Sämitigge tuárjui sämitiggelahâiävtuttâs vuáđulahâváljukode almos kulâmist – “Mij lep pyeredemmieláin joođoost”

Vuáđulahâváljukode almos kuullâm sämitiggelahâiävtuttâsâst aalgij tuorâstuv 17.10. tme 8 ovdâskode Uccâparlament auditoriost.

Sämitiggeest kulâmân uásálistii saavâjođetteijee Pirita Näkkäläjärvi, I värisaavâjođetteijee Leo Aikio, II värisaavâjođetteijee Tuomas Aslak Juuso já lahâčällee Kalle Varis.

– Suomâ Sämitigge tuárju uáiviminister Petteri Orpo (kok) haldâttâs iävtuttâs sämitiggelaavâst. Iävtuttâs lii maaŋgâ haldâttâspaje ääigi keččâlum ubâlâšvuotâ, mon mij pastep tuhhiittiđ. Mij lep pyeredemmieláin joođoost, iätá saavâjođetteijeejuávkku Pirita Näkkäläjärvi, Leo Aikio já Tuomas Aslak Juuso.

Koččâmušâst Orpo haldâttâs oovtâmielâlâš lahâiävtuttâs

Saavâjođetteijee Näkkäläjärvi muštâlij sahâvuárustis sämitiggelahâiävtuttâs tuáváást, lahâiävtuttâs merhâšuumeest sämikielâi já -kulttuur sirdemist puáttee suhâpuolváid sehe sämikielâi kuávdáš sajaduvâst sämmilii siärváduvlii elimist.

– Suomâst ellee kulmâ sämikielâ já sämikulttuur láá rigesvuođah. Kielâi já kulttuur sirdem puáttee suhâpuolváid lii mijjân puoh tehálumos äšši. Mij tarbâšep toos kuittâg syemmilii ohtsâškode iše já noonâ toorjân meid haldâttâs iävtuttâs miäldásii sämitiggelaavâ, eeđâi saavâjođetteijee Näkkäläjärvi sahâvuárustis.

Näkkäläjärvi muštottij, ete sämitiggelahâiävtuttâs lii uáiviminister Petteri Orpo (kok) haldâttâsohjelmist já ete laahâ lii puohtum ovdâskoodán oovtâmielâlâš haldâttâs iävtuttâssân. Sämitige olesčuákkim tuárju lahâiävtuttâs jienâiguin 15–3, 1 kuárus.

Värisaavâjođetteijeeh tiäduttáin olmoošvuoigâdvuođâid já uásálâšvuođâ

Sämitige II värisaavâjođetteijee Tuomas Aslak Juuso sahâvuáru kieđâvušâi Suomâ aalmugijkoskâsij kenigâsvuođâi já algâaalmugvuoigâdvuođâi olášume. Juuso pajedij sahâvuárustis oovdân OA olmoošvuoigâdvuotâkomitea já näliolgoštem vuástásâš komitea (CERD) Suomân iivij 2019 já 2022 adelem laŋgâtteijee čuávdusijd sämitiggelaavâ tulkkuumist. Komiteah kenigitteh Suomâ tärhistiđ sämitiggelaavâ tagarin, mii kunnijât sämmilij jiešmeridemvuoigâdvuođâ.

– Lahâiävtuttâs lii pyeri kompromis. Tot luhostuvá olášuttiđ ovdiist pyerebeht sehe Suomâ aalmugijkoskâsijd čonnâsmijd, olmoošvuoigâdvuođâid, Suomâ vuáđulaavâ já eres aalmuglii lahâasâttem, mii kuáská sämmiláid, eeđâi II värisaavâjođetteijee Juuso sahâvuárustis.

I värisaavâjođetteijee Leo Aikio pajedij sahâvuárustis oovdân iävtuttum ohtsâštoimâm- já ráđádâllâmkenigâsvuođâ, mon ulmen lii visásmittiđ, ete virgeomâhááh ráđádâleh sämmilijguin mittomeerrin ohtsâšibárdâs.

– Uđđâ laahâ miäruštâlâččij čielgâsubbooht spellâmnjuolgâdusâid maaŋgâ jieškođe-uv äššiubâlâšvuođâ uásild. Čielgâsub njuolgâdusah hämmejeh ovdiist pyereeb vuáđu meid sämmilij päikkikuávlu eellimvyeimi já irâttâstooimâ ovdedem várás. Čielgâ spellâmnjuolgâdusah pyeredeh munedemmáhđulâšvuođâid, eeđâi I värisaavâjođetteijee Aikio sahâvuárustis.

Tilálâšvuotâ já saavah kávnojeh neetist

Kuullâm puáhtá keččâđ nettivuárkkán čujottâsâst https://verkkolahetys.eduskunta.fi/fi/

Sämitige ovdâsteijei sahâvuáruh vuáđulahâváljukode almos kulâmist sämitiggelahâiävtuttâsâst 17.10.:

Saavâjođetteijee Pirita Näkkäläjärvi sahâvuáru (suomâkielân)

I värisaavâjođetteijee Leo Aikio sahâvuáru (suomâkielân)

II värisaavâjođetteijee Tuomas Aslak Juuso sahâvuáru (suomâkielân)

Sämitige ciälkkámuš ovdâskode vuáđulahâváljukoodán haldâttâs iävtuttâsâst (HE 100/2023) laahhân sämitiggeest adelum laavâ já rikoslaavâ 40 lovo  11 § nubásmitmist

Lasetiäđuh:

Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi

Liiŋkah:

Haldâttâs iävtuttâs (HE 100/2023 vp) ovdâskoodán laahhân sämitiggeest adelum laavâ já rikoslaavâ 40 lovo 11 § nubásmitmist