Sámediggi lágida sámeservviide dilálašvuođaid, main dat muitala duohtavuohta- ja soabadanproseassa ovdáneami dili birra

Sámediggi lágida Teams-dilálašvuođaid, main dat muitala áigeguovdilis dili birra sámiid duohtavuohta- ja soabadankomišuvnna loahpparaportta čuovvolanbarggu ovdáneamis ja boahttevaš muttuin.

Dilálašvuođaid áigumuššan lea lassin gullat sámeservviid oainnuid ja rávvagiid proseassa boahttevaš muttuid várás. Ságastallamiin gullat erenoamážit oainnuid das, makkár áššiid ja geahččanguovlluid boahttevaš muttuin livččii dehálaš buktit ovdan.

Dilálašvuođat eai leat almmolaččat, dat leat oaivvilduvvon sámeservviid ovddasteaddjiide ja lahtuide. Sámeservviid lahtuide lea dieđihuvvon dilálašvuođaid birra servviid bokte.

Sámediggi lea dál áiddo bargamin sámiid duohtavuohta- ja soabadankomišuvnna loahpparaportta ávžžuhusaid ovddideami ovdii. Dili geahčadeamit sámeservviide leat oassi dán barggus. Dat čohkkejit oktii sámeservodaga oainnuid soabadanbarggu joatkimis ja dan boahttevuođas. Sámediggi ságastallá duohtavuohta- ja soabadanbarggus viidát iešguđet sámedoaibmiiguin, dego nuortalaččaid siidačoahkkimiin, Sámi bálgosat rs:n, sámeguovllu bálgosiiguin ja Deanu osolašgottiiguin.

Lassidieđut:

Pirita Näkkäläjärvi

Ságajođiheaddji

pirita.nakkalajarvi@samediggi.fi

Tel. +358 44 753 3766