Jottee nuorâi teivâdemsaje puátá čohčuv sämmilij päikkikuávlun
Mađhâšemautost nuorâi teivâdemsajan muttum Walkers-auto ađai Wauto palvâl sämikuávlu nuorâid čohčâmáánust juovlâmáánu räi 2018. Jottee pargo ulmen lii juksâđ nuorâid, kiäh ääsih vijđáht.
Wauto konsept lii oovtkiärdán: moonnâp toho, kost nuorah láá já pyehtip torvolijd rävisulmuid mieldi sii astoááigán. Fáállun láá käähvi, korttâspeelah já rävisulmuuh savâstâllâmskipárin. Táárbu mield nuorâ finnee meid vuáđulub stivrim eellimtilásis.
Aseman Lapset ry oomâst Wauto já koordinist ton tooimâ. Sämmilij päikkikuávlust tooimâst västid Sämitige nuorâirääđi já tot olášuttoo ohtsâšpargoost Iänuduv, Ucjuv já Aanaar kieldâiguin. Tooimâst láá mieldi meid sämikielâliih rijjâtátuliih.
Auto, mii puátá sämmilij päikkikuávlun, lii ohtâ Suomâst jottee neelji Wautost já ton toimâkuávlun lii eromâšávt Lappi já eres Tave-Suomâ. Ovdil ko tot puátá Sáámán, tot lii toimâm Kittâl, Suáđikylá já Oulu kuávluin.
– Sämitige nuorâirääđist lii ulmen ovdediđ Wauto peht sämikielâlâš nuorâipargo, tondiet ko ohtâgin kieldâ ij tom tääl ornii. Lii tergâd, ete säminuorâin lii máhđulâšvuotâ kevttiđ eenikielâ meid astoääigi, muštâl nuorâirääđi saavâjođetteijee Risten Mustonen.
– Algâive feeriimij vuáđuld Wauto heivee hirmâd pyereest tooimân Laapi uccâ kyláin já kuhes maađhijn. Wautoin mij lep teivâm nuorâid, kiäh ääsih nuuvt kieldâkuávdáin ko ucebijn kyláin já kiäh iä maŋgii peesâ mudoi mieldi nuorâipaargon. Nuorah láá čielgâsávt navdâšâm Wautost já torvolâš rävisulmui mieldioromist, iätá Wauto-koordinaattor Niilo Karjalainen Aseman Lapset -seervist.
Ohtsâšpargokuoimijd já median uárnejuvvoo viärmádâh- já tiäđáttâstilálâšvuotâ tuorâstuv 24.5. tme 14-16 Avelist nuorâiviste Stönöst. Tilálâšvuotân pyehtih puáttiđ puohah, kiäid toimâ kiäsut.
Lasetiäđuh:
Wauto tooimâst sämmilij päikkikuávlust:
Kaisa Tapiola-Länsman, Sämitige nuorâičällee, 050 382 5179
kaisa.tapiola-lansman@samediggi.fi
Wauto tooimâst almolávt:
Niilo Karjalainen, Wauto-toimâvästideijee, Aseman Lapset ry, p. 040 575 9364
niilo.karjalainen@asemanlapset.fi
Aseman Lapset ry lii ive 1990 vuáđudum poolitlávt já oskoldâhlávt čoonnâsmettum väldikodálâš servi. Seervi vuáđupargon lii paarnij, nuorâi, perrui já oles ohtsâškode pyereestvaijeem pyeredem sehe helbâm estim.
Walkers-toimâ lii Aseman Lapset ry:st ovdedum muuneeld estee nuorâipargo, mii vuáđuduvá rijjâtátulij rävisulmui adelem ááigán já mieldioromân.
Wauto-toimâ lii uási Aseman Lapset ry Walkers On Wheels -haavâ. Haahâ lii ruttâdum vuárbumvuáittuvarijguin máttááttâs- já kulttuurministeriö sierânâstorjuin. Ohtâ auto lii hahhum Suomen Lions-lito nuurrâmpuáhtusijguin já ohtâ Eevi ja Eemil Tannisen säätiö ruđâiguin. Haavâst joteh neljijn autoin pirrâ Suomâ já siämmást sij viggeh vuáháduttiđ jottee nuorâipargo vuovijd kuávloid.
