Sámediggi váiddii Eanodaga Jiehtáčearu várrenmearrádusas
Sámediggi váiddii Tukes mearrádusas dohkkehit ruvkelága miel várrema Eanodaga Jiehtáčerrui. Sámedikki mielde várrenalmmuhusa birra dieđihettiin eai leat čuvvon sámi giellalága. Dasa lassin várren guoská guvlui, mas lea earenoamáš mearkkašupmi sámiid árbevirolaš ealáhusa, boazodoalu hárjeheapmái.
Sámediggi čujuha váidaga ággan dan, ahte sámi giellalága eai leat čuvvon, man geažil ášši gieđahallamis Tukes heivehan meannudeapmi olggušta guovllu sámegielat olbmuid ja maiddái sápmelaččaid eamiálbmogin.
– Tukes ii leat čuvvon ášši dieđiheamis sámi giellalága ja dieđuideamet mielde ášši birra ii leat dieđihuvvon ollenge sámegillii. Dás lea dáhpáhuvvan čielga meannudanfeaila, dadjá sátnejođiheaddji Tuomas Aslak Juuso váidaga ákkain.
Sámedikki ipmárdusa mielde dán guvlui ii Suoma vuođđolága vuođul jáhku mielde sáhte vuođđudit ruvkke, iige danin guvlui galgga mieđihit guovlovárrema, mii viggá oažžut málbmaohcanlobi. Dálá dilis sámiid árbevirolaš ealáhusaid hárjeheaddjit gárttašedje čáhkket ruvkeindustriija ovddas, mii livččii vuostá sámiid vuođđolágalaš vuoigatvuođa doalahit ja ovddidit iežaset kultuvrra ja dákko bokte maiddái ealáhusaid. Seammás dat mearkkašivččii maiddái eamiálbmogiid vuoigatvuođaid loavkideami.
Juo dan sivas, ahte várren guoská guvlui, mas lea earenoamáš mearkkašupmi sámiid árbevirolaš ealáhusaid hárjeheapmái, berre várrema dohkkehanmearrádusa Sámedikki mielde gomihit ja máhcahit ášši Tukes gieđahallamii. Suomas gustojeaddji ruvkelága mearrádusat leat dán oasis váilevaččat ja áššis berre heivehit vuođđolága ovdasadji-prinsihpa.
– Ruvkelága mearrádusaid sadjái ášši galggašedje čoavdit njuolga vuođđolága vuođul dainna ákkain, ahte dán guovllus sámiin lea vuoigatvuohta doalahit ja ovddidit iežaset giela ja kultuvrra. Dása gullet sámiid árbevirolaš ealáhusat degomat boazodoallu, man ii sáhte hárjehit oktanaga ruvkkiin, mii guvlui vuođđuduvvošii. Vuođđolága oaivvildan vuoigŋa ii ollašuva ruvkelága vuollásaš doaimmain, joatká Juuso.
Várrenalmmuhusa mielde ohcci viggá háhkat alcces oktovuoigatvuođa ohcat guvlui maŋŋelis málbmaohcanlobi. Lobi ulbmilin lea ávkkástallangelbbolaš ruvkeminerálagearddi gávdnon ja ruvkke vuođđudeapmi ávkkástallan dihte vejolaš gearddi.
Sámedikki cealkámuš Davvi-Suoma hálddahusriektái 18.5.2020
Lassedieđut:
sátnejođiheaddji Tuomas Aslak Juuso tlf. 040 687 3394, tuomas.juuso(at)samediggi.fi
láhkačálli Kalle Varis tlf. 050 384 7040, kalle.varis(at)samediggi.fi
