Sátnejođiheaddji Näkkäläjärvi sámediggeválggaide laktáseaddji bolesdutkamis: ”Mii sávvat buohkaide bargoráfi”
Boles lea almmuhan, ahte dat navdá rihkkosa jagi 2023 sámediggeválggaid oktavuođas. Sátnejođiheaddji Pirita Näkkäläjärvi mielde dutkan ii váikkut Sámedikki beaivválaš bargui.
Boles lea muitalan, ahte dat lea dahkamin ovdadutkama jagi 2023 sámediggeválggain. Sátnejođiheaddji Pirita Näkkäläjärvi dadjá, ahte son ii vuolgge árvvoštallat, laktásago áššái rihkus dahje gean sáhtášii navdit rihkkosis.
– Bolesa ovdadutkan lea álgán ja mii vuordit ráfis proseassa ovdáneami. Mii sávvat buohkaide bargoráfi, sátnejođiheaddji Näkkäläjärvi dadjá.
Sátnejođiheaddji Näkkäläjärvi oaidná, ahte duogážis lea várra guhkesáigásaš, sámiid iešmearrideami guoski riidu, mas Suopma lea ožžon dubmehalli čovdosiid ON olmmošriektekomiteas ja nállevealaheami vuostásaš komiteas (CERD).
– Dutkan ii váikkut Sámedikki beaivválaš bargui. Mii joatkit barggu buot golbma Suoma bealde ealli sámegiela ja sámi kultuvrra ovdii nu mo ovdalge, Näkkäläjärvi dadjá.
Lassedieđut:
Pirita Näkkäläjärvi
Sátnejođiheaddji
044 7533 766
