Sámediggi almmuha ohcan láhkai ságajođiheaddji veahkkebargi doaimma

Bargu álgá soahpamuša mielde nu jođánit go vejolaš, ja joatkašuvvá 31.12.2023 rádjai.

Sámedikki ságajođiheaddji veahkkebargi barggut mearrašuvvet Sámedikki bargoortnega 7 b § mielde. Ságajođiheaddji veahkkebargi bargguide gullá ee veahkehit Sámedikki ságajođiheaddji doaimmastis; dárbbu mielde válmmaštallat ja ovdan buktit stivrra ja Sámedikki čoahkkimii doaibmasuorgásis gullevaš áššiid; válmmaštallat ságajođiheaddji ja hálddahushoavdda sutnje sierra mearridan bargguid ja veahkehit dárbbu mielde várreságajođiheaddjiid.

Gelbbolašvuođagáibádussan lea heivvolaš allaskuvladutkkus. Lassin gáibiduvvo sámegiela dáidu (ásahus 1727/95). Barggu ceavzilis dikšun eaktuda sámekultuvrra viiddes dovdama, hálddahuslaš bargguid buori dovdama, buori streassagierdannávcca, njuovžilvuođa sihke buriid organiseren- ja ovttasbargandáidduid.

Bálká mearrašuvvá Sámedikki bálkávuogádaga gáibádusdási IV/II mielde (vuođđobálká 2760,63 e/mb). Vuođđobálkká lassin máksojuvvojit sámeguovllu lassi 24 % ja ahkelasit, mat mearrašuvvet bargohárjánumi mielde. Barggus čuvvojuvvo 6 mb geahččalanáigi.

Bargoohcamuša mildosiiguin galgá doaimmahit Suoma Sámediggái 31.7.2022 rádjai čujuhussii: https://www.sympahr.net/public/pq.aspx?7bdd0b83

Lassidieđuid barggus addá ságajođiheaddji Tuomas Aslak Juuso tuomas.juuso(at)samediggi.fi, tel. 040 687 3394 ja hálddahushoavda Pia Ruotsala-Kangasniemi, pia.ruotsala(at)samediggi.fi, tel. +358 40 726 2688.

Sámedikki doibmii sáhttá oahpásmit čujuhusas www.samediggi.fi

Anáris 29.6.2022
Sámediggi