Sámediggi oassálasttii vuođđoskuvlla višuvdnaraportta almmustahttindilálašvuhtii Helssegis guovvamánu 11. beaivve
Vuođđoskuvla 2045: Eallima várás -višuvdna luobahuvvui oahpahusminister Anders Adlercreutzii Helssegis 11.2.2026. Sámedikki dilálašvuođas ovddastii Maarit Kiprianoff. Višuvnna mielde vuođđoskuvlla bargun lea lasihit máhtu ja dáhtu geavahit dieđu oktasaš buori ovddideapmái.
Sámedikkis dilálašvuhtii oassálasttiiga skuvlen- ja oahppamateriálalávdegotti várrelahttu Maarit Kiprianoff ja skuvlenčálli Bigga-Helena Magga.
Višuvnna guovddáš jurdda lea, ahte nana vuođđodieđut ja -dáiddut ovttastuvvet ehtalaš, sosiálalaš ja njuovžilis jurddašeami dáidduide ja nákcii stivret iežas oahppama. Teknologiija jođálmuvvi ovdáneapmi, ekologalaš kriisa ja servodatlaš sierraneapmi hástet skuvlema vuođđobarggu. Skuvlla rollan ii leat dušše ráhkkanahttit nuoraid boahtteáiggi nuppástusaide, muhto ráhkkanahttit eallima várás ja addit návccaid nuppástahttit máilmmi.
Sámegielat ja kultuvra gullet loahpparaportii ja raporttas gávnnahuvvo: ”Sámegielat ja kultuvra gullet mearkkašahttiláhkai álbmotlaš máŋggabealatvuhtii ja rikkis kultuvrralaš historjái ja otná beaivái. Sámegielaid oasil deattuhuvvo boahtteáigge eanetgo ovdal dat, ahte ain lassáneaddji eanetlohku sámemánáin ássá sámiid ruovttuguovllu olggobealde. Sámegielaid ealaskasvuođa sihkkarastin eaktuda mearrediđolaš čovdosiid, mat vuhtiiváldet nuppástuvvi diliid ja oahppiid dárbbuid.”
Ráđđádallangotti ságajođiheaddji luobaha raporta oahpahusministeriijai. Govva: OKM / Elviira Säkkinen
Vuođđoskuvlla boahtteáigebargu lei jagiin 2023–2025. Sámedikki ovddasteaddjin ráđđádallangottis lei skuvlenčálli Bigga-Helena Magga. Ráđđádallangotti lassin bargui oassálaste duháhat olbmot, geat ledje mielde hutkamin ideaid, kommenteremin ja ráhkadeamen višuvnna iešguđetlágan gullamiid bokte.
Višuvdnabarggu guoddi jurddan leat leamaš vuođđoskuvlla givrodagat:
- buohkaide oktasaš nuvttá ja almmolaš doarjagiin ruhtaduvvon vuođđoskuvla,
- rektor ja oahpaheaddjit, geat vástidit skuvlla doaimmas,
- dutkamuššii vuođđuduvvi oahpaheaddjeskuvlen ja skuvlla ovddideapmi, ja
- oahpaheaddji iešstivrejupmi ja pedagogalaš friddjavuohta.
Višuvdna deattuha jagi 2045 vuođđoskuvllas dáido- ja dáiddaávdnasiid, lihkadeami ja fysalašvuođa, skuvlla máŋggabealat doaimma, masa gullet oahpahusa ja bajásgeassima lassin ovdamearkka dihte skuvlaboradeapmi, oahppiidfuolahus ja eará dásseárvvu ovddideaddji doaimmat ja lagasskuvla ja skuvlavisti, mas sáhttá deaivat nuppiid njunnálagaid ja skuvla, mii doarju olbmo ovdáneami.
Lassedieđut:
Bigga-Helena Magga
Skuvlenčálli
040 570 2786 / 010 839 3121
bigga-helena.magga@samediggi.fi
