Sámegielat gáiddusoahpahusa giđđalohkanbadji álggii 10.1.2022 – Čuovvovaš jagi almmuheapmi rahpasa njukčamánus
Sámegielaid gáiddusoahpahusa pilohttafitnu giđđalohkanbadji álggii vuossárgga 10.1.2022. Fitnus studerejit dál 109 oahppi golmma sámegillii.
– Giđđalohkanbaji áigge oahpásmuvvat ain sápmelaš jahkegirdui. Giđa áigge oahpásmuvvat ee. mo sápmelaš beassážiid leat ávvudan dolin ja mo daid ávvudit otná beaivve. Kulturgussiid vehkiin oahppit besset oahpásmuvvat iežaset kultuvrii iešguđet surggiid čehpiid geahččanguovllus, muitala anárašgiela oahpaheaddji Henna Aikio.
Arla Magga, guhte bargá Sámedikkis, lea máhccan koordináhtora bargui. Son dikšu oktavuođaid skuvllaide. Anni-Sofia Niittyvuopio bargá fidnohoavdda bargguid Hanna Helandera njealje mánu virgefriddjavuođa áigge. Fidnohoavda bargá Ohcejoga gielddas.
Fitnu oahpaheaddjin jotket nuortalašgiela siidodoaibmasaš diibmooahpaheaddji Sirkka Sanila, anárašgiela oaivedoaibmasaš diibmooahpaheaddji Henna Aikio ja davvisámegiela siidodoaibmasaš diibmooahpaheaddji Marianne Ketola. Oaivedoaibmasaš davvisámegiela oahpaheaddjin álggaha Máren-Elle Länsman. Sirkka Sanila oahpaha Stockholmmas, Marianne Ketola Eanodagas, Henna Aikio ja Máren-Elle Länsman fas Oulus.
– Fitnu oahppiid mearri lea guovttegeardásaš vuosttás jagi ektui. Fidnui lea garra dárbu ja mii doaivutge, ahte ollugat daid sámeoahppiin, guđet vázzet skuvlla sámiid ruovttuguovllu olggobealde beasašedje searvat oahpahussii. Mii ávžžuhit fuolaheaddjiid, oahpaheaddjiid ja oahpahusa lágideaddjiid oahpásmuvvat fitnu oahpahussii ovdamearkan min neahttasiidduin. Bargiide sáhttá maid álo váldit oktavuođa, mii muitalit hui mielas lasi fitnu birra, lohká projeaktahoavda Anni-Sofia Niittyvuopio.
Almmuheapmi lohkanjahkái 2022-2023 lea rabas gitta njukčamánu loahpa rádjai. Almmuheami birra dieđihuvvo sierra ja fidnu ordne infodilálašvuođaid sámegielaid gáiddusoahpahusas beroštuvvan oahppiid fuolaheaddjiide ja oahpahusa lágideaddjiide.
Lassedieđut:
Anni-Sofia Niittyvuopio, fidnohoavda
Ohcejoga gielda
anni-sofia.niittyvuopio@edu.utsjoki.fi
040 7012 094
Arla Magga, fidnokoordináhtor
Sámediggi
arla.magga@samediggi.fi
040 6875 989
