Sámediggi lea fuolas mearrádusas giddet Ohcejoga seaŋgaossodaga
Lappi buresveadjinguovllu guovlostivra mearridii mánnodaga 28.10.2024 čoahkkimisttis giddet máŋga seaŋgaossodaga Lappi buresveadjinguovllus. Ohcejoga seaŋgaossodat gullá maiddái daidda ossodagaide, maid áigot giddet. Lappi buresveadjinguovlu áigu ordnet sadjái boahtti bálvalusaid ruovttubuohcceviesu, ruovttudivššu sihke vuosttašdivššu bálvalusaid ovttastahttimiin. Seaŋgaossodagaid gidden laktása Lappi buresveadjinguovllu sosiála- ja dearvvašvuođafuolahusa bálvalanfierpmi nuppástusaide.
Sámediggi lea atnán Ohcejoga seaŋgaossodaga giddema heittogin jo giđa rájes ja buktán ovdan oainnuset nu cealkámušain go sámediggelága 9 § mielde čađahuvvon ráđđádallamiin.
– Mii leat fuolas bálvalandási hedjoneamis Ohcejogas. Dát nuppástusat eai oaččole dagahit dan, ahte olbmuide šaddá dorvvuhis dovdu. Mii oaidnit, ahte lagašbálvalusat dorjot oasildis guovllu eallinfámu ja dahket vejolažžan olbmuid ássama iežaset ruovttuguovlluin oassin iežaset servošiid ja sogaid. Giddenmearrádusaid ja sajiid meari dárkkodeami oktavuođas galggaši sihkkarastit, ahte mátki seaŋgaossodatdikšui ii šatta geaŋge buohta menddo guhkkin, dadjá Sámedikki II várreságadoalli Tuomas Aslak Juuso.
Sámegielat sode-bálvalusain ii leat heivehanmunni
Sámediggi ráđđádalai Lappi buresveadjinguovlluin bálvalanfierpmi nuppástusain sihke ovddit válmmaštallama áigge giđđat 2024, ja guovtte háve čakčat 2024. Čavčča ráđđádallamat ledje 2.10.2024 ja 15.10.2024. Ráđđádállamat nohke Ohcejoga seaŋgaossodaga giddema oasil sierramielalašvuhtii.
Sámediggi oaidná dehálažžan, ahte Lappi buresveadjinguovllus dovdat sámegielat bálvalusaid jo gárvvisin heajos dili, mas ii leat heivehanmunni. Sámedikki oainnu mielde Ohcejoga seaŋgaossodaga oasil livččii galgan vuodjut ovdal doaimma ovddideapmái, dego sámegielat ja kulturvuđot bálvalusaid buorideapmái, go bálvalusaid heaittiheapmái. Sámediggi válddii oaivila hábmedettiin vuhtii báikkálaččaid oainnuid, ovdamearkan seaŋgaossodaga bealis čoggojuvvon álbmotadreassa, mas doarjaledje seaŋgaossodaga seailluheami bealis.
– Ohcejogas galgá dorvvastit boahttevuođasge birra jándora bálvalusaid ossodathápmásažžan ja buohccedivššu gearggusvuođain. Bálvalusaid ii sáhte heaittihit nu, ahte ii leat sihkkarvuohta das, ahte dárbbašlaš, buhttejeaddji bálvalus lea leahkime ja ahte sadjemearit leat doarvái guovllu dárbbuide. Pasieantadorvvolašvuođa galgá bajásdoallat vuhtiiváldimin dan, ahte leat dilit, main lagabus bálvalusaid sáhtášii birget ruovttus ovdamearkan ruovttubuohcceviesu doarjagiin, muhto guhkes mátkkiid dihte lea dorvvolašvuođa dáfus buoremus, ahte pasieanta sáhttá leat iežas ruovttu sajis sode-fuolahusa doaibmasajis lagašbálvalusprinsihpa mielde, dadjá Juuso.
Doaibmi bálvalusaid galgá ollašuhttit ovttaveardásaččat
Sámediggi lea ráđđádallamiin ja cealkámušain buktán ovdan maiddái eará bálvalanfierpmi nuppástusaid guoski fuomášumiid.
Sámediggi oaidná earenoamáš dehálažžan, ahte nu Ohcejogas go eará sajiinge sámiid ruovttuguovllus giddejuvvo earenoamáš fuomášupmi sámegielat ja kulturvuđot bálvalusaid ovddideapmái, vái sápmelaš áššehasaid rievttit sode-bálvalusain ollašuvvet. Doaibmi sosiála- ja dearvvašvuođafuolahusa bálvalusaid galgá ollašuhttit ovttaveardásaččat nu ahte nu gielalaš, kultuvrralaš go guovllolašge olahahttivuohta ollašuvvet.
Lassedieđut:
Tuomas Aslak Juuso
II várreságadoalli, Sámedikki sosiála- ja dearvvašvuođasektora vásttolaš ságadoalli
040 687 3394
tuomas.juuso@samediggi.fi
