Ságadoalli sadjásaš Juuso ovddasta Sámedikki ON:id eamiálbmogiid bissovaš forumis

ON:id eamiálbmogiid bissovaš foruma 25. čoahkkin lágiduvvo 20.4.-1.5.2026 ON:id váldoguovddážis New Yorkas ja dáhpáhusas guorahallojuvvo eamiálbmogiid dearvvašvuohta maiddái konflivttaid geahččanguovllus. Forum čohkke oktii eamiálbmogiid ovddasteddjiid, stáhtaid, ON:a doaibmiid ja eará ovttasbargoguimmiid. Maiddái Sámedikki Nuoraidráđđi lea mielde bissovaš forumis. Nuoraidráđi ovddasteaba várreságadoalli Ellen Saijets ja nuoraidráđi lahttu Niila-Juhán Valkeapää

Forumis ságastallojuvvo foruma guđa doibmii gullevaš oassesuorggis: ekonomalaš ja sosiálalaš ovdáneapmi, kultuvra, biras, oahpahus, dearvvašvuohta ja olmmošvuoigatvuođat. Ságastallamiin bohtet ovdan maid ON:id eamiálbmogiid vuoigatvuođaid julggaštus sihke ON:id suvdilis ovdáneami prográmma Agenda 2030. Lassin ordnejuvvojit máŋggat siidodáhpáhusat, čoahkkimat ja ságastallamat eamiálbmogiid, ON:id organisašuvnnaid ja eará ovttasbargoguimmiid gaskkas.

Čoahkkimis deattuhuvvo erenoamážit:

• Álgoálbmogiid dearvvašvuhtii čuohcci áitagat erenoamážit konflikta diliin.
• Kultuvrii heivehuvvon ja oadjebas dearvvašvuođabálvalusaid dárbu.
• ON:id eamiálbmotjulggaštusa ja suvdilis ovdáneami ulbmiliid ollašuhttin dearvvasvuođa geahččanguovllus.

Tuomas Aslak Juuso válljejuvvon ráđđeaddin ON:id álgoálbmotáššiid guoskevaš gullamiidda

Sámedikki ságadoalli sadjásaš Tuomas Aslak Juuso lea nammaduvvon ráđđeaddin doarjut ON:id ollesčoahkkima ságadoalli nammadan koordináhtoriid álgoálbmogiid oassálastima guoskevaš gullamiin. Nammadeapmi laktása vejolaš lassidoaimmaide, maiguin nannejuvvo álgoálbmogiid ovddasteddjiid ja institušuvnnaid oassálastin ON:id čoahkkimiidda sin guoskevaš áššiin.

Lassidieđut:

Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi

Inka Saara Arttijeff
riikkaidgaskasaš áššiid čálli
010 839 3198 / 050 574 7629
inka-saara.arttijeff@samediggi.fi