Sämitiigán ruttâdem algâaalmugkielâi ive várás
Ive 2019 lii aalmugijkoskâsâš algâaalmugkielâi teemaihe já Sämitige lii nanosávt mieldi teemaive olášutmist. Sämitige toimân lii orniđ jieš tooimâ teemaive ääigi sehe movtijdittiđ eres tuáimeid uásálistiđ teemaihán.
– Máttááttâs- já kulttuurministeriö meriruuđâ vievâst Sämitigge puáhtá ovdediđ sämikielâi oinum Suomâst já muštoot kielâi maaŋgânálásâšvuođâst sehe ovdediđ uđđâ kielâkevttimareenaid. Lii eromâš tehálâš, ete staatâ uásálist torjuin teemaihán, illood Sämitige saavâjođetteijee Tiina Sanila Aikio.
Vuávámnáál láá materiaaleh vávváást kidâ elilâm ulmuid: sämikielâliih vávvákirjeh, sämikielâlâš ivnelávgu, ivnimkirje, škovlâláid nuorâi sänikirjeheiviittâs já kielâkampanjah, ravvuuh kielâvaljiimân vaanhimáid já áhhoid já äijiháid, konserteh, kielâkevttimân movtijdeijee materiaal, kirjeh já ennuv eres.
– Torjuin mij pyehtip olášuttiđ maaŋgâid aašijd, maid mij ep lah ovdil pastam porgâđ. Sämikielâi iäláskittempargo perruin sehe párnái já nuorâi kooskâst lii ovdánâm ennuv já mij mielâst lii eidu olmâ äigi pyehtiđ positiivlii movtijdittem kielâ kevttimân sierâ taasijn já návt uásálistiđ mii uásild teemaihán, juátká haavâ västideijee kielâtorvočällee Anne Kirste Aikio.
Lasseen Sämitigge movtijdit teemaive ääigi irâttâsâid, virgeomâháid já eres tuáimeid Suomâst viijđáht uásálistiđ sämikielâi oinum lasseetmân oles enâmist. Tave-enâmij Sämitigeh uárnejeh oovtâst Säämi Kielâoho (Sámi Giellavahkku) 21. – 27.10.2019. Oho ulmen lii, ete sierâ tuáimeeh Suomâst, Taažâst já Ruotâst váldáččii mahtnii sämikielâid huámmášumán toimâstis.
Sämitigge mieđeet ive loopâst Säämi kielâtaho -palhâšume. Palhâšume mieđettuvvoo virgeomâhâžân tâi siärvádâhân, kote lii toimâstis váldám huámmášumán teemaive tâi mudoi ánsulávt porgâm sämikielâ oovdedmân Suomâst.
Máttááttâs- já kulttuurministeriö mieđettij Sämitiigán ruttâdem OA algâaalmugkielâi ive oovdânpyehtimân. Ruttâdem mieđettii ministeriö almos taiđuu já kulttuur ovdedeijee haavâi sierânâstorjuin já torjuu meeri lii ohtsis suulân 47 000 eurod. Haavâst lii tárguttâs olášuttiđ sämikielâ kevttimân movtijdeijee kampanjaid, lasettiđ sämikielâi oinum Suomâst já rähtiđ eromâšávt párnáid já nuoráid kielâ oppâmân já kiävtun tuárjoo tábáhtusâid já materiaalijd. Haavâ sierâ oosijd olašuteh oovtâst sierâ tuáimeiguin, tego Sämitige nuorâirađđijn já párnáikulttuurkuávdáš Mánnuin.
Lasetiäđuh:
Saavâjođetteijee Tiina Sanila-Aikio, puh. 050 300 1780, tiina.sanila-aikio(at)samediggi.fi
Kielâtorvočällee Anne Kirste Aikio, puh. 010 839 3124, anne-kirste.aikio(at)samediggi.fi
Kove: Kevin Francett/ Sämitigge
