Sámeturismaprošeakta ovddida etihkalaččat suvdilis turismma

Kuvituskuva saamelaismatkailun eettiset ohjeet

Sámedikki Kultuvrralaččat vásttolaš sámeturisma -prošeavtta ulbmilin lea sápmelašvuođa ávkingeavaheaddji turismma sihke sámiid guoski turismma bokte leavvi boastto dieđu jávkadeapmi. Etihkalaš rávvagat, mat válmmaštuvvet prošeavtta áigge, gusket ovdasajis sámeservoša olggobeale doaibmiid fállan sámekultuvrra buvttan ráhkadeami, ovdanbuktima ja diehtojuohkima turismma olis.

Turismma fámolaš lassáneapmi nu globálalaččat go Suoma Lappis lea lasihan hástalusaid turismma etihkalaš suvdilvuhtii, erenomážit sámekultuvrra konteavsttas. Sámekultuvrra symbolat leat Suomas ráhkaduvvon buvttan turismma olis juo logijagiid áigge, ja buvttan ráhkadeapmi leamaš juo guhká dakkár, ahte olggobeali doaibmit meroštallet ja ollašuhttet dan.

– Dál vuosttas háve sihke Sámedikki, ja Sámi parlamentáralaš ráđi doaibmaplánii lea bajiduvvon turisma oktan mearkkašahtti ovddidančuozáhagain, muitala Sámedikki ságajođiheaddji Tiina Sanila-Aikio turismaprošeavtta áigeguovdilvuođas.

Olggobeale doaibmiid doaimmas buvttan ráhkaduvvon sápmelašgovain lea uhcán dahkamuš eakti sápmelašvuođain. Turismmas ovdanboahtán boastto ja primitiivvalaš sápmelašgovva lea vearrámus dáhpáhusain sámeservoša loavkideaddji ja dávvirin ráhkadeapmi. – Dát almmolaččat ja jeavddalaččat ovdanbukton boastto govva váikkuha vahátlaččat sámekultuvrra eallinfápmui. Gártat jámma vuiget turisttaid ožžon miellagova sámekultuvrras, joatká Sanila-Aikio.

Etihkalaš rávvagat siktejit sápmelašvuođa ávkingeavaheaddji turismma geahpedeapmái

Etihkalaš rávvagiid váldoulbmilin lea jávkadit sápmelašvuođa ávkingeavaheaddji turismma sihke turismma bokte leavvi sámiid guoski boastto dieđu. Nubbin váldoáššin lea sihkkarastit turismma olggobeale olbmuid kulturvuogádagaid ja árbevieruid.

– Etihkalaš rávvagat leat dárkkuhuvvon ovdasajis sámeservoša olggobeale doaibmiide, geat dahket sámekultuvrra buvttan ráhkadeami, ovdanbuktima ja diehtojuohkima turismma olis, deattuha prošeavtta plánejeaddji Kirsi Suomi.

Vuolggasadjin lea, ahte sámekultuvrra buvttan ráhkadeapmi ja ovdanbuktin turismmas galget dáhpáhuvvat vásttolaččat ja etihkalaččat suvdilit sámeservoša siste. Turismabálvalusat galggašedje vuođđuduvvat eaktivuhtii. Nu ahte juos fállojuvvon buktagii gullá juoga sápmelašvuhtii dahje sámekultuvrii vuođđudeaddji oassi, galgá dan ollašuhttit ovttasbarggus sápmelaš doaibmiin.

– Olles turismasuorgi galgá vuolggasajis figgat dasa, ahte sámeturismii laktáseaddji buot doaimmat dorjot sámekultuvrra seailuma ja ovdáneami. Áibbas nugo Lappi turismastrategiijas gávnnahuvvo, sámekultuvrra seailun eallinfámolažžan ovddida Lappi turismma ovdáneami, joatká Suomi.

– Etihkalaš sámeturismma ovdáneami eaktun lea viiddes oktasašbargu, mii vuođđuduvvá máŋggabealat áddejupmái ja gudnejahttimii. Dárkkuhussan lea, ahte sápmelaččat ja turismasuorggi ámmátlaččat meroštallet ja áddejit etihkalaš sámeturismma seamma láhkai, deattuha Sanila-Aikio.

  • Prošeavtta álggus ollašuhttui jearahallandutkamuš, man dárkkuhussan lei álgodili kárten. Jearahallanbohtosiid vuođul ožžojuvvojedje álgomuttu duogášdieđut ja linnjádeamit etihkalaš rávvagiid ráhkadeami várás. Etihkalaš rávvagat galggašedje gárvánit jagi 2018 áigge. Etihkalaš rávvagat mannet čuovvovažžan Sámedikki čoahkkima gieđahallamii 24.9.2018.
  • Sámediggi lea ožžon oahpahus- ja kulturministeriijas stáhtadoarjaga oktiibuot 117 000 euro Kultuvrralaččat vásttolaš sámeturisma -prošeavttaid ollašuhttima várás.
  • Sámedikki Kultuvrralaččat vásttolaš sámeturisma -prošeavttas sámeturisma áddejuvvo turisman, mas sámekultuvrra resurssaid ávkingeavahemiin buvttaduvvojit turismabálvalusat ja dat fállojuvvojit fitnodatdoaimma vuođustusain. Dat sáhttá leat sápmelašvuhtii vuođđudeaddji turisma, mas sámeservoša siste boahttit barget turismaealáhusain, dahje sápmelašvuođa ávkingeavaheaddji turisma, mas sámeservoša olggobealde boahtti turismaealáhusain bargit ja eará turismabargit ávkkástallet ja ávkin geavahit sámekultuvrii laktáseaddji ja/dahje gullevaš elemeanttaid turismabálvalusain almmá aitosaš oktavuođa haga sámeservošii.

Lassidieđut:

Sámedikki ságajođiheaddji Tiina Sanila-Aikio, 050 300 1780, tiina.sanila-aikio(at)samediggi.fi

Plánejeaddji Kirsi Suomi, Kultuvrralaččat vásttolaš sámeturisma, 010 839 3118, kirsi.suomi(at)samediggi.fi

Mildosat


Juoge siiddu ovddosguvlui

Eará ođđasat