Sámediggi vuostálastá Anára ja Soađegili guovllu várrenmearrádusaid
Dorvvolašvuođa- ja kemikálavirgebáiki (Tukes) lea ruvkelága vuođul 14.10.2021 dohkkehan Arctic Minerals Exploration AB:a guokte várrenalmmuhusa Anára ja Soađegili gielddaid viidodahkii. Sámediggi vuostálastá várrenmearrádusaid, dasgo málbmaohcan ja ruvkedoaibma eai heive oktii sámiid ruovttuguovllu hearkkes luondduin, divrras čázádagain ja sámiid árbevirolaš ealáhusaiguin.
Mearrádusaid mielde várrejeaddji dárkkuhussan lea bargat guovlluin laiggahatohcama ja geologalaš kártema sihke ohcat guvlui málbmaohcanlobi maŋimustá jagi 2023 áigge. Várrejuvvon guovllut gokčet oktiibuot 943 njealjehaskilomehtera sturrosaš viidodaga Anára gielddas ja 890 njealjehaskilomehtera sturrosaš viidodaga Anára ja Soađegili gielddain.
Várrejuvvon guovllut leat obban sámiid ruovttuguovllus, muhtin muddui nuortalaččaid guovllus, golmma bálgosa viidodagas sihke dehálaš čázádagaid lahkosis. Várrejuvvon guovlluin leat maiddái máŋggat boares sámebáikkit ja Njellima ássanguovllut gullet riikkaviidosaččat divrras eatnamiidda. Guovlluin bargojuvvo sámiid buot árbevirolaš ealáhusaiguin.
– Várrenmearrádus dagaha árbevirolaš ealáhusaiguin bargi sápmelaččaide eahpesihkkaris dili, mas ealáhusaiguin bargan hedjona geažos áigge. Nuorat eai vealttakeahttá duostta bargagoahtit árbevirolaš ealáhusaiguin, árvala Sámedikki II várreságajođiheaddji Leo Aikio.
Ruvkelága ođastus, mii lea dál jođus, lea dehálaš sápmelaččaide. Ruvkelága ođasmahttimis lea vealtameahttun váldit vuhtii sámiid sajádaga eamiálbmogin ja vuoigatvuođaid, mat leat sihkkaraston sámiide sihke álbmotlaš láhkaásaheamis go riikkaidgaskasaš soahpamušainge.
– Ruvkelága heiveheamis galgá bidjat dálá stuorát deattu sámiid vuoigatvuođaide eamiálbmogin doalahit ja ovddidit giela, kultuvrra ja árbevirolaš ealáhusaid. Dál mii sáhttit dušše čuovvut bálddas, go sámiid ruovttuguovllu eatnamat várrejuvvojit málbmaohcamii, dadjá Sámedikki II várreságajođiheaddji Leo Aikio.
Sámedikki mielde Sámediggái, Nuortalaččaid siidačoahkkimii ja guoskevaš bálgosii galgá dáhkidit vejolašvuođa cealkit ja váidalit dahkkon várrenmearrádusain. Fámus leahkki ruvkelága vuođul Sámediggái eai doaimmahuvvo kopiijat várrenmearrádusain, mat čuhcet sámiid ruovttuguvlui, iige Sámedikkis leat váidalanvuoigatvuohta Tukes várrenmearrádusain.
Guoskevaš Tukes várrenmearrádusain sáhttá váidalit Davvi-Suoma hálddahusriektái 22.11.2021 rádjai (37 beaivve mearrádusa addinbeaivvis dan áigemearrái logakeahttá). Váidalit oažžu dat, geasa mearrádus lea čuozihuvvon dahje gean vuoigatvuhtii, geatnegasvuhtii dahje ovdui mearrádus njuolgga váikkuha.
- Sámedikki bealiváldin 22.11.2021
- Tukes várrenmearrádus Anár (Nellim 1)
- Tukes várrenmearrádus Anár ja Soađegilli (Liljarova 2)
Lassidieđut:
Leo Aikio
II várreságajođiheaddji
040 621 6505
leo.aikio@samediggi.fi
