Sääʹmteʹǧǧ tuärjjii sääʹmteʹǧǧlääʹǩǩeʹtǩǩõõzz vuâđđlääʹǩǩvälljkååʹdd õõlmâs kuullmõõžžâst  – “Jååʹttep õõudâsraajji miõlin”

Vuâđđlääʹǩǩvälljkååʹdd õõlmâs kuullmõš sääʹmteʹǧǧlääʹǩǩeʹtǩǩõõzzâst aaʹlji nelljdpeeiʹv 17.10. čiâss 8 ääiʹj eeʹttiǩ-kååʹdd Uʹccparlameeʹnt auditoriost.

Sääʹmteeʹǧǧest kuullmõʹšše vuässõʹtte saaǥǥjååʹđteei Pirita Näkkäläjärvi, I väärrsaaǥǥjååʹđteei Leo Aikio, II väärrsaaǥǥjååʹđteei Tuomas Aslak Juuso di lääʹǩǩpiisar Kalle Varis.

Lääʹdd Sääʹmteʹǧǧ tuärjjad väʹlddminister Petteri Orpo (kok.) halltõõzz eʹtǩǩõõzz sääʹmteʹǧǧlääʹjjest. Eʹtǩǩõs lij määŋg halltõspââʹjest joortum obbvuõtt, koonn pâʹsttep priimmâd. Jååʹttep õõudâsraajji miõlin, särnn saaǥǥjååʹđteeikåʹdd Pirita Näkkäläjärvi, Leo Aikio da Tuomas Aslak Juuso.

Kõõččmõõžžâst Orpo halltõõzz õõutmiõllsaž lääʹǩǩeʹtǩǩõs

Saaǥǥjååʹđteei Näkkäläjärvi mainsti saakkvuârstes sääʹmteʹǧǧlääʹǩǩeʹtǩǩõõzz tuâkksin, lääʹǩǩeʹtǩǩõõzz miârktõõzzâst sääʹmǩiõli da kulttuur seʹrddma pueʹtti puõlvvõõǥǥid di sääʹmǩiõli  kõskksââʹjest säʹmmlai õhttsallaš jieʹllmest.

– Lääʹddjânnmest jieʹlli kolmm sääʹmǩiõl da sääʹmkulttuur lie reeʹǧǧesvuõtt. Ǩiõli da kulttuur serddmõš pueʹtti puõlvvõõǥǥid miârkkšââvv miʹjjid puk pukin. Taarbšep tõõzz kuuitâǥ lääʹdd õhttsažkååʹdd vieʹǩǩ da raavâs tuärjjõsân še halltõõzz eʹtǩǩõõzz meâldlaž sääʹmteʹǧǧlääʹjj, säärnai saaǥǥjååʹđteei Näkkäläjärvi saakkvuârstes.

Saaǥǥjååʹđteei Näkkäläjärvi muuštʼti, što sääʹmteʹǧǧlääʹǩǩeʹtǩǩõs lij väʹlddminister Petteri Orpo halltõsprograammâst da što lääʹǩǩ lij puhttum eeʹttiǩ-kådda õõutmiõʹlle halltõõzz eʹttǩõsân. Sääʹmteeʹǧǧ tiuddsååbbar tuärjjad lääʹǥǥeʹtǩǩõõzz jiõnin 15–3, 1 kuâras.

Väärrsaaǥǥjååʹđteei kaʹǧǧe ooumažvuõiggâdvuõđid da vuässadvuõđ

Sääʹmteeʹǧǧ II väärrsaaǥǥjååʹđteei Tuomas Aslak Juuso saakkvuârr ǩiõttʼtõõli Lääʹddjânnam meeraikõskksaž õõlǥtõõzzid da alggmeervuõiggâdvuõđid. Juuso kaaggi saakkvuârstes õuʹdde ÕM ooumažvuõiggâdvuõttkomitea da rooddsuäʹrddem vuâsttsaž komitea (CERD) Lääʹddjânnma iiʹjjin 2019 da 2022 uʹvddem viârteei čåuddmõõžžid sääʹmteʹǧǧlääʹjj toʹlǩǩummšest. Komitea õõlǥte Lääʹddjânnam taʹrǩsted sääʹmteʹǧǧlääʹjj säʹmmlai jiõččmieʹrreemvuõiggâdvuõđ ciʹsttjeeʹjen.

– Lääʹǩǩeʹtǩǩõs lij toiʹmmjeei kompromiss. Tõt ooʹnnast tieuʹdded ääiʹjbuužž pueʹrben nuʹtt Lääʹddjânnam meeraikõskksaž čõõnõõttmõõžžid, ooumažvuõiggâdvuõđid, Lääʹdd vuâđđlääʹjj ǥu säʹmmlaid kuõskki jeeʹres meersaž lääʹjjšiõttummuž, säärnai II väärrsaaǥǥjååʹđteei Juuso saakkvuârstes.

I väärrsaaǥǥjååʹđteei Leo Aikio kaaggi saakkvuârstes õuʹdde eʹtǩǩuum õhttsažtoiʹmmjem- da saǥstõõllâmõõlǥtõõzz, kååʹtt pârgg ainsmâʹtted, što veʹrǧǧneeʹǩǩ saǥstâʹlle säʹmmlaivuiʹm õhttsažfiʹttjõs miõlâst.

– Ođđ lääʹǩǩ čiõlǥeʹči vuâkkõõzzid määŋg jeeʹres äʹššobbvuõđ peäʹlnn. Čiõlggsab vuâkkõõzz räʹjje še õõuʹdbuužž pueʹrab vuâđ säʹmmlai dommvuuʹd jieʹllemviõǥǥ da põõrǥâstååim õõuʹdummša. Čiõlgg vuâkkõõzz pueʹree aaʹšši lokkuvälddmõõžž õuddǩiõʹtte, säärnai I väärrsaaǥǥjååʹđteei Aikio saakkvuârstes.

Kuullmõš da saakkvuâr käunnʼje neeʹttest

Kuullmõõžž vuäitt ǩiõččâd neeʹttest addrõõzzâst https://verkkolahetys.eduskunta.fi/fi/

Sääʹmteeʹǧǧ eeʹttkõʹsttji saakkvuâr vuâđđlääʹǩǩvälljkååʹdd sääʹmteʹǧǧlääʹǩǩeʹtǩǩõõzz pirrsaž õõlmâs kuullmõõžžâst 17.10.:

Saaǥǥjååʹđteei Pirita Näkkäläjärvi saakkvuârr (lääddas)

I väärrsaaǥǥjååʹđteei Leo Aikio saakkvuârr (lääddas)

II väärrsaaǥǥjååʹđteei Tuomas Aslak Juuso saakkvuârr (lääddas)

Sääʹmteeʹǧǧ  ceälkkmõš eeʹttiǩ-kååʹdd vuâđđlääʹǩǩvälljkådda halltõõzz eʹtǩǩõõzzâst (HE 100/2023 vp) eeʹttiǩ-kådda lääʹǩǩen sääʹmteeʹǧǧest uvddum lääʹjj da reäkkõslääʹjj 40 lååǥǥ 11 § muʹttmest (pdf)

Lââʹssteâđ:

Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi

Liiŋk:

Halltõõzz eʹtǩǩõs (HE 100/2023 vp) eeʹttiǩ-kådda lääʹǩǩen sääʹmteeʹǧǧest uvddum lääʹjj da reäkkõslääʹjj 40 lååǥǥ 11 § muʹttmest