Bådåddjo girdilihkohisvuođas 50 jagi – Sámediggi muitá lihkohisvuođas jápmán olbmuid jaskes bottuin ja morašlevgemiin
Snåsa sámiid konferánsa 1974. Gur. Nils-Aslak Valkeapää, Juhani Nousuniemi ja Pekka Lukkari. Govas leat guoros sajit, go lihkohisvuođas jávkan lahttut váilot sajiin. Govva: Juhani Nousuniemi arkiiva
Mánnodaga 24.6.2024 dievvá 50 jagi Bådåddjo girdilihkohisvuođas, mas jávke vihtta sámi parlameantta lahtu ja mášena girdi.
Sámi parlameantta lahtut ledje jođus davviriikkalaš sámi konferánsii Norgga beallái, go sin fievrridan unna girdinmášen jávkkai Bådåddjo lahkosis 24.6.1974. Mášena eai leat velge gávdnán.
Girdinmášena mielde jávke sámi parlameantta vuosttaš ságadoalli Reidar Suomenrinne Ohcejogas, Jouni Aikio Vuohčus, Uula A. Länsman Áŋŋelis, Artto Sverloff Čeavetjávrris ja Jouni J. Vest Roavesávvonis sihke girdimášena girdi Pekka Niemi.
– Sámediggi gudnejahttá lihkohisvuođas jápmán olbmuid muittu ja doallá jaskes bottu Sámedikki dievasčoahkkima álggus gaskavahku 19.6. ja ordne morašlevgema Sajosis 24.6., dadjá Sámedikki ságajođiheaddji Pirita Näkkäläjärvi.
