dán barggu, Sámedikki dievasčoahkkin vuođđudii bargoortnetođastusa oktavuođas fásta árrabajásgeassináššiid erenoamášáššedovdi virggi.

Ealáhus- ja birassektora áššedovdiresurssat ođasmuvvet

Ealáhus- ja birrassektorii válljejuvvui birasáššiid erenoamášáššedovdin luonddudiehtagiid kandidáhta Robin Katekeetta.

–  Okta ášši, mii mu eanemus movttiidahttá, lea vejolašvuohta bargat árbedieđu vuhtiiváldimiin. Lea buorre, ahte birasdutkamušas dovddastuvvo maiddái buorebut go ovdal eamiálbmogiid dieđu árvu, mii lea čoggon luonddus. Mu mielas buoremus čovdosat šaddet dalle, go dieđalaš dutkamuš ja sohkabuolvvaid áigge čoggon hárjánupmi luonddus ságastallet gaskaneaset. Dat muitalit dávjá seammá máidnasa, muhto vehá eará gielain, dadjá Katekeetta.

Sámeealáhusaid ja eanageavaheami erenoamášáššedovdi bargui Sámedikki stivra válljii čoahkkimisttis 6.5.2026 birasteknihka studeantta Maria Valkeapää. Valkeapää doaibmá dál Sámedikki válgalávdegotti mearreáigásaš čállin ja álggaha ođđa barggus maŋŋelabbos 2027. Dan rádjai sámeealáhusaid ja eanageavaheami erenoamášáššedovdi virgesadjásažžan bargá Aslak Uula Länsman, guhte álggahii barggus borgemánu beallemuttus.

EU-áššiid ja searvvušlaš ovdamiehtama erenoamášáššedovdi doarju válgabaji prográmma ollašuhttimis

Sámedikki válgabaji 1.9.2024–31.12.2027 doaibmaprográmma mielde Sámediggi figgá nannet vuoigatvuođaidis oassálastit Eurohpa Uniovnna institušuvnnain ja oassálastit EU-mearrádusdahkamii Suomas ja Suoma bissovaš ovddastagas Brusselis.

Bargoortnega beaivádeami oktavuođas Sámedikki stivra mearridii nannet Sámedikki bargiresurssa dán válgabadjái mearreáigásaš EU-áššiid ja searvvušlaš ovdamiehtama erenoamášáššedovdi bargguin. Erenoamášáššedovdi bargguide gullá vástidit lassánan searvvušlaš ovdamiehtamiid gieđahallamis ja daid ovdanbuktimis Sámedikki dutkanehtalaš ráđđái. Dasa lassin erenoamášáššedovdi vástida koordinerema doarjagis Sámedikki EU-áššiid válmmaštallamis ja oassálastá EU-oaiviliid válmmaštallamii vai Sámedikki EU-mihttomearit ovddiduvvojit.

Sámedikki stivra válljii mearreáigásaš virgegaskavuhtii Edda Sundströma, guhte lea olmmošvuoigatvuođalága filosofiija magisttar.

– Lea illu beassat bargat Sámedikkis sámiid vuoigatvuođaid ovddideami ovdii. Mu barggus ovttastuvvet guokte miellagiddevaš oassesuorggi: sámiid oassálastinvuoigatvuođaid ovddideapmi EU-mearrádusdahkamis ja searvvušlaš ovdamiehtama (FPIC) ollašuvvama doarjun erenoamážit gažaldagain, mat laktásit dutkamuššii ja árbedihtui. Guktot lea guovddážis sámiid iešmearridanvuoigatvuođa ollašuvvama dáfus, ja aiddo dát dahká barggus erenoamáš mearkkašahtti ja movttiidahtti, dadjá olmmošvuoigatvuođalága filosofiija magisttar Edda Sundström.

Sámedikki ságajođiheaddji Pirita Näkkäläjärvi atná dehálažžan dan, ahte Sámediggi lea sáhttán nannet dan bargoveaga ođđa erenoamášáššedovdiiguin.

– Lean ilolaš das, ahte Sámediggi lea geasuheaddji bargosadji ja mii fidnet bargui čeahpes ámmátolbmuid. Oppalohkái sámegielat ja kultuvra addet barggu máŋgasiidda sámeguovllus. Leat hui rámis dán birra olles guovllus, dadjá ságajođiheaddji Näkkäläjärvi.

Buot devdojuvvon barggut leat leamaš almmolaččat ohcan láhkai giđa ja geasi áigge. Sámedikki rabas bargosajit almmuhuvvojit Sámedikki ja bargofápmohálddahusa neahttasiidduin. Jos don leat beroštuvvan bargat Sámedikkis, sáhtát bidjat maiddái rabas ohcamuša.

Sámedikkis barget oktiibuot 75 olbmo. Sámedikki virgenamahusat leat beaiváduvvon bargoortnetođastusa oktavuođas vai dat vástidit otná beaivvi gáibádusaid. Áššemeannudeaddjičálliid virgenamahusat rievdaduvvojedje erenoamášáššedovdin, ságajođiheaddjiid veahkkebargiid virgenamahusat rievdaduvvojedje erenoamášveahkkebargin, láhkačálliid virgenamahusat rievdaduvvojedje juridihkalaš erenoamášáššedovdin ja hálddahushoavdda virgenamahus rievdaduvvui hálddahusjođiheaddjin.

Lassidieđut:

Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi

Pia Ruotsala-Kangasniemi
Hálddahushoavda
040 726 2688
pia.ruotsala@samediggi.fi

Anni Koivisto
Árrabajásgeassináššiid erenoamášáššedovdi
044 775 6560
anni.koivisto@samediggi.fi

Robin Katekeetta
Birasáššiid erenoamášáššedovdi
044 737 9300
robin.katekeetta@samediggi.fi

Aslak Uula Länsman
vs. Sámeealáhusaid ja eanageavaheami erenoamášáššedovdi
044 909 9666
aslak-uula.lansman@samediggi.fi

Edda Sundström
EU-áššiid ja searvvušlaš ovdamiehtama (FPIC) erenoamášáššedovdi
044 527 7078
edda.sundstrom@samediggi.fi