Vuođđu – ođđa eatnigiela oahppomateriála lea almmustuvvan! 

Vuođđu – Powerpoint diaráiddut addet vejolašvuođa lágidit gárvves oahpahusbottuid eatnigiela ja girjjálašvuođa vuođđoáššiin. Digitála hámis álmmuhuvvon materiála lea jurddašuvvon vuođđoskuvlla nuppi luohká oahpahussii. Oahppomateriálain sáhttá bures ávkkástallat maiddái bajit luohkkádásiid oahpahusas.  

Vuođđu-materiálas áiccalmahttit áššiid govaiguin, maid čájehit oahppiide dihtora, projektora dahje fiehttotávvala bokte. Danin oahppomateriála heive bures maiddái gáiddusoahpahussii. Okta oahpahusboddu lea jurddašuvvon bistit sullii 15–20 minuhta.  

Oahppomateriálas leat ovcci oasi, maiguin oahpahit čuovvovaš áššiid:  

1. Cealkka 
2. Gažaldagat 
3. Loahpahusmearkkat 
4. Vokálat ja konsonánttat 
5. Diftoŋggat 
6. Gemináhtta 
7. Synonymat 
8. Vuostegeažit 
9. Suopmanat 

Vuođđu-materiála gáimmada Álgu -buktaga Powerpoint materiálaiguin ja heive bures joatkkan daidda. Oahppomateriála lea ráhkadan erenomášluohkkáoahpaheaddji Aura Pieski ja govaid dasa lea sárgon govvadáiddár Nora Bäck. Vuođđu-materiála almmuhuvvo digitála hámis ja dat lea luđenláhkai sihke PPT ja PDF- hámis oahpaheaddji iežas dihtorii. 

Ovdal almmuhuvvon Árdna-oahppogirjjiin lea dál almmuhuvvon maiddái viiddis oahpaheaddjibagadus. Bagadusgirji fállá ideaid ja lassemateriála, maid sáhttá printet veahkkin oahpahussii. Oahpaheaddjibagadus almmuhuvvo digitála hámis. 

Suomabeale skuvllat sáhttet diŋgot dovddaldagaid materiálaide Sámedikkis:  

digimateriaalit@samediggi.fi  

Lassedieđut:  

Marita Aikio 
Oahppomateriálaplánejeaddji 
040 662 9018 
marita.aikio@samediggi.fi